19
Pawlux Ot Daux Veng Efesux
1 Yam kawn ot Apawlux ka daux veng Kawrinthux, khaix hoik lai ling Pawlux ka meung plak blaong nawh hoek ka veng Efesux mai yaox kawncau mau soi tix blah tan.
2 Mai nawh ah nin ka kix, “Yam yum rhawm pex, pex pon Khuan Singax lie?” Kix deeh ah nin ka nawh, “Ang, viang mawh pie pa sang tawx Khuan Singax Singeh kawx, ang ex sax pon ti mhong heue.”
3 Nawh baox chawk ah nin, “Phan mawh nan pex cubcom ka pa yuh ka mawx?” Kix deeh ah nin, “Ka krax cubcom Yohan heue.”
4 Pawlux baox ah nin, “Yohan cubcom, ka krax cubcom pa doh keud ka phimap mai krai ka pui khankix grawng kix tak sang yum rhawm ka Kaw pa tak sang hoek khaix nawh, pa ah nawh nan, sang ah ka Yesux heue.”Ref 19:4 Mat 3:11; Mak 1:4, 7-8; Luk 3:4, 16; Yo 1:26-27.
5 Yam hoik mhong kix lox in, kix cubcom ka daux ceu kaux Simiang Yesux heue.
6 Yam hoik deuh Pawlux taix tix ka piang kix, Khuan Singax Singeh lih hoek piang kix mai kix sikah ka lox pa tang pa siyox khankix mai krai lox jhai heue.
7 Kix dex mawh pui kao ra kaux heue.
8 Khaix an Pawlux laig ka daux nyiex sidiex mai viex rhawm kwa sidiex gau son loe khix mai kum kawng jeeh nyaw, ka ceu pa dex dawd mai Meung Siyiex heue.
9 Viang mawh nan kix tix blah kiien rhawm mai yam ang koe krax cu nghiet ah pa caox caig ka grawng krax Been an, sivoe cup pui hun khankix, Pawlux lih hu khaing kix mai gwieh ti deuh kawncau mau soi khankix, kum kawng mai kix ku ngaix ka daux nyiex gau lai Turannu heue.
10 Nawh ca kawn yuh nan been ra num, tom pon pui pa ot ka daux meung Asix khawmuik khawm leeing ti mhong gumlox bwan Simiang Yesux, pa mawh pui Yudax mai khawm pui Helasax heue.
Mhai Daox Am Daux Veng Efesux
11 Siyiex yuh mhai ceu pa daox deng pa lheu tang ka tawm taix Pawlux,
12 Tom viex kix man kawt, phan ang mawh nan man klieb khaing tokaux nawh, ka pui pa saux ngia mai jhawm saux kix grai mai phi caox khankix kawx lih hu heue.
13 Pui Yudax pa mawh pui vung viang praix tix blah, pa mawh pui grheu phicaox, ah ti yaox ceu kaux Simiang Yesux piang kix pa laig phicaox ah nin, “Aux nhie maix lih ka daux Yesux, Kaw pa sidiex gau Pawlux heue.”
14 Kawn simex cao giex kaing li pa ting pa mawh pui Yudax, pa kaux Sakeva, aliah kaux kawx yuh nan.
15 Phicaox deeh pawk lox ah nin ka kix, “Yesux aux uik tawng mai Pawlux kawx aux tawng mhawm mhawm, viang mawh nan pex mawh mawx?”
16 Pui pa laig phicaox an phoh piang kix ra kaux mai pex kiex khawm ra kaux, tom sidah to lih kiex khaing nyiex mai kakaong tix khaing daux nyiex mai saux mat tix heue.
17 Pui khawmuik pon ti tawng grawng in, khawm pui Yudax mai pui Helasax pa ot ka daux veng Efesux mai kix khawmuik kied lhat graung kah mai ceu kaux Simiang Yesux nied ti ting lhaong heue.
18 Pui pa hoik yum rhawm tom nie kawx, hoek ti krai doh phimap tix mai ceu pa hoik yuh kix heue.
19 Kix ceeix ngie ang mawh pa yuh sibawk simeed, khrawm ti viex phuk lai kix khankix gleeing ka ngu sivoe pui khawmuik mai kix simin sawn ti yaox ngawh lai an khankix mai yaox grawng caw mau phwan mheen bliah heue.
20 Mawh kheu nan gumlox bwan Siyex nied ti haok huan mai pre hu heue.
Grawng Suksak Daux Veng Efesux
21 Khaix hoik mawh ceu in khankix, Pawlux keud ti sang hu ka daux rhawm tix, preeng ka meung Makedonix mai meung Akhayax, yam hu nawh ka veng Yerusaliem. Nawh ah nin, “Yam hoik hoek aux tan, viang mawh veng Romax kawx aux tak lai yaox kah heue.”
