ZEFANIAH
(Zephaniah)
1
1 Amon’ tapa Josiah in Judah gamah kumpi ahih lai takin, Topa in Zefaniah’ tungah hih thu pia hi. Zefaniah’ pa Kushi hi a, Kushi’ pa Gedaliah hi a, Gedaliah’ pa Amariah hi a, Amariah’ pa in Kumpi Hezekiah ahi hi.
2 Topa in hih bangin thu gen a, “Leitunga om na khempeuh ka susia ding hi.
3 Mihing leh ganhing, van-a leeng vasa leh tui sunga ngasa, a vekpi-in ka susia ding hi. Mi gilote ka susia ding a, leitunga om mihing khempeuh ka susia ding hi. Topa ahi keimah in hih thu ka gen khin hi.
4 Judah gam mi khempeuh susia-in, Jerusalem khua-a teeng mi khempeuh ka sumai ding hi. Baal milim biakna a them bang lai khempeuh leh tua milim na a sem siampite hih mun panin, a vekpi-in ka sumai ding hi.
5 Innkhumzang ah kahto-in, ni, kha leh aksi a bia mi khempeuh ka susia ding a, keimah hong bia-in, keima tungah thuman ding gen napi-in, Milkom pasian’ min tawh a kiciam teiteite zong, ka susia ding hi.
6 Lam pial a, kei hong zui nawn lote, thu dong dingin kei kiangah hong pai lote, ka susia ding hi,” ci hi.
7 Topa Pasian’ mai-ah gamdai takin om un! Topa’ ni hong nai ta hi. Topa in biakna-a sa gawh bangin a mite a go dingin kithawi a, a gawh ding mite sian’suah khin hi.
8 Topa in hih bangin thu gen a, “Tua banga mite a kigawh ni-in, uliante leh kumpipa’ tapa, leh gamdang mite’ ngeina a zuite khempeuh, daan ka pia ding hi.
9 Midangte’ sangkil kanin zawhthawh bawl a, khemna leh thahna tawh a ngah uh vante tawh, a Topa uh inn a dimsakte khempeuh, tua ni mahin daan ka pia ding hi,” ci hi.
10 Topa in hih bangin thu gen a, tua ni-in “Jerusalem khua Ngasa Kulh kongpi-ah mite’ kikona na za ding uh a, tua khuapi Veng Nihna sungah mite’ kahna, leh mual neute tungah a puak zaizai-a ging na za ding uh hi.
11 Khuapi Veng Nuainung sunga teeng mite aw, hih bang gamlumna na zak uh ciangin kapin thuum un. Bang hang hiam cih leh sumbukte khempeuh kisia ding uh hi.
12 Tua hun lai takin Jerusalem khua sung, meivak tawh ka zong ding a, thu phawk loin amau’ ngeina bang bangin om cip a, ‘Topa in a pha hita leh a sia hita leh, bangmah bawl ngei lo hi,’ a ci mite, daan ka pia ding hi.
13 Amau’ neihsa khempeuh kisut ding a, a innte uh kisuksiatsak ding hi. Inn a lam hangun a sungah teeng kha lo ding uh a, leenggui a suan hangun leenggahzu dawn kha lo ding uh hi,” ci hi.
14 Topa’ ni hong nai ta a, nai mahmahin hong tung hathat hi. Tua Topa’ ni hong tun’ciangin, galhang pente nangawn cimawhin kap ding uh hi.
15 Tua ni in heh mahmah ni, lungkham sinkham ni, tuahsia-in kisuksiat gawp ni, khua ziingin maimial ni, meiipi kai-in huihpi nun’ ni,
16 galdo nading peengkul a kitum ni, leh kulh nei khuapite leh a tausangte a kisimna-a galkapte’ kiko ni, hi ding hi.
17 Topa in hih bangin thu gen a, “Mihingte tungah lungkhamna lianpi ka tungsak ding a, amaute in mittaw bangin khua zawt ding uh hi. Keima tungah amaute hong khial uh ahih manin, tui bangin a sisan uh kithehthang ding a, a luanghawm uh, leilakah muatcip ding hi,” ci hi.
18 Topa’ heh thukna ni hong tun’ ciangin, amau’ ngun leh amau’ khamte in honkhia zo lo ding hi. Ama hehna meikuang in leitung khempeuh kangtum ding a, thakhat thu-in leitunga teeng mi khempeuh sumai ding hi.