1 “Khaix an, awm pa krai Simiang Siyiex ka aux, ex deeh veeh ti hu krax daux tiag ka plak rawm sigrit sigra raoh mai ex hoik vung viang hawt gawng SiraxRef 2:1 Si 21:4. tom rheung singaix, 2 Simiang Siyiex ah nin ka aux, 3 pex vung viang hawt gawng in, hoik rheung bawg yam, veeh ti hu plak laong. 4 Tawm lox ka pui khankix ah nin, pex tak tiang ti hu ka mee haktiex puxaik pex, pa mawh doeh ru pex Esaw pa ot ka haktiex Sirax, Ref 2:4 Jah 36:8. mai kix tak lhat graung ka pex. Viang mawh nan, yuh satix mhawm mhawm, 5 paw doh cheeik ka kix, mawh kheu Aux tak ang tawx haktiex kix ka pex pie ceeix kawx, pie tix tiag caong dig kawx ang tawx ka pex, mawh kheu hoik tawx Aux gawng Sirax mawh cie Esaw. 6 Pex tak yaox ti liag pa ih khaing kix ka mau, sonsang yaox pex ti ih mai pex tak liag rawm khaing kix ka mau, sonsang yaox pex tix nyaux kah. 7 Mawh kheu Simiang Siyiex pex hoik nawb bwan piang kaing jhaw pa yuh pex ka taix ti khawmuik, Nawh Cao hoik tawng pex vung viang daux tiag ting in, daux tixpon num, Simiang Siyiex hoik ot tau mai pex mai pex ang lai koe ceu pa cud cha. 8 Ex lih hu krax luan hu khaing puxaik ex, kawn praix Esaw pa ot haktiex Sirax, khaing krax hu ex daux lung, khaing veng Elat mai veng Eziyon Gaba, ex deeh veeh ti tiang ka krax hu daux tiag Mawbax. 9 Simiang Siyiex ah nin ka aux, paw yuh krax tuktiak ka pui MawbaxRef 2:9 Jah 19:37. mai paw yuh naing ka kix, mawh kheu Aux tak ang tawx pex cie ka haktiex kix ceeix kawx, mawh kheu Aux hoik tawx kawn simex Lotax cie ka haktiex Arax. 10 Pui Emim hoik dawg ot tan tom dix mai kix mawh ceu pui pa ting mai kied nie mai kied lhaong awm ceu pui Anakax, 11 pui ceu in khankix baox kok ceu kaux kix mawh Rephem awm pui Anakax, viang mawh nan, pui Mawbax kok kix mawh ceu pui Emim. 12 Can pui Hawrix khankix hoik dawg ot ka haktiex Sirax tom dix, viang mawh nan, kawn simex Esaw khankix, grheu kix mai yuh kix laux leeing plak sivoe kix mai kawn praix Esaw ot ka dee ot kix, awm yuh pui Isarelax ka haktiex tawx Simiang Siyiex ka kix pa pon kix ti cie. 13 Yam in kaoh mai tiang plak klawng Zeriet, ex tiang plak toi rawm klawng Zeriet. 14 Bawg yam jah ex ti lih khaing Kadesha Bana, tom sidah tiang ex ka rawm klawng Zeriet hoik koe tixgoe daix num mai tom sidah hoek bawg yam laux leeing doeh ru pui naing khaing daux tab, awm hoik tiextu Simiang Siyiex ka kix.Ref 2:14 Si 14:28-35. 15 Mawh kheu plawng taix Simiang Siyiex teei ti tik ka kix, khaing daux tab, tom sidah laux leeing kix. 16 Pui naing khankix hoik laux leeing mai yum sinax pui hun khankix, 17 Simiang Siyiex ah nin ka aux, 18 in singaix pex tak tiang ka mee haktiex Arax mai Mawbax, 19 yam hoek pex dex pui Amon, paw tuktiak mai paw cheeik ka kix mawh kheu Aux tak ang tawx pex cie haktiex kawn simex AmonRef 2:19 Jah 19:38. tix ceeix kawx, mawh kheu Aux hoik tawx an mawh cie kawn simex Lotax. 