22 Khaix hoik ploi pui ra kaux hu ka daux meung Makedonix khaing ka daux pui pa khrien khre ka nawh, pa mawh Timose mai Erattu, tokaux nawh kawn ot ka daux meung Asix tix vong heue.
23 Daux bawg yam an koe krax lawh maw cuci ceeix ngie ang mawh ka grawng Krax Been an.
24 Mawh kheu pui tix kaux, pa kaux Demetri, pa mawh pui chix yuh kraung mau, pa yuh nyiex bwan Atemi ka mau, pa pon kaing ceeix ngie ang mawh, son pui pa yuh mau khankix heue.
25 Nawh khrawm kix tau mai pui pa yuh kaing awm an khankix mai ah nin ka kix, “Pui khankix eue, pex tawng ex pon ti mi ti koe kheu kaing ceu in heue.
26 Pex yaox mai mhong grawng ang mawh ngie ka daux veng Efesux, viang mawh nan khawm meung Asix kawx dex khawmuik, Pawlux in hoik nyaw glaw mai kieh pui tom nie tieh, kheu nawh dhua siyiex pa yuh ka taix ang koe heue.
27 Kwe dee lhat grawng kaing ceu pa yuh ex in tak hoek krax laux min plakngai ngie ang mawh, viang mawh nan, viang nyiex bwan nyiex siyiex Atemi pa ting kawx tak hoek krax ang nab yam mai pa mhawm grang nawh cao pa krub pui meung Asix khawmuik mai pui haktiex ka, koe dee lhat dee khi grawng sang hoek krax laux heue.”
28 Yam mhong kix grawng ceu in, kix naog krax song rhawm mai kok yo ah nin, “Atemi cie pui Efesux mawh pa ting lhaong heue.”
29 Veng an naog krax sung sang lulax mai kix ih rhawm paox tix plab ti laig tau, ka nyiex dee khrawm pui ti jhak krax gaux rhawm mai giex ka Kayux mai Arittakhux, pui meung Makedonix, pa mawh paox pa hu krax tau mai Pawlux heue.
30 Yam koe rhawm Pawlux ti sang laig hu ka pui khankix, kawncau mau soi khankix ang kieh nawh hu heue.
31 Simiang meung Asix tix blah kawx, pa mawh paox pie Pawlux, ploi pui hu khyox khaw nhie nawh paw hu ka daux nyiex dee khrawm pui ti jhak krax gaux rhawm heue.
32 Mawh kheu nan tix blah kok tix ceu mai tang kaux tix blah kok tang ceu, kheu cub pui pa khrawm tix tan sung sang lulax mai pui plak nie ang tawng grawng kix hoik khrawm paox tix tan ka grawng yuh ka mawx heue.
33 Kix viex Alezandre lih khaing daux cub pui hun an, mawh pui Yudax pa nyheun nawh hu sivoe kix heue. Alezandre yuh kix yaox taix tix mai keud ti sang krai lox peeik map ka pui khankix.
34 Viang mawh nan yam tawng kix grawng mawh nawh pui Yudax, kix khawmuik kok yo lox tix mu, dex ra nari ah nin, “Atemi cie pui Efesux mawh pa ting lhaong heue.”
35 Cao tiiem lai veng an yam hoik kieh nawh cub pui khawmuik yiien yawg tix, nawh ah nin, “Pui veng Efesux eue, koe kaux pui mawx pa ang tawng grawng veng pui Efesux in, mawh cao pa priex nyiex bwan Atemi pa ting lhaong mai riang grang pa hoik cod khaing Cusa?
36 Mawh kheu grawng in mawh ceu pa ang pon ti thiang, pex khaw ti yiien yawg tix mai ang khaw ti nieb yuh tix ceu kawx heue.
37 Mawh kheu pex hoik viex pui in kiex tin, pa ang mawh pui briex ka nyiex bwan khankix, viang mawh ka yiex siyiex ex kawx ang mawh pui salao heue.
38 Mawh kheu nan phan Demetri mai pui pa yuh kraung mau tau mai nawh, koe see koe lox ka pui tix kaux kaux, nyiex dee prawng ca hoik paoh mai simiang kawx koe heue. Kieh kix deuh phimap ka paox tix tan.
39 Viang mawh nan phan pex baox koe lox koe see tang ceu tang cawng, tak lai prawng dud, ka daux cub cao prawng, pa khaw ti prawng heue.
40 Mawh kheu mawh pa lawh maw cuci singaix, ex koe dee lhat grawng sang deuh phimap piang ex, kheu ang koe grawh grawng mai ex ang koe lox ti sang krai ka grawng ceu pa ang khaw ang caw in tix ceu kawx heue.”
41 Khaix hoik ah nawh nan nawh ploi cub pui pa rom tix tan heue.