1 Ni sagih lakah a kipat ni, khuavak ma zingtungin Magdala khua Mari hanah pai a, han kong khakna suang kilakhia zo-a om a mu hi. 2 Tua ahih ciangin tai mengmeng a, Piter leh Zeisu’ it nungzuipa kiangah tungin, “Han sung pan Topa’ luang a paikhiatpih zo uh hi. Koi lai takah a koih uh hiam ka thei kei hi,” ci-in a gen hi. 3 Tua lai takin, Piter leh adang nungzuipa paikhia uh a, han lamah a tai uh hi. 4 Amaute nih a kibangin a tai uh hi; ahih hangin adang nungzuipa in Piter makhelhin han a tung masa hi. 5 Amah kunsukin a sung a et ciangin dial puan a om a muh ciangin han sungah a lut kei hi. 6 Simon Piter in a nung zui a, a tun’ ciangin han sungah lut a; 7 dial puan a om hangin, a lu tunna puan tawh omkhawm loin a tuamtuak a, kizialin a om a mu hi. 8 Tua lai takin, han a tung masa adang nungzuipa zong han sungah lut a, a muh ciangin a um hi. 9 Bang hang hiam i cih leh, Zeisu in sihna pan thokik ding a cihna Lai Siangtho sungah a om thu a thei nai kei uh hi. 10 Tua ahih ciangin tua nungzuite amau innah a ciah uh hi.

11 Ahih hangin Mari in han pua lamah ding-in a kap hi. A kah lai takin kunsuk-in han sung en a, 12 vantungmi nih puanpak silhin Zeisu’ luang a kisialna a lu lam ah khat, a taw lam ah khat tu-a om a mu hi. 13 Amaute in, “Numei aw, bang hangin kap na hi hiam?” ci-a a dot uh ciangin Mari in, “Ka Topa a paikhiatpih zo uh a, koi-ah a koih uh cih ka thei kei hi,” a ci hi. 14 Tua banga a gen khit ciangin a nung lam a kihei leh, Zeisu ding-a om a mu hi; ahih hangin Zeisu a hih lam a thei kei hi. 15 Zeisu in, “Numei aw, bang hangin kap na hi hiam? Kua zong na hi hiam?” ci-in a dot leh, Mari in Zeisu pen huan cingpa a sak man-inah, “Topa aw, amah na paikhiatpih leh koi-ah na koih hiam hong gen in. Keimah in ka va la ding hi,” a ci hi. 16 Zeisu in, “Mari aw,” a cih ciangin Mari kihei a, Hebru kamin, “Rabboni aw,” a ci hi. Rabboni a khiatna in ‘Topa’ a cihnopna hi. 17 Zeisu in, “Hong len kei in. Bang hang hiam na cih leh, ka Pa kiangah ka kahto nai kei hi. Ka sanggamte kiangah pai in la, ‘Ka Pa ahi note’ Pa, ka Pasian ahi note’ Pasian kiangah ka kahto ding hi,’ ci-in amaute kiangah va gen in,” ci-in a sawl hi. 18 Tua mah bangin Magdala khua Mari zong pai a, “Topa ka mu zo a, tua thute hong gen zo hi,” ci-in a nungzuite kiangah a gen hi.

19 Ni sagih lakah ni kipat ni, a nitak ciangin Judah mite a kihtak man-unah a nungzuite in kikhopna-ah kongkhakte khakin a om uh a, tua sungah Zeisu hong lut a, amau lai zangah ding-in, “Nopna na ngah ta un!” a ci hi. 20 Tua bang a cih khit ciangin a khut leh a pang a lak hi. Tua nungzuite in Topa a muh uh ciangin a lungdam uh hi. 21 Zeisu in khatvei, “Nopna na ngah ta un, Pa in kei hong sawl bangin note kong sawl hi,” a ci kik hi. 22 Tua ciangin amaute tungah mut a, “Kha Siangtho na sang ta un. 23 Mi’ mawhna na maisak uh leh, tua mi’ mawhna kimaisak ding hi. Mi’ mawhna na maisak kei uh leh, tua mi’ mawhna kimaisak lo ding hi,” ci-in thu a pia hi.

24 Zeisu hong pai lai takin, sawm-le-nihte laka khat Didimas kici Thomas in amaute tawh a omkhawm kei hi. 25 Tua ahih ciangin nungzui dangte in, “Topa ka mu zo uh hi,” ci-in Thomas kiangah a gen uh ciangin amah in, “A khut a, sikkhetna pawn mu-in, sikkhetna pawn sung ka khutme tawh lawng a, ama pang zong ka khut tawh ka lawn’ kei leh, ka um kei ding hi,” a ci hi.

26 Tua nung ni giat ni ciangin, a nungzuite inn sungah khatvei kikhawm kik uh a, Thomas zong a om hi. Kongkhakte a kikhak lai takin Zeisu zong hong pai a, amau laizang ah ding-a “Nopna na ngah ta un,” a ci hi. 27 Tua lai takin Thomas kiangah, “Na khutmete zan in la, ka khut en in. Na khut zan in la, ka pang hong lawng in, um khial kei in la, um in,” a ci hi. 28 Thomas in, “Ka Topa leh ka Pasian aw,” a cih ciangin, 29 Zeisu in, “Nong muh man-inah um na hi hiam? Hong mu lo napi-in a um mite in thupha a ngah uh hi,” a ci hi.

30 Hih laibu sungah a kigelh lo lim dang tampi zong Zeisu in a nungzuite mai-ah a lak hi. 31 Zeisu in Khazih hi a, Pasian’ Tapa ahih note’n na up theih nading uh leh, ama min umin tua min hangin nuntakna na ngah theih nadingun hih laibu a kigelh zo hi.