30
1 Tu-in David leh a mite a ni thum ni-in Ziklag hong tun’ uh ciangin, Amelekte in Negeb leh Ziklag na sim khin uh hi. Amaute in Ziklag zo-in mei tawh na hal uh a,
2 numei khempeuh leh tua khua sunga om teng a neu a lian-in man uh hi; amaute in khat zong that lo uh a, ahih hangin pua khia-in paipih uh hi.
3 David leh a mite khuapi a tun’ uh ciangin a khuapi mei tawh kihalin, a zite leh a tanute leh a tapate uh sal-in a kimat khitna mu uh hi.
4 Tua ciangin David leh amah tawh a om mite in a aw uh gingsakin a tha bei dongun kap uh hi.
5 David’ zi nihte, Jezre-el khuami Ahinoam leh Karmel khuami Nabal zi meigongnu Abigailte zong sal-in kiman hi.
6 David nakpi takin lungkham hi; bang hang hiam cih leh mi khempeuh a tanute a tapate uh hangin a lungsim uh na lua ahih manin suang tawh amah den’ ding gen uh hi. Ahih hangin David in amahmah Topa a Pasian sungah kithakhauhsak hi.
7 Tua ciangin David in Ahimelek’ tapa siampi Abithar kiangah, “Siampi puan hong paipih in,” a ci hi. Tua ahih ciangin Abiathar in David kiangah siampi puan paipih hi.
8 Tua ciangin David in Topa thu dong a, “Hih mihonte ka delh ding hiam? Amaute ka pha ding hiam?” a ci hi. Amah in dawngin, “Delh in; bang hang hiam cih leh na pha taktak ding a, na mite na honkhia zo taktak ding hi,” a ci hi.
9 Tua ahih ciangin David leh amah tawh a om mihing zagukte kuankhia uh a, Besor lui-ah tungin, tua lai-ah a kinusia mi pawlkhat om uh hi.
10 Ahih hangin David, amah leh mi zalite a delhin paisuak uh hi; Besor lui a galkah dingin a gim lua mi zanih kinusia uh hi.
11 Amaute in Izipt mi khat gamlakah mu uh a, David kiangah amah paipih uh hi; amaute in anlum pia uh a, amah in ne hi, amaute in tui dawn ding pia uh hi,
12 amaute in thei moh khat leh leenggahkeu bawk nih zong pia uh hi. Amah in a nek khit ciangin a tha hong dimkik hi; bang hang hiam cih leh anlum ahi a, tui ahi zongin sun thum leh zan thum ne lo dawn loin om hi.
13 Tua ciangin David in ama kiangah, “Nang kuate na hi hiam? Koi pan na hi hiam?” a ci hi. Amah in, “Keimah in Amalekte khat’ nasem, Izipt tangval khat ka hi hi; tu ma ni thum lai-in ka ci na ahih manin ka topa in hong nusia hi.
14 Kote in Khereth mite’ Negeb gam leh Judahte’ gamsung leh Kaleb mite’ Negeb gam ka sim uh hi; mei tawh Ziklag ka hal uh hi,” a ci hi.
15 Tua ciangin David in ama kiangah, “Hih mite kiangah nong paipih suk ding hiam?” a ci hi. Amah in, “Nangmah in kei nong thah loh nading ahi a, ka topa’ khut sungah nong ap kik loh nading ahi zongin Pasian tawh kei tungah hong kiciam in, tua ciangin hih mihonte kiangah nang kong paipih suk ding hi,” a ci hi.
16 Tua ciangin amah in a paipih suk ciangin, en in, Filistiate gam leh Judah gam panin a lak uh na tampite hangin amaute gam sung khempeuh ah kithehthangin an ne, tui dawn, laamin om uh hi.
17 Tua ciangin David in a zing ciang phalvak-a kipan nitak dong amaute vatgawp hi; kalaoh tungah tuangin a tai tangval zalite sim loh amaute khat zong suakta lo hi.
18 David in Amalekte’ laksa khempeuh ngah kik hi; David in a zi nihte honkhia hi.
19 A neu a lian, tanute tapate, nate ahi a, a kila khat peuhpeuh ahi zongin a kisam khat zong om lo hi; David in a vekpi-in ciahpih kik hi.
20 David in tuu honte leh bawng honte khempeuh zong man hi; mite in tua ganhingte ama mai-ah hawl uh a, “Hih in David’ na lakte ahi hi,” a ci uh hi.
21 Tua ciangin, David zui dingin a gim lua, Besor lui-ah a kinusia mihing zanihte kiangah David pai hi; David leh amah tawh a om mite a dawn dingin amaute hong kuankhia uh hi; mite kiangah David a nai ciangin amah in amaute hopih hi.
22 Tua ciangin David tawh a pai mite lak panin a gilo leh mi ginalote khempeuh in, “Amaute in eite tawh hong paisuak lo uh ahih manin, mite in a zi leh a tate uh la-in a paikhiatpih uh cih sim loh, eite’ ngah kik nate khat zong amaute i pia kei ding hi,” a ci uh hi.
23 Ahih hangin David in, “Ka sanggamte aw, Topa in eite hong piaksa nate tua bangin na hih kei ding uh hi; amah in eite hong kemin eite do ding a hong pai mihonte i khut sungah hong pia khin hi.
24 Hih thu-ah kua in no’ thu hong ngai ding ahi hiam? Bang hang hiam cih leh gal sunga a kuan mipa’ tanh zah mah, van a ngak mipa in tang ding hi; amaute in a kibangin tang ding uh hi,” a ci uh hi.
25 Tua ni-a kipanin tu ni dongin amah in Israelte adingin thukham leh biakna ngeina kipin bawl hi.
26 David in Ziklag a tun’ ciangin Judah upa a lawmte kiangah a na lakte pawlkhat khakin, “Topa’ galte’ na a kila sung panin hih lai-ah note ading letsong a om hi,” a ci hi;
27 tua nate pen, Beth-el, Negeb sunga om Ramoth, Jattir,
28 Aroer, Sifmoth, Eshtemoa,
29 Karmel, Jerahmeel khuapite, Ken khuapite,
30 Hormah, Borashan, Athak,
31 Hebron sunga omte, David leh a mite a pai ngeina mun khempeuhte’ ading ahi hi.