1 Yam kiex hoik hu preeng veng Amphipawlix mai Apawlawni, kiex hoek ka veng Thesalonix, dee koe nyiex sidiex pui Yudax tix lhang heue. 2 Pawlux laig ka kix, awm sax koe been nawh mai son loe ngaix twah, nawh kum mai kix khaing phuk lai sigang khri, 3 mai plak jhi grawng Cao Khrit tak lai kham geu mai deeh kaoh khaing krax yum mai nawh ah, “Yesux in pa sidiex aux ka pex mawh Khrit heue.” 4 Kix tix blah koe krax cu nghiet mai neuex tau mai Pawlux mai Silax mai khawm pa mawh pui Helasax pa nab yam ka Siyiex tom nie mai khawm bun pa ao min plakngai, ceeix ngie ang mawh kawx, koe krax cu nghiet heue. 5 Viang mawh kawx nan, kheu pui Yudax khankix boh rhawm ka, kix kok ti teei pui pa ang koe bwanson, pa nieb ot giex going mai khrawm ti yuh cub mai kieh veng an lawh maw heue. Kix yieh ti laig ka nyiex Yason mai sawg ka Pawlux mai Silax, sonsang viex kiex lih ka pui khankix heue. 6 Yam ang kix yaox kiex, kix reu Yason mai puxaik tix blah hu sivoe simiang giex kaing veng an khankix mai yo ah nin, “Pui in pa hoik kieh haktiex tieh cu ci, dee in kawx hoik hoek heue. 7 Yason hoik rieb ti teei kiex mai khinkix khawmuik yuh pa ang khaw ka lox tawm simiang Kesa ah nin, Koe simiang tang kaux tix kaux, pa mawh Yesux heue.” 8 Yam cub pui hun mai simiang giex kaing veng an khankix mhong grawng in khankix, kix sung sang rhawm ka heue. 9 Khaix hoik teei kix ceu pa tang khaing Yason mai pa deuk khankix kix ploi kix hu heue. Pawlux hu ka veng Berix 10 puxaik khankix ploi Pawlux mai Silax hu dom mawx dom an yam ponsawm ka veng Berix, yam kiex hoik hoek tan kiex laig ka daux nyiex sidiex pui Yudax heue. 11 Pui Yudax pa ot tan lheu mhawm rhawm khaing kix pa ot ka daux veng Thesalonix, ka daux pa viex khawm rhawm tix mai rieb gumlox bwan, sawg mai tiag ti yaox ka daux phuk lai sigang khri ku ngaix, sonsang tawng grawng ceu in khankix mawh lie, ang mawh lie. 12 Mawh kheu nan kix yum rhawm tom nie mai khawm pui Helasax, pa mawh bun pa ao min plakngai mai simex kawx, yum rhawm ceeix ngie ang mawh heue. 13 Viang mawh nan yam tawng pui Yudax pa ot ka daux veng Thesalonix khankix grawng hoik sidiex gau Pawlux lox bwan Siyiex ka daux veng Berix, dee an kawx kix hoek mai tawx riang so rhawm pui khankix heue. 14 Yam an dom mawx dom an puxaik khankix ploi kieh Pawlux hu, tom tiang ti hu ka krax rawm sigrit sigra, viang mawh nan Silax mai Timose kawn ot tan heue. 15 Viang mawh nan kix pa hu tawx Pawlux, viex nawh hu tom hoek ka veng Athen mai khaix hoik pon kix lox tawm, sonsang tawx ka Silax mai Timose, pa nhie kiex nied ti hoek laung laung, kix yaog ti ing heue. Pawlux ot daux veng Athen. 