FILIPPI
(Philippians)
1
1 Khazih Zeisu’ silate ahi uh Paul leh Timoti in Filippi khua-ah a om pawlpi siate leh upate-a kipan Khazih Zeisu sungah kip-a a om misiangthote khempeuh thu kong zasak uh hi.
2 I Pa Pasian leh Topa Zeisu Khazih kiang pan hehpihna thupha leh nopna in note tungah om ta hen.
3-5 Keimah in thu ka nget simin lungdamna tawh note khempeuh ading thungen tawntungin, note in a kipatcil-a kipan tu dongin Lungdamna Thu khan’sakna-ah na kipawl khopna uh thu ka ngaihsut ciangin, Pasian’ hehpihna ka phat hi.
6 Tua bang ka phatna-ah note tungah a pha nasep hong panpa in Zeisu Khazih’ Ni dongin a kicingin hong bawlin, hong zosak ding hi ci-in ka lungkim hi.
7 Note khempeuh ading tua bang lungsim ka neih ding a kilawm hi. Bang hang hiam na cih uh leh, note khempeuh in keimah tawh thupha na ngah khawm uh a, keima thongkiatna-ah ahi zongin, Lungdamna Thu lamah hutna leh kipsakna-ah ahi zongin nong huh uh a, tua thu hangin note kong phawk tawntung hi.
8 Keimah in note khempeuh Khazih Zeisu’ hehpihna tawh bang zah takin kong ngaihna thu Pasian in keima teci ahi hi.
9-11 Note in ahoih apha nate na theih nadingun, theihna apawlpawl khempeuh hangah na ki-itna uh khangin a kicin’ nadingin ahi zongin, Pasian minthan’ nading leh phat nadingin, Zeisu Khazih hangah dikna’ gah tawh dimin, Khazih’ Ni dongin na lungsim uh a siangtho leh genbaang lo ahih nadingin ahi zongin note ading thu kong ngetsak hi.
12 Ute naute aw, keimah tungah hong tung nate in Lungdamna Thu khaam lo tham loin, a khangsak zaw hi ci-in na theih nadingun ka deih hi.
13 Tua ahih ciangin ka thongkiatna in Khazih hang ahi hi cih kumpipa a vil galkap khempeuh-a kipan midangte lakah a kilang hi.
14 Topa sungah a om ute naute lak pan a tampite in kei thuak khau kikhihna hangin thu-upna ah lungkimin lau loin, Pasian’ Thu a hilh ngam semsem uh hi.
15 Mi kimkhatte in ki-en’na lungsim leh kitotna lungsim tawh Khazih’ thu a hilh uh hi.
16 Keimah in Lungdamna Thu hu dingin hong kikoih ka hihna thu kimkhatte in thei-in, ki-itna lungsim tawh a hilh uh hi.
17 Kimkhat ahih uh leh, lungsim siangtho nei lo uh a, kihenna ka thuak lai takin hong gimsak behlap nuamin hanciam uh a, kitotna lungsim tawh Khazih’ thu a hilh uh hi.
18 Tua bang ahih ciangin bang ci bang hiam? Kheemna tawh hi taleh, dikna tawh hi taleh bang ci bangin thuhilh ahi zongin Khazih thu a hilh uh hi. Tua ahih ciangin keimah in ka lungdam a, tunung ciangin zong ka lung a dam lai ding hi.
19-20 Bang hang hiam na cih uh leh, keimah in bangmah maizum loin, launa om loin, Khazih’ minthan’na ka pumpi sungah ka kilatsak tawntung mah bangin tu-in zong ka hing ahi zongin, ka si ahi zongin a kilang ding hi ci-in nakpi-in ka lamet mah bangin, note’ thungetna hang ahi zongin, Zeisu Khirs’ Kha Siangtho huhna hang ahi zongin, ka gimnate in kei hong gupna thu ahi hi ci-in ka thei hi.
21 Kei ka nuntakna in Khazih ahi hi; si leng a hoihzaw ding hi.
22 Ahih hangin ka pumpi sungah nungta-in, tua nuntakna in ka nasepna-ah gah a pian’sak ding leh, ka teel ding ka thei kei hi.
23 Thu nih kikal ah cih nading meel thei loin ka om hi. Pai-in Khazih tawh ka om ding ka lunggulh hi. Bang hang hiam cih leh, keima adingin a phazaw mahmah ding hi.
24 Ahih hangin ka pum sungah om leng nomau ading a phazaw ding hi.
25-26 Tua bangin pumpi cidamin ka om ding um ka hih ciangin nomau omna-ah khatvei ka hong pai ding maninah, note in Khazih Zeisu sungah keimah hangin lungdam kisathei zaw-in na om nadingun, note in upna-ah khangin na lungdam nading uh, kei in pumpi sungah omin note khempeuh tawh omkhawm nading thu ka ngah ding hi ci-in ka thei hi.
27 Note in galte hangin lau loin, lungsim kha khatah kipin, Lungdamna Thu tawh kipawl upna ading, lungsim kituakin na hahkatna uh, ka hong tun’ ciangin note tawh kimu-in ahi zongin, a kikhenin i om ahi zongin ka zak theih nadingin Khazih’ Lungdamna Thu tawh akilawm akituakin gamtat ding na hanciam un.
28 Tua bangin galte hangah lau lohna in amaute’ adingin kisiat nading lim ahi hi; note’ adingin ahih leh, Pasian’ vaihawmna bangin gupna lim ahi hi.
29-30 Bang hang hiam na cih uh leh, note in ni danga na muh uh bangin, tu-in na zak uh bangin ka thuak galdona bangin, note in zong na thuak uh ahih ciangin Khazih upna bekah hi loin, ama hanginah gimna thuak nading zong thu na ngah uh hi.