2
1 Tua ahih ciangin eite in i zaksa thute panin kinkhia lo paikhiat loh nading, lungsim takpi tawh kidophuai hi.
2-3 Bang hang hiam na cih uh leh, vantungmite tungah thu hong piakna kipin om a, zuih khialhna leh thungaih lohna apawl apawlte in thuak ding a kilawm thukhenna thuak uh ahih leh, a kipat cil a, Topa in hilhin, kam a za mite in a hong kipsak uh a lian mahmah gupna thudon loin om lehang, mawhna daan tawh bang ci kipelh ding i hi hiam?
4 Tua teci a pang mite tawh Pasian in lim tawh ahi zongin, a lamdang nate tawh ahi zongin, nalamdang tuamtuamte tawh ahi zongin, ama deihna bang a hawmsak Kha Siangtho piak thupha tawh ahi zongin teci a pang khawm hi.
5 Eite in i hilh a nung ciangin a piang ding leitung in vantungmite nuai-ah a koih kei hi.
6 Lai Siangtho khat sungah mi khat in:
“Na lungngaih nadingin mi in bang hi lel ahi hiam? A en dingin na hong pai nadingin mihing tapa in bang ahi hiam?
7 Amah vantungmite nuai-ah a neukha na nuaikhiat zo hi, Amah minthan’na leh pahtawina na khusak hi. Na khut-a na pian’sakte na uksak a,
8 Na khempeuh ama khe nuai-ah na koih zo hi,” ci-in teci a pang hi. Na khempeuh a koih zo hi a cih ciangin a koih loh a om lai khat beek a om kei hi. Tu hunin na khempeuh ama khe nuai-ah a koihna i mu nai kei hi.
9 Tu-in ahih leh, vantungmite nuai-ah neukha bek niamkhiatna a thuak mi Zeisu in Pasian’ hehpihna hangin mi khempeuh taang dingin sihna a thuak nading thu sang ahih ciangin, minthan’na leh pahtawina a ngahna thu i thei hi.
10 Bang hang hiam na cih uh leh, ta tampite vanglian nopsakna-ah a khak nadingin, tua mite’ gupna a piangsakpa in gimna a thuakna hangin kicin’na a tun’ nadingin na khempeuh bawl a, a uk Pasian in a kilawm hi.
11 A siangthosak theipa leh siangthona a ngah mite in innkuan khat pan a piang uh hi. Tua ahih ciangin Zeisu in amaute, “Ute naute aw,” ci-in sap ding a maizumpih kei hi.
12 Tua bang a cihna in:
“Ka ute ka naute kiangah Na min ka gen ding hi, Mihon laizangah nangmah phatna la ka sa ding hi,”
ci-in a gen hi.
13 Mun khat panin,
“Pasian ka muang ding hi,”
a ci hi. Khatvei leuleu:
“Kei-a kipan Pasian hong piak tate a om uh hi,”
ci-in a kigen hi.
14-15 Tua hi a, tua tate in a si a sa tawh kizom uh ahih ciangin Khazih in zong sihna a thuak ciangin, Dawimangpa ahi sihna a ukpa a suksiat nading ahi zongin, sihna kihta ahih manunah a nungta lai takun a tawntungin a kikhum bangin a omte a suahtak sak nadingin ahi zongin, tua tate bangin si-le-sa a la hi.
16 Bang hang hiam na cih uh leh, amah in a man takin vantungmite a huh kei hi; Abraham’ suante a huh hi.
17 Tua ahih ciangin amah in mite mawhna tang ding Pasian tawh kipawl nate ah hehpihna tawh ahi zongin, dikna tawh ahi zongin a dim Siampi Ukpa a suah nadingin, a u a naute tawh a kibat taktak nading thu a om hi.
18 Bang hang hiam i cih leh, amahmah in ze-etna thuakin gimna thuak ngei zo ahih ciangin ze-etna a thuakte a huh nadingin a siam hi.