16 Yam kawn krox jun Pawlux ka kiex daux veng Athen mai yaox riang grang hoik naog daux veng an, nawh chu rhawm kah heue. 17 Mawh kheu nan nawh tom kum kawng ka daux nyiex sidiex tau mai pui Yudax khankix mai ka pui pa chix nab yam ka Siyiex khankix mai ka kix pa sipub nawh ka daux lah ku ngaix heue. 18 Pui Epikurux mai khawm pui Satawek, pa mawh pui ting pingnya cuyi ka grawng been tix blah cha ka Pawlux heue. Tix blah ah nin, “Pui caung haoh jheeh in, sang ah pa yuh ka mawx?” Tang kaux tix blah ah, “Nawh awm pui pa sang sidiex gau grawng siyiex tang praix tang meung heue.” Mawh kheu Pawlux sidiex gau grawng Yesux mai krax deeh kaoh im, kix tom ah nan heue. 19 Kix teei nawh mai viex nawh hoek ka gawng Are ah nin, “Ex pon ti tawng grawng lox gau pa khraox pa sidiex maix liak lie? 20 Kheu maix viex ceu pa ang ex sax tawng sax mhong ka yhaok ex, mawh kheu nan ex tom simie ti tawng dee bleeh ceu in khankix heue.” 21 Pui veng Athen mai nyo pa ot ka dee an khawmuik, ang yuh tidtix ka daux bawg yam pa koe kix, lheu khaing pa krai, phan ang mawh nan pa nghiet grawng pa khraox tix ceu ceu heue. 22 Pawlux cung ka sigreung gawng Are mai sidiex ah nin, “Pui veng Athen eue, aux yaox grawng jiet chix nab yam pex ka siyiex khankix khawmuik, ka grawng kuceu heue. 23 Kheu yam lawng aux krax, aux bliex ti yaox ceu pa krub pex kah mai aux yaox khu tix mu pa hoik tiiem ti deuh lai ah nin ka, SON SIYIEX PA ANG EX TAWNG Mawh kheu nan pa ang pex tawng mai krub kah, aux krai mai plak jhi pex tawng heue. 24 Siyiex pa phan pa yuh haktiex mai can pa koe ka dee an khawmuik, kheu mawh Nawh Siyiex raoma mai haktiex, Nawh ang ot ka daux nyiex bwan khankix pa hoik yuh ka taix. 25 Ang pon khan kheu ka Nawh ka taix pui, awm mawh Nawh pa lo tix ceu ceu, kheu mawh Nawh pa tawx ju pa im mai pa toek bhawm mai kuceu khawmuik heue.Ref 17:24-25 Isa 42:5. 26 Nawh hoik yuh kawn pui kuceu ka nham tix mu khaing, sonsang ot piang haktiex khawmuik mai hoik ciak ti deuh bawg yam kix mai mee dee sang ot kix, 27 Sonsang sawg kix Siyiex mai phan kix sang pon ti pupi hawt Nawh, pon ti yaox Nawh nieh, kheu Nawh ang singai khaing ex ku kaux daux pui heue. 28 Mawh kheu ka daux Nawh ex pon ti im ju mai chix chuh mai pon ti mawh ti koe, awm pui chix kab chix kai lox leng pex tix blah hoik ah, Ex mawh ru Siyiex heue. 29 Mawh kheu mawh ex ru Siyiex, ex ang khaw ti ce Siyiex awm khri, phan ang mawh nan mau, phan ang mawh nan simaox, pa hoik keud kawn pui ti saik ti yuh heue. 30 Mawh kheu nan daux bawg yam luan khankix yam daox yam ang pui tawng, Siyiex blha kix, viang mawh nan yam in Nawh tawx lox nhie pui kudah dee khawmuik, doh keud ka phimap tix heue. 31 Mawh kheu hoik ciak Nawh ti deuh tix ngaix, yam tak sang prawng ca Nawh haktiex in ka daux pa rahsee, ka Pui pa hoik laug Nawh tix kaux, Nawh hoik plak pui khawmuik yaox mhai rug pa kaux, ka daux ceu pa hoik kieh Nawh Cao deeh kaoh khaing krax yum heue.” 32 Yam mhong kix grawng pui yum deeh kaoh im, tix blah nie yuh pa ang cee cak, viang mawh nan tang kaux tix blah ah nin, “Ex tak baox deeh loi ti nghiet grawng ceu in khankix tix bawg ha.” 33 Yam ah kix nan Pawlux lih hu khaing sinax kix heue. 34 Viang mawh nan pui tix blah kawb tokaux tix mai nawh mai hoek krax yum rhawm heue. Pa neuex daux kix mawh Diyawnusi pa mawh simiang gawng Are tix kaux mai bun pa kaux Damarix tix kaux mai pui tang kaux kawx, ka mawh tau mai kiex heue. Pawlux Ot Daux Veng Kawrinthux.