3
1 Nebukhaneza pa mawh simiang hoik yuh riang grang khri tix mu, krax lhaong koe tixgliah sawk mai krax vieh koe liah sawk heue. Nawh yaog tix hu deuh an, ka daux lung Dura, daux haktiex veng Babulon khankix heue.
2 Simiang Nebukhaneza hoik ploi pui hu kraix khrawm cub simiang cao fa khankix mai cao pa kwang haktiex khankix, cao pa kwang veng khankix, cao pa tawx krax khankix, cao pa koh keun khankix, cao pa prawng see khankix, cao pa koe sibrawm khankix mai cao kaing haktiex khankix hoek tau, sonsang yuh pawie pa appong ka riang grang pa hoik jung simiang Nebukhaneza ti deuh heue.
3 Mawh keu nan, simiang cao fa khankix, cao pa kwang haktiex khankix, cao pa kwang veng khankix, cao pa tawx krax keud khankix, cao pa koh keun khankix, cao pa prawng see khankix, cao pa koe sibrawm khankix mai cao kaing haktiex khankix khawmuik hoik khrawm paox tix hoek sonsang yuh pawie pa appong riang grang pa hoik jung simiang Nebukhaneza ti deuh mai kix hoik cung ka plak sivoe riang rao pa hoik jung Nebukhaneza heue.
4 Khaix an cao pa pao ti krai lox tix kaux hoik kok yo lox tix tom ting ah nin, “Pui khankix, ceu pui khankix mai pa chix sikah lox kuceu khankix eue, koe gumlox pa tawx son pex,
5 yam mhong pex lox sinum teet, shiao, ting si, kraung, pi byang mai ting plah khaox khankix, pa luah tix sinum tau mai lox rhax khankix kuceu, pex tak gup tix krub ka riang grang khri pa hoik jung simiang Nebukhaneza heue.
6 Can pui pa ang gup ti krub ka riang grang an tak sang taing tik ti sau dom mawx dom an ka daux glah ngu pa kied hax an heue.”
7 Mawh kheu nan, yam hoik mhong pui khankix ka lox sinum luah teet, shiao, ting si, kraung mai pi byang khankix ka lox lai rhax kuceu khawmuik, pui khawmuik mai ceu pui khankix mai pa sikah lox kuceu khankix hoik gup tix krub ka riang grang khri pa hoik jung simiang Nebukhaneza heue.
8 Yam an, pui Khaladie khankix tiblah hoek ka plak sivoe mai deuh phimap piang pui Yudax khankix heue.
9 Kix ah nin ka simiang Nebukhaneza, “Kieh simiang lang ju heue.
10 Simiang eue, maix hoik tawx gumlox ti ah nin, can pui pa mhong lox sinum luah teet, shiao, ting si, kraung, pi byang mai ting plah khaox khankix yam sinum lox lai rhax khankix tix dom neh, pui khankix tak gup ti krub ka riang grang khri an,
11 mai can pui pa ang gup ti krub ka riang grang an, tak sang taing ti sau ka daux glah ngu pa kied hax an heue.
12 Yam in koe pui Yudax tiblah pui pa hoik deuh maix mawh cao pa kwang piang grawng kaing haktiex daux veng Babulon khankix, Shadariet, Meshak mai Abedanego, pui inkix ang cu ti tawx krax nab yam ka son grawng ceu pa dex dawd ka maix heue. Kix ang cu ti yuh kaing jhaw siyiex maix khankix mai ang cu tix krub ka riang grang khri pa hoik jung maix heue.”
13 Yam an, simiang Nebukhaneza, hoik kied song rhawm mai kied saux rhawm mai nawh hoik tawx lox tix hu kok Shadariet, Meshak mai Abedanego khankix hoek heue. Mawh kheu nan, kix hoik viex pui inkix hoek ka plak sivoe simiang heue.
14 Nebukhaneza ah nin ka kix, “Shadariet, Meshak mai Abedanego khankix eue, mawh su pex tix ang yuh kaing jhaw siyiex aux khankix mai ang cu tix krub ka riang grang khri pa hoik jung aux lie?
15 Yam in phan pex baox mhong lox sinum luah teet, shiao, ting si, kraung, pi byang mai ting plah khaox khankix, tau mai lox lai rhax khankix kuceu phan pex gup ti krub ka riang grang pa hoik yuh aux ti deuh an tak mawh ceu pa mhawm heue. Viang mawh nan, phan pex ang cu ti krub ka an, pex tak mawh pa taing ti sau ka daux glah ngu pa kied hax an dom mawx dom an heue. Mawh Siyiex mawx pa tak sang pon taoh ti teei pex khaing daux tawm taix aux lie?”
