1 Ka u ka naute aw, a minthang Topa ahi i Topa Zeisu Khazih upna thu-ah mi maitang zahtak tuam nei kei un. 2-4 Kham khutbuh bulh a, puanhoih a silh mi leh a kihhuai puansia a silh mizawngte, nih in na kikhopna inn sung uhah hong tumkhawm uh ciangin, puanhoih a silhpa enin, “Omna pha hih lai-ah na tu in,” ama kiangah na ci uh a, mizawngpa kiangah, “Hua lai-ah na ding in, a hih kei leh, ka khe ngakna kiangah tu in,” na cih uh leh, lang khatah maitang zahtak tuamna lungsim nei-in, ahoih lo hanciamna tawh thukhen mi suak hilo na hi uh hiam? 5 Ka it ka u ka naute aw, ngai un. Leitung mite mai-ah mizawngte in upna tawh a dim nading ahi zongin, Pasian in a it mite a thuciamna gam a luah nading ahi zongin, tua mite a teel hilo ahi hiam? 6 Note na hih uh leh, mizawngte na thudon kei uh hi. Sum haute in note hong bawlsia uh a, thukhenna tokhom mai-ah hong kai uh hilo ahi hiam? 7 Note hong kiphuahna min ngaih amaute in a gensia uh hilo ahi hiam?

8 “Na pumpi na it bangin na lawmte na it in,” a kici Thukham na zuih uh leh, a pha in na gamta zo uh hi. 9 Ahih hangin mi maitang zahtak tuam na neih uh leh, gitlohna a bawl mi na hi uh hi; thungai lo mi cihna Thukham in note tungah thu hong khen ding hi. 10 Bang hang hiam na cih uh leh, Thukham khempeuh a zuih hangin khatpeuh peuh a khial mi in, Thukham khempeuh a khial zo hi. 11 Bang hang hiam na cih uh leh, “Mi’ zi tungah na mawh kei in,” a cipa in, “Mi na that kei in,” ci-in a kham lai hi. Tua ahih ciangin nang in mi zi tungah na mawh loh hangin mi na thah leh, Thukham a khial mi na hi hi. 12 Suahtakna thu mah zui-in thukhenna a thuak ding mi bangin thu genin gamta un. 13 Bang hang hiam na cih uh leh, hehpihna a nei lo mi in, hehpihna ngah loin thukhenna a thuak ding hi. Hehpihna in thukhenna zoin a kisathei thei hi.

14 Ka u ka naute aw, mi khat in, “Upna ka nei hi,” a cih hangin ahoih a gamtat kei leh, bang phattuamna a om hiam? Tua upna in tua mi gumkhia zo ding ahi hiam? 15 Unau numei leh pasal khat peuhmah in puan nei loin omin ni sim an nek ding a neih loh ciangin, 16 note lakah mi khat in, “Nuam takin pai in la, na khua lum-in, gil vah in,” a cih hangin, tua mi pumpi tawh a kituak na zat ding a piak kei leh, bang phattuamna a om hiam? 17 Tua mah bangin gamtatna hoih om lo, upna in khat bek om a hih ciangin si-in a om hi.

18 Ahi hi, khat in, “Nangmah in upna na nei hi. Kei ka hih leh, gamtatna hoih ka nei hi: hong ci ding hi. Gamtatna hoih om lo na upna hong lak in. Keimah in ka hih leh, ka gamtatna tawh ka upna ka hong lak ding hi. 19 Pasian khat bek a om ci-in na um hi. A pha hi. Dawi gilote in zong umin, kihta-in a liing uh hi. 20 Kiphasakpa aw, gamtatna hoih om loin upna in phattuamna om lo hi cih theinuam na hi hiam? 21 I pa Abraham in ama tapa Isaak pen biakna tau tungah a piak ciangin a gamtatna hoih hangin dikkisakna ngah hilo ahi hiam? 22 Upna in ama gamtatna tawh bawlpha khawm a, gamtatna hoih hangin a upna a kicing hi ci-in na thei ta in. 23 ‘Abraham in Pasian um a, ama upna in amah adingin dikna-in kiciamteh hi,’ ci-in a genna a kicing tham loin, ‘Pasian’ lawmpa,’ hi,’ cihna zong a ngah hi. 24 Mi khat in upna bek tawh dikkisakna a ngah ahi kei hi, gamtatna tawh a ngah hi ci-in na thei uh hi. 25 Tua mah bangin numei gilo Rahab in sawltakte a tun’sak khit ciangin lam tuam khatah a ciahsak maninah gamtatna hoih hangin dikkisakna ngah hilo a hi hiam? 26 Kha tawh a om lo pumpi in a si ahih mah bangin gamtatna hoih om lo upna in a si hi.