MIKAH
(Micah)
1
1 Judah gam kumpi Jotham, Ahaz, leh Hezekiahte’ hun laitakin, Moresheth khuami Mikah tungah Topa in hih bangin thupia hi. Samaria leh Jerusalem tawh kisai-in Topa in Mikah tungah hih thute lak hi.
2 No minam khempeuhte aw, hih thu za un. Leitunga teeng mi khempeuh aw, hih thu ngai un. Note’ lang khatah Topa Pasian in teci pang a, a vantung biakinn panin thu hong gen hi.
3 Ama mun siangtho panin Topa hong pai a, amah in leitung mualsang dawnte hong siksuk ding hi.
4 Meikhuk sunga khuainun kikoih bangin, ama khe nuai-ah mual liante tuisuak ding a, mual tung panin tui a luan’sak bangin, guam sungah tua mualte luang suk ding hi.
5 Pasian tungah Israelte’ mawhna leh khialhna hangin hih thute khempeuh piang hi. Israelte’ khialhna kua ngawh ding i hi hiam? Samaria mite ngawh ding ahi hiam? Judah gam sungah milim bia-a khial kua ahi hiam? Jerusalem mite ahi hi.
6 Tua ahih ciangin Topa in hih bangin ci hi: Samaria khuapi, gamlaka ninkholna mun, leenggui suan’na mun lel dingin ka bawl ding hi. A khua sunga suangte zong guam sungah ka nil suk ding a, a khuapi bulpite ka dawksak ding hi.
7 A milim manphate khempeuh kisuzanin, mei tawh kisusia ding hi. Pasian tungah a thuman lohna hangun mihingte in hih milimte nei uh ahih manun, a paktatna uh tawh kizui-in tu-in thuak kik ding uh hi, ci hi.
8 Tua ahih manin kei kapin ka thuum ding a, ka dahna thu ka lah nadingin khe guak leh guaktangin ka vak ding hi. Gam-ui bangin ka ham ding a, kalaoh-vasa bangin ka tau ding hi.
9 Bang hang hiam cih leh Samaria’ meima kidamsak thei lo a, Judah in zong tua bangmah a thuak ding ahi ta hi. Ka mite’ teen’na Jerusalem khua kongpi mahmah, tua siatna in hong ban ta hi.
10 I guallelhna, Gath khuamite theisak kei un la, na kahna uh amaute musak kei un. Bethle-afrah khua sungah na lungkhamna uh langsakin, leivui lakah kikhuk un.
11 Shafir khua-a teeng mite aw, guaktangin maizumna tawh salin pai un. Za-anan khua-a teeng mite, a hingin paikhia ngei lo ding hi. Beth-ezel khuamite kahna leh thuumna na zak uh ciangin, tua khua sungah belh ding munmuanhuai a om lohna na thei ding uh hi.
12 Topa in Jerusalem kulh kongpi ciang dongah, gimna lianpi tungsak ta ahih manin Maroth khuamite in thuhoih lamenin gim uh hi.
13 Lakhish khua-a teeng mite aw, na sakol galkapte uh a leng bulh pak un. Note in Zion tanute’ khialhna teng zui kha na hih manun, Jerusalem zong a khialsakte na hi uh hi.
14 Tu-in no Judah mite aw, Moreseth-gath khua, mangpha khak un. Israel kumpite tungah Akzib khua in a zuauthei khat ahi hi.
15 Mareshah khuamite aw, note a hong zo dingpa ka hong paisak ding hi. Topa in ci hi. Adullam leihawm sungah Israel kumpipa bu ding hi.
16 Judah mite aw, na it mahmah uh na tate uh, sal-in hong kilaksak ding ahih manin, amaute hangin na dahna lim-un na sam uh met un la, musane bangin na lu uh tolsak un.