15
1 A thahat eite in eite deih bang zui loin thahat lote a thanemna i thuakpih ding hi.
2 Eite khempeuh in i lawmte noptuam na’ng ngaihsunin, amah i kipsak nading ama deihna zui ni.
3 Bang hang hiam na cih uh leh, Khazih in zong ama deihna zui lo a, Lai Siangtho sungah a kigelh mah bangin, “Nang hong simmawhte a simmawhna kam in keima tungah hong tung hi,” a ci hi.
4 Eite in Lai Siangtho pan i ngah thuakzawhna leh hehnepna hangah lawpna i neih nadingin, Lai Siangtho-ah nidang lai-a a kigelhsa thu in eite hong thu hilhna-in a kigelh hi.
5 Note in eite Topa Zeisu Khazih’ Pa ahi Pasian, lungsim kituakin na kam uh tawh na phat nadingun,
6 Khazih Zeisu deih bangin khat leh khat kilung tuakin na om nadingun , kithuakzawhna leh hehnepna a pia Pasian in hong hehpih ta hen.
7 Tua ahih ciangin Khazih in note hong man’ mah bangin note in Pasian’ minphatna kilangsakin, khat leh khat na kimang un.
8-9 Khazih in Pasian’ thuman thutak hangah pute pate tungah a piak thuciamna a kip nadingin ahi zongin, Gentailte in zong Pasian’ hehpihna ngahin Pasian a minthan’sak theih nading uh ahi zongin, vun atna a thuak mite’ nasem mi a suak hi. Lai Siangtho sungah:
“Tua ahih ciangin Gentailte lakah na hehpihna ka phat a, Nangma min phatna la ka sa ding hi,” ci-a a kigelh bang ahi hi.
10 Khatvei amah in:
“Gentailte aw, note in ama mipawlte tawh na lungdam khawm un,” a ci hi.
11 Khatvei leuleu:
“Gentailte khempeuh aw, Topa phat un, mipawl khempeuhte in amah phat ta un,” a ci hi.
12 Kamsangpa Isaiah in:
“Jessi bul meeng in Gentailte a uk ding mi ahi ding hi. Gentailte in amah a muang ding uh hi,” a ci hi.
13 Note in Kha Siangtho’ vangliatna hangah lametna pha tawh na dim nadingun, upna nei-in lungdamna, noptuamna a pawlpawlte tawh na dim nadingun, muan’na hong pia Pasian in hong pia ta hen.
14 Ute naute aw, note in lungsim pha tawh dimin, pilna tawh na dim uh a, khat leh khat thu na kihilh thei uh, ci-in ka um hi.
15 Kha Siangtho in hong sian’ thosak deihhuai biakna ahi Gentailte pia dingin,
16 keimah in Pasian’ Lungdamna Thuhilh na semin Gentailte tungah Khazih’ nasem ka hih nading, Pasian in kei hong piak hehpihna thupha hanginah ute naute aw, note hong phawksak kikin, lau loin lai ka gelh hi.
17 Tua ahih ciangin Pasian tawh a kituak nate hangah note lamsang ah keimah in Khazih Zeisu suangin ka kisathei hi.
18 Gentailte in kam tawh ahi zongin, gamtatna tawh ahi zongin, thungaih nading Khazih in
19 lim leh nalamdang vangliatna leh Kha Siangtho’ vangliatna lakin keima tungah a bawl nate bek ka gen ngam hi. Tua ahih ciangin Jerusalem khua panin Ilirikum gam dongin, kimkot mun khempeuh ah, Khazih’ Lungdamna Thu a vekpi-in ka hilh khin zo hi.
20 Ahi hi. Midangte khuamphuhna tungah ka lam loh na’ngin, Khazih’ min a kizak ngeilohna munah Lungdamna Thu hilh dingin lungsim takpi tawh ka hahkat hi.
21 Lai Siangtho sungah:
“Tua mi thu, kuamah in a lah ngei loh hangin amaute in a mu ding uh hi. A za ngei lo mite in a thei ding uh hi,” ci-in a kigelh hi.
22 Tua ahih ciangin note omna munah kong pai theih loh nading tam veipi hong kikham zo hi.
23 Tu lai takin hih munte-ah ka hih ding om lo ahih ciangin note omna-ah kong pai ding pen sau veipi-in deihin,
24 Spain ka pai ciangin lampi-ah note tawh kimu-in, note tawh kikhawl khawmin, deihna teng a kicin’ khit ciangin tua gamah note hong khakna thupha ka ngah ding hi ci-in ka lamen hi.
25 Tu-in ahih leh, misiangthote vaakin Jerusalem khuapi-ah ka pai ding hi.
26 Bang hang hiam na cih uh leh, Makedonia gam mite leh Akhaia gam mite in Jerusalem khuapi-ah misiangtho zawngte sum hawm uh a, lungsim takpi tawh a pia zo uh hi.
27 Ahi hi, lungsim takpi a nei uh ka cih hangin amaute in tuate tungah leiba nei-in a kingaihsun uh hi. Bang hang hiam na cih uh leh, Gentailte in Kha Siangtho piak thuphate Judah mite tawh a ngah khawm uh ahih leh, leitung sum pia-in amau zong Judah mite a vaak ding uh a kilawm hi.
28 Tua ahih ciangin hih na ka sep a, hih na piakna lim takin ka koih khit ciangin, note kiang tawnin Spain gamah ka pai ding hi.
29 Note omna mun kong tun’ ciangin a kicing Khazih’ thupha tawh kong pai ding, ke’n ka thei hi.
30-32 Ute naute aw, keimah in Judah gamah a om thu nialte’ khut tung pan ka suahtak nading ahi zongin, Jerusalem khuapi-ah keimah in an vaakna ka sep ding misiangthote in a deih nadingun ahi zongin, Pasian’ deihna bangin lungdamna tawh note omna-ah kong tung ding a, note tawh noptuamna ka ngah khawm nadingin ahi zongin, note in keimah tawh hahkatin keimah ading Pasian kiangah thu na ngetsak ta un, ci-in i Topa Zeisu Khazih leh Kha Siangtho-a itna tawh note kong thuum hi.
33 Nopna hong pia Pasian in note khempeuh tawh omkhawm ta hen. Amen.