Late 132
1-5 Topa aw, David na ngaihsutna in a gim thuaknate khempeuh leh, amah in, “Jakob’ Vanglian Pa’ teen’ nading mun, Topa’ ading mun ka muh matengin ka inn sungah ka tum kei ding a, ka lupna ka zuan kei ding hi; ka ihmu kei ding a, ka mitkhute ka kikhupsak kei ding hi,” ci-in Jakob’ Vanglian Pa’ tungah hong thuciamna leh Topa’ tungah hong kiciamnate phawk in.
6 En un, Jaar gam sungah ka mu uh hi; cihna thuthak Ephrathah-ah kiza hi.
7 “Ama omna mun-ah va pai ni; ama khe-ngakna-ah va bia ni!”
8 Topa aw, tho in la a vanglian na thuciamna singkuang tawh na omna munah hong pai in.
9 Nangma siampite in diktatna puan silh uh hen la, na misiangthote lungdamin awng ta uh hen.
10 Na nasempa David tungah thu na ciam zo hi; na sathau nilhpa nial kei in.
11 Topa in a pelh loh ding kiciamna taktak khat David tungah a ciam a, “Nang sung pan-a na tate khat na kumpi tokhom tungah ka koih ding hi.
12 Na tate in, amau tunga ka hilh ding ka thuciamna leh ka teci pan’nate a zuih uh leh, amau’ tate zong na kumpi tokhom tungah tu paisuak ding uh hi,” na ci hi.
13 Bang hang hiam cih leh Topa in Zion teel khin zo a, amah in tua mun pen ama teen’ nadingin a deih hi.
14 “Hih in ka om tawntung nading mun ahi hi; deih ka hih manin hih lai munah ka teeng ding hi.
15 Ama beem-le-pang thupha tampi ka pia ding a, a mizawngte, an ka vak kham ding hi.
16 Ka hotkhiatna thu, a siampite ka taangko sak ding a, a mi siangthote lungdamin la sa-in awng ding uh hi.
17 Keimah in tua lai-ah David’ suan-le-khakte kumpi lian-in ka koih ding a, ka sathau nilhpa’ ukna ka kipsak ding hi.
18 Ama galte maizumna tawh ka kidimsak ding a, ahih hangin ama kumpigam khangin zai semsem ding hi,” na ci hi.