20 Ka dee ankix sawn mawh haktiex pui Rephem, mawh kheu pui Rephem hoik dawg ot ka dee an, viang mawh nan, pui Amon kok kix mawh Zamzummim, 21 ceu pui an, mawh pa ting mai kied nie mai kied lhaong awm pui Anakax, viang mawh nan, Simiang Siyiex yuh kix laux leeing ka plak sivoe kix, mai grheu kix mai plud tix ot dee ot kix, 22 Nawh Cao hoik yuh ka doeh ru Esaw awm an, pa ot ka Sirax, yam yuh Nawh Cao pui Hawrix laux leeing khaing ka sivoe kix, kix grheu kix mai plud ti ot ka dee an tom hoek in singaix. 23 Pui Avin pa ot ka yaong, pa singai khaing veng Gaza, ceu pui Katawren pa kaoh khaing veng Katawrax, yuh kix laux leeing mai plud ti ot ka dee ot kix. 24 Kaoh mai lih hu krax mai tiang rawm Anon, Jhak heue, Aux hoik ap Sihon pui Amawrix, pa mawh simiang Heshabon mai haktiex nawh ka daux tawm taix pex, jah pex teei ti cie mai puing ka kix. 25 Jah ka daux in singaix Aux tak kieh pui kuceu piang haktiex yaoh yee mai lhat graung ka pex, pui pa mhong ka grawng pex tak lhat graung mai khi rhawm kheu jao pex.

26 “Aux hoik ploi kawncau khankix hu ka Sihon simiang meung Heshabon, khaing daux tiag Kedemot mai lox pa nhim ah nin, 27 Kieh aux tiang ka haktiex maix, aux tak lawng ngie ka daux krax ting mai aux tak ang veh ka plak khawn dawm mai ka plak khawn gwiex. 28 Maix coh pa ih son aux ka mau, sonsang pon aux ti ih mai coh rawm son aux ka mau, sonsang nyaux aux, kieh ngie aux tiang ka caong tix nong nong, 29 awm yuh kawn simex Esaw pa ot ka Sirax mai pui Mawbax pa ot ka Arax ka son aux, tom sidah tiang aux rawm klawng Yawdan mai hoek ka meung pa tawx Simiang Siyiex ex ka ex. 30 Sihon simiang Heshabon ang kieh ex tiang ka haktiex tix, mawh kheu Simiang Siyiex hoik kieh rhawm nawh kiien mai rhawm nawh kied kwa sonsang ap nawh tix daux taix pex, awm pa hoik yaox pex in singaix. 31 Simiang Siyiex ah nin ka aux, jhak heue, Aux hoik jah tix ap Sihon mai haktiex nawh ka pex, pex puing ka, mai teei ti cie kah. 32 Khaix an Sihon mai pui nawh khankix hoek ti puing ka ex ka veng Yahat. 33 Simiang Siyiex ex ap nawh ka ex mai ex hoik pex ka nawh mai kawn simex nawh mai khawm pui nawh khankix. 34 Yam an ex hoik teei veng nawh khawmuik mai ex hoik yuh simex, bun mai khawm kawn nyawm pa ot daux veng ku veng, laux lak pak leeing mai ex ang lai prah tix ceu kawx, 35 ex teei ngie tobrie awm kraung pa rhim son cao ex tau mai kraung pa pon ex khaing daux veng khankix. 36 Jah khaing veng Araw praok rawm klawng Anon mai khaing veng pa koe hawt rawm klawng khankix, tom singai hoek ka veng Gilat, ang lai koe veng pa ang ex pex tix veng kawx, Simiang Siyiex ex hoik ap daux tawm taix ex khawmuik. 37 Pex paw hu ngie dex haktiex kawn simex Amon mai hawt rawm klawng Yabok mai ka veng pa koe piang gawng khankix, pa tiebtie Simiang Siyiex ex ka ex heue.