10
1 Tu-in Aaron’ tapate Nadab leh Abihu in amau’ paknamtui beel tuak la-in, tua sungah mei koih uh a, a tungah paknamtui koihin, amah in amaute’ tungah tua banga thu a piak ngei loh a siangtho mei Topa’ mai-ah pia uh hi.
2 Topa’ omna mun panin mei hong pai khia-in amaute kang a, Topa mai-ah a si uh hi.
3 Tua ciangin Moses in Aaron’ kiangah, “Topa in ‘Ka kiang nai-a a omte kiangah keimah a siangthoin ka kilak ding a, mite khempeuh mai-ah keimah hong kiminthangsak ding hi,’ a ci hi,” ci-in a gen hi. Aaron pau loin om hi.
4 Moses in Aaron’ pa’ sanggampa Uzziel tapate Mishael leh Elzafan sam a, amaute kiangah, “Hong pai un la, biakinn mai panin giahphual pua lamah na sanggamte uh puakhia un,” a ci hi.
5 Tua ahih ciangin amaute in hong nai-in, Moses’ cihsa bangin giahphual pua lamah amau’ puantungsilh mah uh tawh amaute puakhia uh hi.
6 Moses in Aaron leh a tapate Eleazar leh Ithamar kiangah, “Na lu uh a, na sam uh phiahsak kei un la, na puante uh balkeek kei un, na hih uh leh note si-in, mihonte khempeuh tungah Topa’ hehna hong tung ding hi; ahih hangin na sanggamte uh, Israel innkuan buppi pen, Topa’ tawhkuangsa mei katna hangin thuum thei ding uh hi.
7 Kikhopna buk kong panin a pua lamah paikhia kei un, na pai uh leh na si ding uh hi; bang hang hiam cih leh Topa’ nilh sathau note tungah om hi,” a ci hi. Moses’ gen bangin amaute gamta uh hi.
8 Topa in Aaron kiangah,
9 “Nang hita leh na tapate hita leh kikhopna bukah na pai uh ciangin leenggahzu hita leh kham theih zu hita leh dawn kei un, na dawn uh leh na si ding uh hi; tua in na suan na khakte tungah khang tawntungin ngeina kip khat hi ding hi.
10 Note in a siangtho leh a mawkmawk, leh a nin leh a siang a khen ding na hi uh hi;
11 Topa in Moses’ tung tawnin amaute tunga a gensa thukhamte khempeuh note in Israel mite a hilh ding na hi uh hi,” a ci hi.
12 Moses in Aaron leh a om lai a tapate Eleazar leh Ithamar kiangah, “Topa tungah meihal biakna sung panin a val lai ahi an tawh biakna la un la, tua in a siangthopen ahih manin silngo sawhlohin biakna tau gei-ah ne un;
13 tua in Topa tungah meihal biaknate lak panin nang leh na tapate’ kaih ding ahih manin a siangtho mun khatah na ne ding uh hi; tua bang ding mahin kei tungah thu hong kipia hi.
14 Ahih hangin a kiveii a iik leh a kipia a pheite pen nang leh na tapate leh na tanute in a siangtho mun khatpeuhah na ne ding uh hi; bang hang hiam cih leh tuate pen Israel mite in thunuam-a a biakpiakna panun nang leh na tapate’ kaih dinga hong kipia ahi hi.
15 Topa in a thupiaksa bangin kipia a phei leh a kiveii a iikte ahih leh Topa’ mai-ah veii-a biakna-in veii dingin amaute in meihal biakna sathau tawh hong paipih ding uh a, tua in nang leh na tapate in a tawntungin na kaih ding uh ahi hi,” a ci hi.
16 Tu-in Moses in khialhna hanga biakna keel tawh kisai lim takin kan a, en un, na kihal mawk hi. Aaron’ tapate a om lai Eleazar leh Ithamar tungah amah heh a,
17 “Note in mihonte’ adingin Topa mai-ah kilemna bawlin, amau’ mawhna a pua dingin note tungah hong kipiasa a siangtho sa pen khialhna hang a biakna hi napi, bang hangin biakinn ah ne lo na hi uh hiam?
18 En un, biakinn sungah a sisan kipaipih lo hi. Ka thupiaksa bangin note in biakinn sungah na nek ding uh a kilawm ahi hi,” a ci hi.
19 Aaron in Moses kiangah, “En in, tu ni-in amaute in Topa mai-ah amau’ khialhna hanga biakna leh amau’ meihal biakna pia khin zo uh hi; tua bang hi napi hih bang nate kei tungah hong tung veve hi. Khialhna hanga biakna tu ni-in a ne hi leng, Topa’ muhna ah san’ huai ding ka hi hiam?” a ci hi.
20 Moses in tua thu a zak ciangin a lungkim hi.