10
1 Joshua in Ai a lakna zia, leh Jerikho leh a kumpipa tungah a bawl bangin Ai leh a kumpipa tungah a bawlna, leh Gibeon khua sunga teeng mite in Israel tawh kilemna a bawlna leh amaute lakah a omna thu Jerusalem kumpipa Adonizedek in a zak ciangin,
2 nakpi takin a lau hi; bang hang hiam cih leh Gibeon in kumpi khuate khat mah bangin khua lian khat hi a, Ai khua sangin zong lian zaw-in a mite khempeuh zong mi thahat ahi hi.
3 Tua ahih ciangin Jerusalem kumpipa Adonizedek in Hebron kumpipa Hoham kiang, Jarmuth kumpipa Piram kiang, Lakhish kumpipa Jafia kiang, leh Eglon kumpipa Debir kiangah kamtai sawlin,
4 “Kei kiangah hong pai un, hong huh un la, Gibeon vat gawp ni; bang hang hiam cih leh Joshua leh Israel mite tawh kilemna bawl khin uh hi,” a ci hi.
5 Tua ciangin Amor kumpi ngate, Jerusalem kumpi, Hebron kumpi, Jarmuth kumpi, Lakhish kumpi, leh Eglon kumpite in a galkapte khempeuh uh gawmin a galkapte khempeuh uh tawh paito-in Gibeon lang khatah phual satin do uh hi.
6 Tua ciangin Gibeon mite Gilgal-a giahphual-a Joshua kiangah kamtai sawl-in, “Na nasemte hong nusia kei in; manlang takin ko kiangah hong paito-in, kote hong hon in la, hong huh in; bang hang hiam cih leh mualtung gam-a teeng Amor kumpite khempeuh kote lang pangin kikhawm uh hi,” a ci uh hi.
7 Tua ahih ciangin Gilgal panin amah leh galhang mite khempeuh leh a thahat mi khempeuh tawh Joshua paito hi.
8 Tua ciangin Topa in Joshua kiangah, “Amaute na khut sungah hong pia khin ka hih manin amaute kihta kei in; amaute khat beek in nang hong nang zo lo ding uh hi,” a ci hi.
9 Tua ahih ciangin Gilgal panin zan tawntungin paito-in Joshua in thakhat thu-in amaute sim gawp hi.
10 Topa in Israelte mai-ah amaute am gawp sakin, amaute in Gibeon-ah amaute tampi tak that uh a, Bethhoron paitohna lampi-ah amaute delhin, Azekah leh Makkedah ciang dong amaute vatgawp uh hi.
11 Israelte mai-ah amaute a tai laitak, Bethhoron paitohna-ah a paisuk lai takun, Topa in vantung panin gialpi lianpite Azekah khua ciang dong, amaute tungah lawnsuk a, amaute si uh hi; Israel mite in namsau tawh a thah sangin tua gialpi hanga a si mi tam zaw hi.
12 Tua ciangin, Topa in Israel mite tungah Amor mite a piak ni-in Joshua in Topa tungah thu gen hi; amah in Israelte’ muhna-ah,
“Ni aw, Gibeon ah, nang kha aw, Aijalon kuam ah ding cip in,” a ci hi.
13 Tua ciangin minamte in a galte phu a lak khit mateng ni ding cipin kha khawl hi. Hih in Ja-shar’ Laibu sungah kigelh hilo ahi hiam? Van kim lai-ah ni khawlin ni khat bup ding bang tumsuk pak lo hi.
14 Tua hun ma hita leh tua hun khit hita leh Topa in mi khat’ thu a ngaih tua ni bang ni dang om lo hi; bang hang hiam cih leh Topa in Israel mite adingin dosak hi.
15 Tua ciangin Joshua, amah tawh a om Israelte khempeuh tawh Gilgal-a giahphual-ah ciahkik hi.
16 Hih kumpi ngate tai-in Makkedah leihawm sungah bu uh hi.
17 Tua ciangin Joshua kiangah, “Kumpi ngate Mekkedah leihawm sungah a bu kimu khin hi,” ci-in kigen hi.
18 Tua ciangin Joshua in, “Suangtum lianpite leihawm gong lik nelh un la, a cing dingin a gei-ah mi koih un;
19 ahih hangin note tua lai-ah om kei un, na galte uh delhin a nungdalte bawh un la, a khuapi sung uh ah amaute lutsak kei un; bang hang hiam cih leh Topa na Pasian un note khut sungah amaute hong pia zo hi,” a ci hi.
20 Joshua leh Israel mite in amaute a bei siang dongin tampi tak a thah khit ciang, leh a suakta lai mite amau’ khuapi muanhuai sungah a tum khit uh ciangin,
21 Makkedah giahphual Joshua kiangah mi khempeuh ci damin ciahkik uh hi; Israel mite khat peuh a paupih ngam kuamah om lo hi.
