28
Yam Ot Pawlux Ka Klawn Tiex Melite
1 Yam ex hoik pon luan, ex tawng grawng klawn tiex an, mawh pa kok mawh Melite heue.
2 Pui tiag meung an, yuh bwanson kia ngien ka ex miex nyao, grawh grawng nawh kix phlu ngu mai rieb ti teei ex khawmuik, mawh kheu lih lhiex mai kheu kwat heue.
3 Viang mawh nan khaix hoik kraix Pawlux khix tix glien mai sau piang ngu, mawh kheu hax, siuing cai tom lih khaing nge khix mai vung vhien ka taix nawh heue.
4 Yam yaox pui tiag khankix, siuing pa cai an tak teue ka taix nawh, kix ah nin ka paox tix, “Pui in tee mawh pui pa pah pui yum mai viang nawh hoik luan khaing rawm sigrit sigra kawx, ceu pa rahsee ang doh lai kieh nawh im kah heue.
5 Viang mawh nan nawh sibluat siuing an ka daux ngu mai ang tie mawh tidtix.
6 Kix ce nawh sang uah, sang goh ti yum dom mawx dom an heue. Khaix hoik krox kix ti jhak rheung nyao mai ang yaox mawh pa ang mhawm tidtix ka nawh, rhawm kix deeh tieh mai kix dhua nawh mawh siyiex tix kaux heue.
7 Ka sivie tan koe haktiex pa mawh cie simiang giex kaing klawn tiex an, pa kaux Publi, pa rieb ti teei ex mai khan kheu ka ex loe ngaix mhawm mhawm heue.
8 Yam an keeing simiang Publi saux hoek mai saux vaig nham mai it heue. Pawlux laig hu ka nawh mai rawg bwan mai deuh taix tix piang nawh mai cox nawh moi heue.
9 Khaix hoik yuh nan, pui tang kaux khankix pa koe jhawm saux kawx pa ot piang klawn tiex an, hoek sonsang kieh cox tix moi heue.
10 Kix yuh ceu pa yaw tom nie mai yaw ex kah mai yam yaog ex ti brug reu hu, kix sau can ceu pa lo ex khankix piang reu heue.
Grawng Hoek Pawlux Daux Veng Romax
11 Khaix hoik luan loe khix ex brug reu Alezandre tix lhang, pa koe riang Siyiex puxaik kawn brawm, pa hoik bang ka klawn tiex an yam kwat heue.
12 Yam hoek ex ka veng Suraku, ex ot tan loe ngaix heue.
13 Yam yaog ex ti hu khaing tan, ex nied ti hu mai hoek ka veng Regium, khaix an tix ngaix bhaung khaing caong ma seh hoek ti phlu mai bo ngaix khaix ex tom hoek ka veng Pawtilu heue.
14 Ex yaox puxaik khankix tan, pa khyox khaw nhie ex ot tau mai kix aliah ngaix mai ex baox hu hoek ka veng Romax heue.
15 Puxaik khankix pa ot daux veng Romax yam mhong kix grawng hoek ex, kix hoek ti rieb ex tom hoek ka lah Appi mai ka nyiex bang loe lhang mai yam yaox Pawlux kix nawh yaogyaw bwanson Siyiex mai rhawm nawh deeh haing hiah kah heue.
Kaing Pa Yuh Pawlux
16 Yam laig ex ka daux veng Romax, Pawlux pon akhwang ti ot nong nong, tau mai pui naing tix kaux pa pau nawh heue.
17 Khaix an loe ngaix Pawlux kok pui ting lhaong pui Yudax khankix mai yam hoik khrawm kix paox tix, nawh ah nin ka kix, “Puxaik khankix eue, viang aux ang yuh pa lud loe ka ceu pui ex mai ka been tax du ex kawx, kix teei ti laung aux khaing veng Yerusaliem mai tawx aux ka daux tawm taix pui Romax khankix heue.
18 Khaix hoik chawk cheng kix aux, mawh kheu ang kix yaox grawng pa keung aux ti yum, kix tom koe rhawm ti sang ploi aux heue.
19 Yam ah pui Yudax khankix lox kieh raw ka grawng an, aux tom khyox khaw ti deuh rhawm ka simiang Kesa, Ref 28:19 Cau 25:11. phan ang mawh nan ang doh pon heue. Viang aux yuh nan kawx, ang mawh kheu koe phimap ceu pa deuh ka ceu pui aux heue.
20 Mawh kheu jao in aux tom kok pex hoek ti yaox mai sikah tau mai aux, grawng nawh, mawh kheu ceu pa keud pot jun pot pui Isarelax, aux tom kham geu ceu pa phyawk ka ceng in heue.”
21 Kix deeh ah nin ka nawh, “Ex ang nyang pon lai khaing meung Yudax grawng maix, viang mawh puxaik khankix kawx ang sax hoek ti krai pa ang khaw jiet grawng maix tix kaux kawx heue.
22 Viang mawh nan ex mie ti mhong khaing maix grawng pa keud pa ce maix, mawh kheu ex hoik tawng grawng been in, mawh pa map pui kah kudah dee heue.”
23 Yam hoek ngaix pa hoik bak kix ti een son nawh, kix hoek ka dee ot nawh tom nie heue. Nawh nih nai krai lao, kham mhai rug grawng meung Siyiex mai jeeh nyaw kix ka grawng Yesux, khaing lox lai beenli Mose mai khawm lai cao jhai khankix, jah yam ponngawb tom hoek yam ponbo heue.
24 Tix blah yum rhawm ka grawng pa krai nawh, viang mawh nan tix blah ang yum rhawm kah.
25 Kheu tokaux kix tang lox siyox moing, kix lih hu khaix hoik krai Pawlux lox tix gum, pa ah nin, “Khuan Singax Singeh hoik krai lox ka jheeh cao jhai Isayax, ka tax du pex mhawm mhawm pa ah nin,
26 Maix hu ka ceu pui in khankix ah nin, Pex mhong kawx, mhong mai ang tix tawng ceeix kawx. Pex yaox kawx, yaox mai ang tix yaox ceeix kawx.
27 Kheu rhawm pui ceu in hoik sivix mai yhaok kix ang hiex mhong mai kix hoik yip ngai tix, son ang kix sang yaox mai son ang yhaok kix chix mhong mai son ang rhawm kix chix tawng, deeh tieh hoek sonsang cox Aux ti kieh kix moi heue.Ref 28:26-27 Isa 6:9-10.
28 Mawh kheu nan kieh pex een ti tawng, grawng krax pa taoh Siyiex in, hoik ploi ti tawx hu ka pui tang ceu khankix mai kix tak sang nghiet heue.”
29 Khaix hoik ah nawh lox ceu an, pui Yudax khankix lih hu khaix hoik thung thiang kix paox tix tom nie heue.
30 Khaix an Pawlux ot tom naog ra num, daux nyiex pa hoik vai nawh ti cie mai nawh rieb ti teei pui can pa hoek ti laig ka nawh khawmuik.
31 Nawh viex rhawm kwa, sidiex grawng Meung Siyiex mai grawng ceu pa dex dawd mai Simiang Yesux Khrit mai pui tix kaux kawx ang kieh raw nawh heue.