10
1 Tua ciangin Samuel in sathau thawl khat la-in ama lutungah buak a, tua ciangin amah namin, “Topa in ama mi Israelte tungah ulian dingin nang sathau hong nilh khin hilo ahi hiam? Nangmah in Topa’ mite ukin a kiim-a om amau’ galte’ khut sung panin amaute na honkhia ding hi. Hih in nang tungah, Topa in ama luahte tungah ulian dingin nang sathau hong nilh khitna lim hi ding hi.
2 Tu ni-in kei kiang panin na paikhiat ciangin Benjaminte’ gam Rachel’ han kiang Zelzah-ah mihing nih na tuak ding a, amaute in nang kiangah, ‘Pai-a na zon’ late kimu khin a, tu-in na pa in late ngaihsun nawn loin nangmah hong lunghimawh a, “Ka tapa bang cih ding ka hi hiam?” ci hi,’ hong ci ding uh hi.
3 Tua ciangin tua lai panin pai lai-in Tabor tawsaw lak na tung ding hi; tua lai panin Bethel-a Pasian kiangah a paito, keelno thum a pua mi khat, anlum thum a pua adang khat, leh leenggahzu savun thawl khat a pua, mi thum in nang hong dawn ding uh hi.
4 Amaute in nang hong hopihin nangmah in amau tung panin na san’ ding anlum nih nang tungah hong pia ding uh hi.
5 Tua khit ciangin Filistia khuacingte a omna Gibeath-elohim na tung ding hi: tua lai mun khuapi sung na tun’ ciangin amaute mai-ah, harp lasakna, khuangneu, tamngai, leh laiza lasakna tawh mailam thu genkholin mual tunga biakna panin hong paisuk kamsang honkhat na tuak ding hi.
6 Tua ciangin Topa’ Kha khauh takin nang tungah hong tung ding a, amaute tawh mailam thu genkholin mi tuamdang khatin na kikheel ding hi.
7 Hih limte nang tungah hong tun’ ciangin na tuah peuhpeuh na hih ding hi; bang hang hiam cih leh nang tawh Pasian hong om hi.
8 Tua ciangin keima mai Gilgal ah na paisuk ding hi; en in, meihal biaknate leh thunuam-a biaknate a pia dingin nang kiangah kong pai ding hi. Nang kiangah kei hong pai-in na hih ding teng kong lah mateng, ni sagih sung na ngak ding hi,” a ci hi.
9 Samuel nusia dingin a nung hei ciangin Pasian in ama tungah lungsim dang khat pia hi; tua ni-in hih limte khempeuh piang hi.
10 Amaute Gibeah ah a tun’ uh ciangin, en in, kamsang honkhat in amah na dawn hi; tua ciangin Pasian’ Kha ama tungah khauh takin hong tung a, amah in amaute lakah mailam thu genkhol hi.
11 Amah in kamsangte tawh mailam thu a genkholhna amah a theisa mi khempeuhte in a muh uh ciangin, mite khat leh khat in “Kish’ tapa tungah bang tung ahi hiam? Saul zong kamsang suak ahi hiam?” kici uh hi.
12 Tua ciangin tua lai-a mite khat in dongin, “Kua’ tate ahi uh hiam?” a ci hi. Tua ahih ciangin, “Saul zong kamsang suak ahi hiam?” cihna paunak khat a kipatna hong suak hi.
13 Amah in mailam thu genkholh a man ciangin inn-ah pai hi.
14 Saul’ pano in amah leh a nasempa kiangah, “Koi-ah pai na hi uh hiam?” a ci hi. Amah in, “Late a zong dingin ka pai uh hi; late kimu zo lo ding ci-in ka theih uh ciangin Samuel kiangah ka pai uh hi,” a ci hi.
15 Tua ciangin Saul’ pano in, “Kong thum hi, Samuel in nang kiangah hong gen teng kei tungah hong gen in,” a ci hi.
16 Tua ciangin Saul in a pano kiangah, “Late a kimuh khitna ko kiangah teltakin hong gen hi,” a ci hi. Ahih hangin Samuel in a gen kumpi suah nading thu tawh kisai ama tungah bangmah gen lo hi.
17 Tu-in Samuel in Mizpah-a Topa kiangah mite khawm hi;
18 amah in Israel mite kiangah, “Israelte’ Pasian, Topa in hih bangin ci hi, ‘Izipt panin Israelte ka paikhiatpih a, Iziptte’ khut sung leh note hong nengniam kumpi gamte khempeuh’ khut sung panin note kong honkhia hi,’ ci hi.
19 Ahih hangin note in na tuahsiatnate uh leh na lungkhamnate uh khempeuh panin note a hong honkhia na Pasian uh tu ni-in na nial uh hi; note in, ‘Hi lo! kote tungah kumpi khat koih in,’ na ci uh hi. Tua ahih ciangin tu-in na minam nam uh leh a tul tulin Topa’ mai-ah kilak un,” a ci hi.
20 Tua ciangin Samuel in Israel minamte khempeuh a nai-ah hong paipih a, aisanna tawh Benjamin minam kila hi.
21 Amah in Benjamin minamte a behbehin hong paipih a, aisanna tawh Matri innkuan kila hi; a tawpna-ah amah in Matri innkuan a mi mi-in hong paipih a, aisanna tawh Kish’ tapa Saul kila hi. Ahih hangin amaute in amah a zon’ uh ciangin amah kimu lo hi.
22 Tua ahih ciangin amaute in Topa kiangah dong kik uh a, “Tua mipa hih lai-ah hong pai hiam?” ci uh a, Topa in, “En un, amahmah van kawmlakah bu hi,” a ci hi.
23 Tua ciangin amaute tai-in tua lai mun panin amah hong paipih uh hi; mite lakah amah a din’ ciangin mi khat peuhpeuh sangin a liangko tung siah-in amah sangzaw hi.
24 Tua ciangin Samuel in mi khempeuh tungah, “Topa in a teelsa mipa na mu uh hiam? Mi khempeuh lakah amah tawh a kibang khat zong om lo hi,” a ci hi. Tua ciangin mi khempeuh awngin, “Kumpipa khan’ sau hen!” a ci uh hi.
25 Tua ciangin Samuel in kumpipa thuneihna leh a nasepte mite kiangah gen hi; amah in tuate laibu khat sungah gelhin Topa mai-ah koih hi. Tua ciangin Samuel in mi khempeuh amau’ inn ciatah ciahsak hi.
26 Saul zong Gibeah-a ama inn-ah ciah a, Pasian in amau’ lungsim a lawn’sak mi thahatte zong amah tawh pai hi.
27 Ahih hangin bangmah man lo mi pawlkhat in, “Hih mipa in eite bang hong ci hotkhiat zawh ding ahi hiam?” a ci uh hi. Amaute in amah simmawhin ama kiangah letsong puak lo uh hi. Ahih hangin amah in tua mite bangmah cih lo hi.