7
Grawng Teei Mex Moeng
(Efe 5:22-33; Kaw 3:18-19; 1Pe 3:1-7)
1 Phan mawh grawng ceu pa hoik tiiem pex ka aux, mhawm son simex, ti ang teeh ang dex mai bun heue.
2 Kheu haoh pa phit vao, kieh simex ku kaux tang koe moeng cie tokaux tix mai kieh bun ku kaux tang koe mex cie tokaux tix heue.
3 Kieh pa mawh mex tawx ka pa mawh moeng awm pa keung nawh ti pon awm an pa mawh moeng kawx, kieh nawh tawx nang nan ka pa mawh mex heue.
4 Pa mawh moeng ang koe sibrawm ka piang tokaux tix, mawh mex pa koe heue. Awm an pa mawh mex kawx ang koe sibrawm ka piang tokaux tix, mawh moeng pa koe heue.
5 Paw vi yuh ti ang cu ti tawx ka paox tix phan ang mawh ka pa hoik caw rhawm khawm ra kaux, ti yuh nan tix vong, sonsang teei bawg yam tix rawg bwan mai baox deeh ot mai paox tix khaix, phan ang mawh nan, ha Satan kox pon nyaw glaw pex, kheu ang pex pon ti priex rhawm tix heue.
6 Aux ah nin kheu koe akhwang mai ang lai mawh kheu lox pa tawm kah heue.
7 Ka pui khawmuik kawx, aux simie ti kieh awm aux. Viang mawh nan, kaux pui mawx pui an tang pon totaix khaing Siyiex, tix kaux ceu in mai tang kaux ceu an heue.
8 Aux ah nin ka pui pa ang koe mex koe moeng mai ka miexmai khankix, phan kix ot awm aux mhawm son kix heue.
9 Phan kix ang chix priex rhawm tix, kieh kix teei mex teei moeng, grawh grawng nawh nie lheu mhawm ti sang teei mex teei moeng khaing pa haok rhawm silao heue.
10 Phan mawh ka pa koe mex moeng khankix, aux tawm lox kah, ang mawh aux pa tawm, mawh Simiang, yuh ka mawx pa mawh moeng tak ang gwieh ti tang ot khaing mex tix,
11 Phan bun hoik gwieh ti tang ot, kieh nawh ot giex nong nong mai ang lai baox koe mex, phan ang mawh nan kieh nawh deeh khaw ka mex tix. Mai yuh ka mawx pa mawh mex kawx tak ang lai tik ka moeng tix heue.Ref 7:10-11 Mat 5:32; 19:9; Mak 10:11-12; Luk 16:18.
12 Ka pa deuk khankix, aux ah nin, ang lai mawh Simiang pa ah, phan puxaik tix kaux kaux koe moeng pa ang yum rhawm mai phan moeng nawh koe rhawm ti sang ot mai nawh, paw kieh nawh grheu moeng tix hu.
13 Phan pa mawh moeng, koe mex pa ang yum rhawm mai phan mex nawh koe rhawm tix sang ot mai nawh, paw kieh nawh grham mex tix lih hu heue.
14 Grawh grawng nawh mex pa ang yum rhawm lih mawh pa singax ka daux moeng tix mai moeng pa ang yum rhawm lih mawh pa singax ka daux puxaik pa mawh mex nawh heue. Phan ang mawh nan kawn praix pex tak lai mawh pa ang singax, yam in kix mawh pa singax heue.
15 Phan pui pa ang yum rhawm sang lih hu, kieh nawh lih hu heue. Pa mawh puxaik, pa mawh nan ang ah, ang mawh pa giex gang ka ceu pa yuh nan heue. Siyiex hoik kok ex sonsang khaw caw paox tix heue.
16 Pa mawh moeng eue maix chix tawng grawng pa sang pon taoh, ang maix pon taoh, ka mex tix yuh ka mawx? Phan ang mawh nan, pa mawh mex eue maix chix tawng pa sang pon taoh, ang maix pon taoh, ka moeng tix yuh ka mawx?
Ot Daux Pa Hoik Kok Siyiex Ka Maix
17 Awm hoik gwieh Simiang ti tang tawx ka kaux pui mawx kaux pui an mai awm pa hoik tang kok Siyiex ka kaux pui mawx kaux pui an, kieh nawh hu yuh nan heue. Aux tawm lox yuh nin, ka daux ceu cao khawmuik heue.
18 Hoik kok ka pa hoik pat hak tix kaux kaux lie? Paw kieh nawh lih mawh pa ang pat hak. Hoik kok ka pa ang pat hak tix kaux kaux lie? Paw kieh nawh pat hak heue.
19 Pa pat hak ang tie mawh tidtix mai pa ang pat hak kawx ang tie mawh tidtix, viang mawh nan mawh ngie pa priex ti hawt lox tawm jhawm krai Siyiex khaing pa koe bwanson heue.
