1 Topa in Moses kiangah, 2 “Israel mite tungah ka piak Kanaan leitang a vaan dingin mi sawl in; amaute lakah makai ahi, nam khat sung panin mi khat ciat sawl in,” a ci hi. 3 Tua ahih ciangin Moses in Topa’ thupiakna tawh kizui-in Paran gamlak panin Israel mite lutang ahi mi khempeuh a sawl hi. 4 Hihte in amaute’ min ahi hi: Reuben minam panin Zakkur’ tapa Shamua; 5 Simeon minam panin Hori’ tapa Shafat; 6 Judah minam panin Jefunneh’ tapa Kaleb; 7 Issakhar minam panin Josef’ tapa Igal; 8 Efraim minam panin Nun’ tapa Hoshea; 9 Benjamin minam panin Rafu’ tapa Palti; 10 Zebulun minam panin Sedi’ tapa Gaddel; 11 Josef minam (Manasseh minam) panin Susi’ tapa Gaddi; 12 Dan minam panin Gemalli’ tapa Ammiel; 13 Asher minam panin Mikhael’ tapa Sethur; 14 Naftali minam panin Vofsi’ tapa Nahbi; 15 Gad minam panin Makhi’ tapa Ge-uel ahi hi. 16 Hihte in gam vaan dinga Moses in a sawl mite’ min ahi hi. Moses in Nun’ tapa Hoshea pen Joshua ci hi.

17 Moses in Kanaan gam vaan dingin amaute sawl a, amaute kiangah, “Negeb gam gal khatah pai to-in, mual tung gamah paito un la, 18 leitang bang ci hiam, tua leitangah a teeng mite thahat hiam, thanem hiam, amaute tawm hiam, tam hiam, 19 amau’ ten’na gam in nuntak olna gam hiam haksatna gam hiam, amaute’ ten’na khuapite in giahphual hiam, mun muanhuai hiam, 20 a leitang a lei hoih hiam lei sia hiam, sing om hiam om lo hiam va thei un. Na siam tawp-un va hih un la, tua leitanga gah pawl khat hong ciahpih un,” a ci hi. Tua hun in leenggah a palte a min hun ahi hi.

21 Tua ahih ciangin amaute pai to-in Zin gamlak panin Hamath khua lutna gei, Rehob mun dong gam vaan uh hi. 22 Amaute Negeb lamah paito uh a, Hebron tung uh hi; Anak’ suan leh khakte ahi Ahiman mite, Sheshai mite leh Talmai mite, tua lai-ah na om uh hi. (Hebron pen Izipt gamah Zoan a kisat ma kum sagih lai-in kisat hi). 23 Amaute Eshkol Kuam tung uh a, tua lai panin leenggah bawk khat bek a hiang tawh lo-in, mi nih in zawl khat-in zawng uh hi; amaute in mang kawlsing leh thei zong tawm khat pua uh hi. 24 Tua lai panin Israel mite in leenggah bawk a lawhna hangin tua mun pen Eshkol Kuam kici hi.

25 Ni sawmli a cin’ ciangin gam vaanna panin amaute hong ciahkik uh hi. 26 Paran gamlak Kadesh muna Moses leh Aaron leh Israel mi honte khempeuh kiangah amaute hong tung uh hi; amaute leh mihon khempeuh tungah thu puak kik uh a, tua leitanga gahte amaute lak uh hi. 27 Amaute in ama kiangah, “Kote nong sawlna leitangah ka va tung uh hi; tua lai-ah bawngnawi leh khuaizu luang a, hih in tua gama gah ahi hi. 28 Ahi zongin tua gama teeng mite thahat uh a, a khuapite uh kulh tawh ki-uumin lian mahmah hi; tua banah Anak’ suan leh khakte tua lai-ah ka mu uh hi; 29 Amalek mite Negeb gamah teeng uh hi; Hih mite, Jebus mite, leh Amor mite mual tung gamah teeng uh hi; Kanaan mite tuipi gei leh Jordan dungah teeng uh hi,” ci-in gen uh hi.

30 Ahih hangin Kaleb in Moses mai-ah mite gamdai sakin, “Thakhatin pai to-in va luah ni; bang hang hiam cih leh eite pen a zo thei mahmah ding i hi hi,” a ci hi. 31 Tua ciangin amah tawh a paito mite in, “Mite do dingin i pai ngam kei ding hi; bang hang hiam cih leh eite sangin amaute hatzaw uh hi,” a ci uh hi. 32 Tua ahih ciangin amaute in amau’ vaansa gam thu Israel mite tungah a sia lamin hong puak uh a, “Kote in a vaan dingin ka va paina uh gam in a tunga teeng mite a valhtum thei ding gam ahi hi; tua lai-a ka muh uh mite khempeuh mi tha liante ahi hi. 33 Tua lai-ah Nefilim mite (Nefilim pana hong piang Anak mite) ka mu uh hi; kote pen kauphe bang lelin ka kingaihsun uh a, amau’ muhna ah zong tua bangmah ka hi uh hi,” a ci uh hi.