Late 92
1-3 Sang Penpa aw, Topa tungah lungdam lah ding, nangma min phatna sak ding; zang sawm khausai lasakna leh harp lasakna, laiza lasaknate tumin, zingsangin nangma itna kip, zanin na thumanna genkhiat dingin a kilawm hi.
4 Bang hang hiam cih leh Topa aw, nangma nasepna tawh kei hong lungdamsak a, nangma nasepnate hangin lungdamin la ka sa hi.
5 Topa, na sepnate bangzah takin lian! Na ngaihsutnate thuk mahmah!
6-8 Migilote lopa bangin selkhia-in, siatna bawl khempeuh a pun’ hangin, amaute pen a tawntungin siatna a thuak ding ahi uh hi; ahih hangin, Topa aw, nang pen asangna-ah a om tawntung na hihna thu, lungsim mawl mi in theithei lo a, lungsim tei lo mi in tel thei lo hi.
9 Bang hang hiam cih leh, Topa aw, na galte en in, bang hang hiam cih leh, en in, na galte beimang ding hi; siatna bawl khempeuhte kithehthang ding uh hi.
10 Ahih hangin nangmah in zangsial bangin kei nong hatsak a, kei tungah thupha hong pia-in nong lungdam sak hi.
11 Ka galte’ pukna ka mitte in mu khin a, keimah hong do a gilote’ siatna ka bilte in za khin ta hi.
12 Thuman mi in nisuh kung bangin palh a, Lebanon mual tunga taamtaak kung bangin a khang hi.
13 Topa’ inn sungah amaute kisuan a, i Pasian’ huang sungah amaute palh uh hi.
14-15 Topa thutang hi ci-a a lah nadingin amaute teek napi-in gah lailai uh a, amaute tui kiuhkeuh-in hing sitset uh hi; amah ka Suangpi hi a, ama sungah thuman lohna om lo hi.