20 Kieh kaux pui mawx kaux pui an ot ka daux ceu pa kok, pa hoik kok nawh kah heue.
21 Mawh maix siliex yam kok ka maix lie? Paw lai khi kah, viang mawh nan phan maix koe sibrawm ti lih mawh pui pa ploi, shiao ka sibrawm an heue.
22 Grawh grawng nawh, kaw pa hoik kok ka daux Simiang, yam mawh nawh siliex, hoik mawh pui pa ploi cie Simiang, awm an kaw pa hoik kok yam mawh nawh pui ploi, mawh siliex cie Cao Khrit heue.
23 Pex mawh pa hoik liag ka pa ngawh, paw vi kieh lih mawh siliex kawn pui heue.
24 Puxaik khankix eue, kieh kaux pui mawx kaux pui an, ot tau mai Siyiex, ka daux ceu pa hoik kok nawh kah heue.
Grawng Ang Koe Mex Moeng
25 Phan mawh grawh grawng bun krih aux ang lai koe lox tawm khaing Simiang, viang mawh nan, aux pa mawh pui pa hoik pon bwanson khaing Simiang tix mawh pui pa kaux sijax, tawx jhawm pa keud tix kah heue.
26 Mawh kheu ceu pa prawng yam in, aux ce mhawm kieh ca ot awm pa ot nawh heue.
27 Maix hoik mawh pa phyawk moeng kah lie? Paw lai sawg ti luan khaing nawh awx. Maix mawh pa hoik kah tix luan khaing moeng lie? Paw lai baox sawg ti moeng awx.
28 Phan maix teei ti koe moeng maix ang lud heue. Phan bun krih teei ti koe mex kawx, nawh ang lud heue. Pui pa yuh nan khankix, tak sang yaox krax kha rhawm ka daux nex nham, aux tom simie ti kieh pex luan khaing ceu an kix heue.
29 Puxaik khankix eue, aux ah nin, bawg yam pa kawn deuk ka ex hoik dawd, mawh kheu nan kieh khawm kix pa koe moeng, yuh awm pa ang kix lai koe heue.
30 Kieh kix pa yiiem grai, yuh awm kix pa ang yiiem grai heue. Kieh kix pa gaux rhawm, yuh awm ang kix lai gaux rhawm heue. Kieh kix pa liag, yuh awm pa ang kix lai koe heue.
31 Kieh kix pa shiao haktiex in, yuh awm pa ang shiao tom grum, grawh grawng nawh riang haktiex in mawh pa grai grhup hu heue.
32 Aux simie ti kieh pex luan khaing krax khi glawh heue. Pui pa ang koe moeng chix keud grawng ceu pa dex mai Simiang mai yuh ka mawx sonsang khaw caw nawh ka rhawm Simiang heue.
33 Pui pa koe moeng chix keud grawng ceu pa dex mai haktiex mai yuh ka mawx sonsang chix khaw caw nawh ka rhawm moeng tix,
34 mai jhawm keud nawh hoik tang gwieh tix heue. Awm an bun pa ang koe mex mai khawm bun krih, chix keud grawng ceu pa dex mai Simiang, son tokaux nawh mai khuan nawh, khawm ra ceu, tak sang mawh pa singax heue. Bun pa koe mex, chix keud grawng ceu pa dex mai haktiex, sonsang chix khaw caw nawh ka rhawm mex tix heue.
35 Pa ah aux nin, aux ah ngie sonsang koe bwanson son pex mai ang mawh sonsang taing singoe sawt ka piang pex, aux ah sonsang teem pex ti chix yuh pa khaw pa mawh son Simiang pa ang koe dee luk liak heue.
36 Phan pui tix kaux kaux ce nawh yuh pa ang khaw ka bun krih tix mai phan bun an hoik luan krih, kieh nawh yuh awm pa khaw caw ka rhawm bun an, pa yuh nawh nan ang koe phimap. Kieh teei paox tix heue.
37 Pa hoik een rhawm tix kaux, phan ang koe dee kin lox mai phan nawh pon ti yuh awm alo tix mai hoik dud keud ka daux rhawm tix, ti ang kieh kawn bun krih ti koe mex, yuh pa mhawm heue.
38 Mawh kheu nan kaw pa teei ti tawx kawn bunkrih, ti koe mex yuh pa mhawm heue. Kaw pa ang tawx kawn bun krih tix, koe mex nie lheu yuh pa mhawm heue.
39 Pa mawh moeng hoik phyawk ka mex tix, yam kawn klawd mex nawh, phan mex nawh hoik yum, ka pui mawx ang ah, nawh pon ti baox deeh mex, awm pa khaw rhawm nawh, pon ti teei ngie pa ot ka daux Simiang heue.
40 Phan awm pa keud aux, nawh nie lheu koe krax gaux rhawm, phan nawh ca ot awm pa ot tix, tokaux aux kawx aux ce koe Khuan Siyiex heue.