JONAH
(Jonah)
1
1 Topa in Amittai’ tapa Jonah tungah,
2 “Kithawi in la, a lian mahmah Nineveh khuapi-ah va pai-in va thu hilh in; bang hang hiam cih leh amau’ gitlohna thu ka za khin zo hi,” a ci hi.
3 Ahih hangin Topa kiangpan Jonah tai khia-in Tarshish khua lamah taisim dingin a kithawi zawsop hi. Joppa khua-ah a paisuk-a Tarshish khua a zuan ding teembaw khat a mu hi. A sap man pia-in a tungah kah a, Topa kiang pan taikhia dingin teembaw hawlte tawh Tarshish khua-ah a pai hi.
4 Ahih hangin Topa in tuipi tungah huih nakpi-in nung sak-a huihpi hat lua ahih manin teembaw a kisia dekdek hi.
5 Tua ciangin teembaw hawlte lau uh a, a pasian ciat uh kiangah a kiko ciat uh hi. Teembaw a zan’ tuam nadingin a sung-a vante tuipi sungah a paai uh hi. Tua bang hi napi-in Jonah in teembaw sung a tawng lamah na lutsuk a, a na ihmu hithiat hi.
6 Teembaw ukpa in amah a muh ciangin, “Ihmu pa aw, bang na cihna hiam? Tho in la, na pasian kiangah thu ngen in! I sih loh nadingin amah in eite hong ngaihsun kha thei ding hi,” a ci hi.
7 Tua khit ciangin teembaw hawlte in, “Hong pai dih un. Kua’ hangin hih gimna ei tungah hong tung hiam, cih i theih nadingin ai san dih ni,” ci-in khat-le-khat a kikum uh hi. Ai a san uh leh Jonah tung a tu hi.
8 Tua ciangin amaute in, “Kua hangin hih gimna ei tungah hong tung hiam, hong gen in. Na nasep bang hiam? Koi lai pan-a hong pai na hi hiam? Na gam bang hiam? Kua minam na hi hiam?” ci-in a dong uh hi.
9 Amah in, “Keimah in Hebru mi ka hi hi; tuipi leh leitung a bawl, vantungte’ Pasian ahi Topa ka bia hi,” a ci hi.
10 Tua ciangin tua mite a lau mahmah uh a, “Bang hangin hih bangin hih mawk na hi hiam?” a ci uh hi. Bang hang hiam cih leh Topa kiangpan amah a taikhia sim ahih lam a gen khit sa ahih manin a thei khin zo uh hi.
11 Tua ciangin amaute in, “Ei adingin tuipi a hong daih theih nadingin nang bang kong cih ding uh hiam?” ci-in a dong uh hi. Bang hang hiam cih leh huihpi a lauhuai semsem hi.
12 Amah in, “Hong domto un la tuipi sungah hong khia un; tua hi leh no adingin tuipi a hong daai ding hi; bang hang hiam cih leh hih huihpi na thuakna uh keima’ hang ahi hi, cih ka thei hi,” ci-in a dawng kik hi.
13 Tua bang a cih hangin amaute in teembaw khawl sak dingin hahkatin lei lamah a hot teeiteei uh hi. Ahih hangin a hih zo kei uh hi, bang hang hiam cih leh huihpi a hat semsem hi.
14 Tua ahih ciangin amaute in Topa’ kiangah kiko-in, “Topa aw, hih mipa ka sihsak manun kote hong sisak kei in la, mi that hi, ci-in hong ngawh kei ta in, ci-in kong thuum uh hi; bang hang hiam cih leh Topa aw, nangmah in pha na sak banga na bawl ahi hi,” ci-in thu a ngen uh hi.
15 Tua ciangin Jonah dom to-in tuipi sungah a khiat uh leh tuipi a daai pah hi.
16 Tua ciangin tua mite in Topa a kihta mahmah uh a, Topa’ tungah biakna pia-in thuciamna a bawl uh hi.
17 Ahih hangin Jonah a nawmvalh dingin Topa in ngapi khat a geelkholh sa hi a, tua ngapi’ gil sungah Jonah sun thum leh zan thum sung a om hi.