1 Topa’ nasem Moses a sih khit ciangin Topa in Moses’ nasem ahi Nun’ tapa Joshua kiangah, 2 “Ka nasempa Moses si ta hi; tua ahih ciangin tu-in ding in la, nang leh hih mite khempeuh, hih Jordan kantanin Israel mite tungah ka piak gam sungah pai un. 3 Moses tungah ka ciam bangin na khe in a totna mun khempeuh nang tungah kong pia ding hi. 4 Gamlak leh hih Lebanon panin gun lianpi ahi Eufrates gun dong, ni tumna lam-a Tuipi lian lam, Hit mite’ leitang khempeuh nangma gam hi ding hi. 5 Na nuntak sung tawntung kuamah in na mai hong khak zo lo ding hi; Moses tawh ka om mah bangin nang tawh zong kong om ding hi; nang kong tamasak kei ding a, kong nusia kei ding hi. 6 Thahat in la hang in; bang hang hiam cih leh amaute piak dingin a pate uh tungah ka ciam leitang hih mite na luahsak ding hi. 7 Thahat-in hang in la, ka nasempa Moses in nang hong piak thukhamte khempeuh tawh kizui-in na gamtat ding lim takin ngaihsun in; na paina peuhah hoih takin na lamzan’ theihna dingin tak lamah ahi a, vei lamah ahi zongin pial kei in. 8 Hih thukham laibu na mangngilh ngei kei ding hi. A sunga a kigelh thute khempeuh tawh kizui-in na gamtat theihna dingin sun leh zanin na lungngaingai ding hi; tua hi leh na lampi mavang ding a, na nasep tangtung ding hi. 9 Thu hong pia khin hilo ka hi hiam? Thahat in la hang in; lau kei in la, lungkia kei in; bang hang hiam cih leh na paina peuhpeuhah Topa na Pasian nang tawh hong om hi,” a ci hi.

10 Tua ciangin Joshua in mite’ uliante thu pia-in, 11 “Giahphual-ah pai un la, mite thu pia-in, ‘Na lam-an ding uh kiging khol un; bang hang hiam cih leh Topa na Pasian un na neih dingun note hong piak leitangah pai-in a luah dingin ni thum sungin hih Jordan a galkah ding na hi uh hi,’ ci un,” a ci hi.

12 Tua ciangin Joshua in Reuben mite, Gad mite, leh Manasseh minam a langte tungah, 13 “Topa’ nasem Moses in note thu hong piakna kammal, ‘Topa na Pasian un note tawlngakna mun hong pia-in, hih leitang note hong pia ding hi,’ a cihna thu phawk un. 14 Moses in Jordan gal khata note hong piak leitangah na zite, na taneute, leh na ganhingte uh a na om ding uh hi; ahih hangin note lakah galhang mi khempeuh in hiam tawi-in Jordan kantanin na sanggamte uh mai-ah pai-in, 15 note hong piak bangin Topa in na sanggamte uh tungah tawlngakna pia-in, Topa na Pasian un amaute a piak leitang amaute in zong a luah mateng na huh ding uh hi; tua ciangin note’ neih leitangah ciah kikin, Topa’ nasem Moses in Jordan gal ni suahna lamah note hong piak leitang na luah ding uh hi,” a ci hi. 16 Amaute in Joshua dawngin, “Kote nong thupiak khempeuh ka hih ding uh a, nong sawlna peuhpeuhah ka pai ding uh hi. 17 Na khempeuhah Moses’ thu ka man’ uh mah bangin nangma thu zong kong mang ding uh hi. Moses a ompih mah bangin Topa na Pasian in nang hong ompih ta hen! 18 Na thupiakna leh na thute, na thupiak peuhpeuh hong langpangin a mang lo mipa kithat ding hi. Thahat in la hang in,” a ci uh hi.