16 Shadariet, Meshak mai Abedanego, khankix, deeh pawk lox ah nin ka simiang, “Nebukhaneza eue, yix ang lai koe lox sang deeh pawk ka maix ka daux son grawng in heue.
17 Phan an lih ti mawh nin, Siyiex pa krub yix mai pa yuh yix ti tawx kaing jhaw, mawh pa pon deeh taoh yix khaing daux glah ngu pa kied hax an, simiang eue, Nawh Cao tak deeh taoh yix khaing daux tawm taix maix heue.
18 Viang ang mawh nan kawx, simiang eue, kieh maix tawng ka ang yix yuh ti tawx kaing jhaw siyiex maix khankix mai ang yix krub ka riang khri pa hoik jung maix ti deuh awx.”
19 Yam an, Nebukhaneza hoik kied naog ka daux pa song rhawm mai hoik tieh ngai baoh tix ka Shadariet, Meshak mai Abedanego khankix heue. Mawh kheu nan, nawh tawx lox tix mai kieh kix deeh seeh glah ngu an nie lheu hax khaing sivoe an aliah son heue.
20 Nawh tawx lox ka pui ting riang rao pa cong khankix, pa koe daux cub kru naing nawh sonsang phyawk ka Shadariet, Meshak mai Abedanego mai taing kix ka daux glah ngu pa kied hax an heue.
21 Pui inkix hoik phyawk ti tau mai khawm sibex, khlax, mhok mai kraung ceep tang ceu kix mai taing tix sau kix ka daux glah ngu pa kied hax an heue.
22 Mawh kheu kied nied gumlox pa tawx simiang mai kheu jao kied hax glah ngu an, rao ngu khankix hoik voeg pui an kix pa teei ti sau Shadariet, Meshak mai Abedanego khankix yum heue.
23 Pui inkix loe kaux pa mawh Shadriet, Meshak mai Abedanego khankix hoik phyawk ti tau mai hoik cod ka daux glah ngu pa kied hax an heue.
24 Yan an simiang Nebukhaneza, hoik kied daox deng mai nied yaog ti kaoh ah nin ka cao pa tawx krax keud nawh khankix, “Pui pa phyawk ex ti taing daux glah ngu ang mawh loe kaux lie?” Kix deeh pawk ah nin ka simiang, “Simiang eue, mawh heue.”
25 Simiang deeh pawk ah nin, “Jhak heue, aux yaox pui pon kaux pa ang tie phyawk tix mai lailing ti hu ka daux glah ngu mai kix ang tie mat pie ceeix kawx mai pakpeung pui pon kaux tix kaux an mawh pa awm kawn Siyiex heue.”
26 Khaix an simiang Nebukhaneza hu hawt dex daux moing glah ngu pa kied hax an ah nin, “Shadariet, Meshak mai Abedanego, pa mawh siliex Siyiex pa kied ting lhaong eue, lih mai hoek tin!” Shadriet, Meshak mai Abedanego, khankix hoik lih khaing daux glah ngu heue.
27 Simiang cao fa khankix, cao pa kwang haktiex khankix, cao pa kwang veng khankix mai cub cao pa tawx krax keud ka simiang khankix hoik kraix khrawm paox tix hoek jhak mai kix hoik yaox pui inkix ang ngu tie koe sibrawm ti hax yuh tokaux kix mai hauk kaing kix ang lai koe khaix hax mai kraung ceep kix kawx ang lai koe krax pa sioe meet ngu heue.
28 Simiang Nebukhaneza ah nin, “Kieh Siyiex Shadariet, Meshak mai Abedanego koe bwanson heue. Nawh Cao ploi kawncau tix taoh ka siliex Nawh khankix pa koe krax yum rhawm mai een rhawm ka Nawh Cao mai kix hoik lheu ka gumlox simiang mai hoik ap ti tawx tokaux tix son ang kix pon yuh ti tawx kaing jhaw mai ang cu ti krub ka siyiex tang kaux lheu khaing Siyiex kix heue.
29 Yam in, aux tawx lox tix ka ceu pui tix ang ah, pui meung mawx ang ah mai pa sikah lox kuceu khankix ang ah, pa ah lox lud ka Siyiex Shadariet, Meshak mai Abedanego khankix tak sang mawh pa gam tix phawng mai nyiex kix tak sang mawh pum phon, mawh kheu ang lai koe siyiex tang kaux tang hak pa pon yuh krax taoh awm in heue.”
30 Yam an, simiang hoik deeh yaog Ara Shadariet, Meshak mai Abedanego, khankix ting ka daux haktiex veng Babulon heue.