46
1 Gamdangte’ thu tawh kisai-in Topa in Jeremiah hopih hi.
2 Josiah’ tapa Jehoiakim, Judah gamah kumpi a suah zawh kum li a phak hunin Babilon kumpipa Nebukhadnezzar in Eufrates gun gei Karkhemish khua-ah Izipt kumpipa Faro Neko simin a zo hi. Izipt kumpipa’ galkapte tawh kisai-in hih bangin a hopih hi:
3 “Na lumte uh la un la, galsim dingin kuankhia un!
4 Sakol vante vawh un la, tuang ta un, sakol galkapte aw. Na sik lukhute uh khu un la, na teipite uh tat hiam-in, na sik puante uh silh un.
5 A bangci mawk a hia? Amaute lungmangin lah a nungkik ta uh-a! A galkapte uh kileh hawl a, lau-in taikek mang mawk uh hi. Kinunglehhei kik lo uh hi, mun khempeuh ah launa vive! Topa in a ci hi.
6 A manlang pente zong paikhia thei tuan lo uh a, galkapte zong suakta lo uh hi. Leilu lam Eufrates gun geiah, hoi-in a tuk uh hi.
7 “Nail gunpi bangin hong khang a, guntui khang a bang kua ahi hiam?
8 Nail gunpi bangin Izipt gam hong khang a, guntui khang hong bang hi. Amah in, kei ka khang ding a, leitung khempeuh ka tuam ding hi. Khuapite leh a sunga teeng mite ka susia ding hi, a ci hi.
9 Sakolte aw, mai nawt un, sakol leengte aw, hat un! Lum tawi Ethiopia mite leh Put mite aw, thal tawisiam Lud mite aw, na galkapte uh kuan sak un.
10 Bang hang hiam cih leh tu ni-in a vanglian Topa Pasian’ ni hi a, phu a lak kik ni, a galte a thuhkik ni ahi hi. Namsau in amaute that ding a, a kham mateng a si uh a dawn ding hi. Bang hang hiam cih leh a vanglian Topa Pasian in, Eufrates gun gei leilu lamah amaute biakna piakna-in a nei hi.
11 Gilead gamah pai un la, damna zatui va la un, Izipt-te’ nungakte aw! Zatui tampi na zat khit uh hangin, damna na ngah kei uh hi.
12 Gamdangte in na zum huaina uh hong za khin uh a, leitung bup-ah na kahna aw uh kiza hi. Na galkapte uh khat leh khat kiphu kha-in, a nihun a pukkhawm uh hi,” a ci hi,
13 Izipt gam sim dingin Babilon kumpipa Nebukhadnezzar’ hong paina tawh kisai-in Topa in kamsangpa Jeremiah hih bangin a hopih hi:
14 “Izipt gam leh Migdol khua-ah va gen un; Memfis khua leh Tahpanhes khua-ah va tangko un: ‘Kigalging sa leh kithawi sa-in om un, bang hang hiam cih leh namsau-in note hong kithat khin ding hi,’ va ci un.
15 Bang hangin na bawngtal pasian uh Apis guallel-in taimang ahi hiam? Topa in amah a vattuk hang ahi hi.
16 Na mi uh tampi tak hoi-in a tuk uh a, amaute in khat leh khat kiangah, ‘Kithawi dih un, i mipihte kiangah, i suahna gamah va paikik ni; tua hi leh hih namsau tawh kithahna pan i suakta ding hi,’ a kici uh hi.
17 Izipt kumpipa Faro, min thak khat pia un la, ‘Kam si bek-a hun mawk beisakpa’ ci un.
18 “A vanglian Topa keimah in Kumpipa ka hi hi. Taber mual in mual khempeuh sangin sang zaw-in Karmel mual in tuipi tungah sangpi-in a dawktoh bangin, no hong simpa’ thahatna a lian mahmah ding hi.
19 Sal-a hong kipaipih ciang ading na puanlomte uh, zial khol un, no Izipt gama teengte aw! Bang hang hiam cih leh Memfis khua in gamlak suak ding a, kisia-in kuamah teeng lo ding hi.
20 “Izipt gam in bawngla hoih mahmah tawh kibang hi. Leilu lam panin hong leeng cippi in amah a pet hi.
21 A galkap cialte nangawn amau lakah bawngno dawng hat lote a bang lel uh hi. Pangin do tentan lo uh a, nungkikin a tai kek uh hi. Bang hang hiam cih leh amau’ kisiat ding ni, amau’ daan thuak ding ni hong tung zo hi.
22 “A galte in do dingin hong kuan uh ahih manin Izipt mite in gul tai bangin zut khat a kisuah uh hi. A galte in sing phuk ding bangin, hei tawh hong kuan uh hi.
23 Gam pha lua-in a kiphut zawh loh hangin a galte un a singte uh a phukmai sak teitei ding uh hi, Topa in a ci hi. Bang hang hiam cih leh amaute kauphe sangin tamzaw uh a, sim zawh loh zahin tam uh hi.
24 Izipt-te’ nungakte a maizum ding uh hi, Leilu lam pana hong pai mite’ khut sungah, amaute a kipia ding hi,” a ci hi.
25 A vanglian Topa, Israel mite’ Pasian in: “En un, Keimah in Thebes khua-a Amon pasian leh Faro kumpipa-a kipan Izipt gam, a pasiante uh leh a kumpite uh, Faro kumpipa leh amah a muang mi khempeuh tungah daan ka tat ding hi.
26 Amaute a that nuam Babilon kumpipa Nebukhadnezzar leh a uliante’ khut sungah amaute ka pia ding hi. Tua khit ciangin Topa in kong cih-inah, nidang lai bangin Izipt gamah mi a teeng kik ding hi.
27 “Ahih hangin lau kei un, ka nasempa Jakob’ suante aw; patau kei un, Israel mite aw, Bang hang hiam cih leh gamlapi panin no kong honkhia ding a, na suan na khakte uh saltan’na gam panin kong honkhia ding hi. Jakob’ suante hong ciahkik ding uh a, nuam takin a teeng ding uh hi. Kuamah in amaute a lausak nawn kei ding hi.
28 Topa in kong cih-inah, ka nasem pa Jakob’ suante aw, lau kei un. Bang hang hiam cih leh note kong ompih hi. Note kong thehthangna gamte khempeuh ka susia khin ding a, ahih bangin note kong susia khin kei ding hi. A kilawm zahin kong thuhilh ding a, daantat loin kong mawk nusiat kei ding hi,” a ci hi.