1 David tua lai panin kihemkhia-in Adullam leihawm-ah tai hi; a sanggamte leh a pa’ innkuante khempeuh in a zak uh ciangin ama kiang tua lai mun-ah paisuk uh hi. 2 Tua ciangin a lungkham mi khempeuh, leh leiba a nei mi khempeuh, leh a lungkim lo mite khempeuh ama kiangah kikhawm uh hi; amah in amaute tungah a ukpa a suak hi. Tua lai-ah amah tawh mihing zali bang om hi.

3 David tua lai mun panin Moab gam Mizpeh-ah pai hi; amah in Moab kumpipa kiangah, “Pasian in kei adingin hong sepsak ding ka theih hun matengin ka nu leh ka pa na kiangah hong omsak in, ci-in kong thum hi,” a ci hi. 4 Amah in Moab kumpipa kiangah amaute nusia a, munmuanhuaina sungah David a om sung teng amah tawh omkhawm uh hi. 5 Tua ciangin kamsangpa Gad in David kiangah, “Munmuanhuaina sungah om nawn kei in; kihem in la, Judah gamah pai in.” a ci hi. Tua ahih ciangin David kihemkhia-in Hereth tulak-ah pai hi.

6 Tu-in David leh amah tawh a om mite a kimuhna Saul in za hi. A khut sungah a teipi tawi-in, a nasemte khempeuh a kimkotah ding-in Gibeah khua a sangna mun makeng kung nuai-ah Saul tu hi. 7 Tua ciangin Saul in a kimkot-a a ding a nasemte kiangah, “Tu-in za un, no Benjaminte aw; Jessi’ tapa in note khempeuh lote leh leenggui lote hong pia-in, note khempeuh a tul a uk, a za a uk-in hong koih dingin um a, 8 note khempeuh in kei hong sawmsim na hi uh hiam? Tu ni-a bangin hong pangsim dingin ka tapa in Jessi’ tapa tawh thukimna a bawl ciangin kuamah in kei kiangah hong pulak loin, ka tapa in keimah a do dingin ka nasempa a hanthotna-ah note kuamah dah loin, kei kiangah zong nong pulak kei uh hi,” a ci hi. 9 Tua ciangin Saul’ nasemte kiangah a ding, Edom mi Doeg in dawngin, “Ahitub’ tapa Ahimelek kiang Nob khua-ah Jessi’ tapa a pai ka mu a, 10 amah in ama adingin Topa thu dot sakin, an-le-tui pia a, Filistia mi Goliath’ namsau ama tungah pia hi,” a ci hi.

11 Tua ciangin kumpipa in Ahitub’ tapa siampi Ahimelek leh a pa’ innkuante ahi Nob-a om siampi khempeuh a sam dingin mi sawl hi; kumpipa kiangah amaute khempeuh hong pai uh hi. 12 Tua ciangin Saul in, “Ahitub’ tapa aw, tu-in za in,” a ci hi. Amah in dawngin, “Hih lai-ah om ing, topa aw,” a ci hi. 13 Tua ciangin Saul in ama kiangah, “Tu ni-a bangin hong pangsimin kei do dingin hong thawh theih nadingin bang hangin nang leh Jessi’ tapa in kei hong sawmsim a, ama tungah an leh namsau pia-in, ama adingin Pasian kiangah thu dotsak na hi hiam?” a ci hi. 14 Tua ciangin Ahimelek in kumpipa dawngin, “Na nasemte khempeuh lak panin kumpipa’ makpa leh nangmah hong cingte a ukpa ahi David bangin kua thumanin, na inn sungah kua kipahtawi ahi hiam? 15 Ama adingin Pasian thu ka dotsak a masa pen in tu ni ahi hiam? Hilo! Kumpipa in a nasempa ahi a, ka pa’ innkuante khempeuh ahi zongin ngawh kei in; bang hang hiam cih leh na nasempa in a tam hita leh a tawm hita leh hih thu khempeuh bangmah thei lo hi,” a ci hi. 16 Tua ciangin kumpipa in, “Ahimelek aw, nang leh na pa’ innkuante na si taktak ding uh hi.” a ci hi. 17 Kumpipa in ama kiim-ah a ding a cingte kiangah, “Kihei un la, Topa’ siampite that un; bang hang hiam cih leh amaute zong David tawh pang khawm uh hi; amaute in ama tai lam thei napi-in kei kiangah hong pulak lo uh hi,” a ci hi. Ahih hangin kumpipa’ nasemte in Topa’ siampite tung a tu dingin a khut uh taangkhiasak lo uh hi. 18 Tua ciangin kumpipa in Doeg kiangah, “Kihei in la siampite hih in,” a ci hi. Edom mi Doeg kihei-in siampite hih a, tua ni-in saiha dial siampi puan a silh mihing sawmgiat leh nga that hi. 19 Amah in siampite’ khuapi Nob khua sunga om nuntakna a nei khempeuh namsau tawh hih hi, numei leh pasal, naupang leh nawine, bawngtalte, late leh tuute, namsau tawh that khin hi.

20 Ahih hangin Ahitub’ tapa Ahimelek’ tapate khat Abiathar a kici khat suakta-in David kiangah a tai hi. 21 Saul in Topa siampite a thah khitna thu Abiathar in David kiangah gen hi. 22 David in Abiathar kiangah, “Tua ni-in Doeg tua lai-ah om ahih ciangin Saul kiangah gen taktak ding hi, ci-in ka thei hi. Na pa’ innkuanpih mite khempeuh’ sihna ka piangsak hi. 23 Kei tawh hong om in, lau kei in; bang hang hiam cih leh kei that dingin hong zongte in nang zong thah dingin hong zong hi; kei tawh nang in lungmuanna sunga om na hi ding hi,” a ci hi.