22 Tua ciangin Joshua in, “Leihawm gong hong un la, leihawm panin tua kumpi ngate kei kiangah hong pai khiatpih un,” a ci hi.
23 Amaute in tua mah bangin hih uh a, leihawm panin tua kumpi ngate, Jerusalem kumpi, Hebron kumpi, Jarmuth kumpi, Lakhish kumpi, leh Eglon kumpite, ama kiangah paipih uh hi.
24 Amaute in Joshua kiangah tua kumpi ngate a pai khiatpih uh ciangin, Joshua in Israel mi khempeuh samin, amah tawh a kuan khawm galkap mangte kiangah, “A nai-ah hong pai un la, hih kumpite ngawngah na khe uh nga un,” a ci hi. Tua ciangin amaute a nai-ah hong pai-in, a khe uh amaute ngawng tungah nga uh hi.
25 Joshua in amaute kiangah, “Lau kei un la, lungkia kei un; thakhauh un la, hang un; bang hang hiam cih leh note' do na gal khempeuhte uh tungah Topa in hih bangin bawl ding hi,” a ci hi.
26 Tua khit ciangin Joshua in amaute satin si sak a, singkung nga tungah amaute khai hi. Amaute in nitak dong sing tungah khai uh hi;
27 ahih hangin ni a tum hun ciangin Joshua in thu pia a, amaute in sing tung panin la khia sukin, amaute a buknasa leihawm sungah lawnsuk uh a, tu ni mahmahin a om lai ahi suangtum lianpite leihawm gongah koih uh hi.
28 Tua ni-in Joshua in Makkedah khua la a, namsau tawh tua khua leh a kumpipa vatgawp hi; a sunga om mi khempeuh susia mangin, kuamah siit lo hi; Jerikho kumpipa tungah a bawl bangin Makkedah kumpipa tungah a bawl hi.
29 Tua ciangin Joshua, amah tawh a om Israelte khempeuh tawh Makkedah panin Libnah-ah paisuak uh a, Libnah khua sim uh hi;
30 Topa in tua khua leh a kumpipa zong Israel mite’ khut sungah pia hi; amah in namsau tawh tua khua leh a sunga om mi khempeuh vatgawp hi; tua khua sungah kuamah siit lo hi; Jerikho kumpipa tungah a bawl bangin a kumpipa tungah bawl hi.
31 Tua ciangin Joshua, amah tawh a om Israelte khempeuh tawh Libnah panin Lakhish-ah paisuak uh a, tua khua umcihin sim uh hi;
32 Topa in Israel mite khut sungah Lakhish pia a, amah in a ni nih ni-in la-in, Libnah a bawl bangin tua khua leh a sunga om mi khempeuh namsau tawh vatgawp hi.
33 Tua ciangin Lakhish a huh dingin Gezer kumpipa Horam hong kuanto hi; amaute khat zong a om nawn lo dongin Joshua in amah leh a mite vatgawp hi.
34 Tua ciangin Lakhish panin Eglon-ah amah tawh a om Israelte khempeuh tawh Joshua paisuak uh hi;
35 tua ni mahin tua khua la uh a, namsau tawh vatgawp uh hi; Lakhish a hih mah bangin tua khua sunga om mi khempeuh tua ni-in amah in susia mang hi.
36 Tua ciangin Joshua, Israelte khempeuh tawh Eglon panin Hebron-ah paito hi; amaute in tua khua simin,
37 la-in, namsau tawh tua khua leh a kumpi leh a kiima khuapite, leh a sunga om khempeuh vatgawp hi; Eglon tungah a bawl bangin amah in kuamah siit lo a, tua khua leh a sunga om khempeuh susia mang hi.
38 Tua ciangin Joshua, Israelte khempeuh tawh Debir-ah kihei kikin tua khua sim hi;
39 amah in a kumpipa leh a khuapite khempeuh tawh tua khua la hi; namsau tawh amaute in vatgawp uh a, a sunga om mi khempeuh amaute in susia mang uh hi; amah in kuamah siit lo hi; amah in Hebron leh Libnah leh a kumpipa tungah a bawlsa bangin Debir leh a kumpipa tungah bawl hi.
40 Tua ahih ciangin Joshua in gam khempeuh, mualtung gam leh Negeb gam leh lei niamna mun leh mual pangsuk, leh a kumpite khempeuh zo hi; amah in kuamah siit lo a, Israelte Topa Pasian’ thu piaksa bangin husang khempeuh susia mang hi.
41 Joshua in amaute Kadesh-barnea panin Gaza ciang dong, leh Goshen gam khempeuh Gibeon ciang dong zo gawp hi.
42 Israelte’ Topa Pasian in Israelte adingin dosak ahih manin Joshua in hih kumpite khempeuh leh amau leitang hun khat sungin la khin hi.
43 Tua ciangin Joshua, amah tawh a om Israel khempeuh tawh Gilgal-a giahphual-ah ciahkik hi.