THESALON NIHNA
(2 Thessalonians)
1
1 Paul, Silvanas leh Timoti te in i Pa Pasian leh Topa Zeisu Khazih sungah kip-a a om Thesalonika pawlpi kong zasak uh hi.
2 Pa Pasian leh Topa Zeisu Khazih kiang pan hehpihna thupha leh nopna in nomau tungah om ta hen.
3 Ute naute aw, na upna uh khang mahmahin, note khempeuh khat leh khat na ki-itna uh zong khang ahih ciangin, kote in hih ding a kilawm bangin note hangin Pasian’ hehpihna ka phat tawntung uh hi.
4 Tua ahih ciangin note in bawlsiatna khempeuh ahi zongin, na thuak uh gimna ahi zongin, thuakzawhna leh upna na neih uh kote in ngaihsunin, Pasian’ pawlpi lakah note hangin ka kisathei uh hi.
5 Note in Pasian’ Gam hangin gimna thuakin, tua Gam tawh a kilawm mi-in hong simna thu na ngah nadingun, thuman tawh Pasian’ thukhenna tua bangin a kilang hi.
6-8 Bang hang hiam na cih uh leh, Topa Zeisu in ama vangliatna tawh kipawl vantungmite tawh, vantung pan meikuangin hong kilang a, Pasian a thei lo mite, i Topa Zeisu Khazih’ Lungdamna Thu a ngai lo mite daan a piak ciangin, note hong gimsak ngei mite tungah gimna ahi zongin, gimna a thuak ngei note tungah kote tawh nopsakna ahi zongin, Pasian in a thukkik nading thu in thuman ahi hi.
9-10 Tua Topa in ama misiangthote hangin minthan’na a ngah nading ahi zongin, kote’ teci pan’na thu note in um na hih uh ciangin a um mite khempeuh hangin nakpi-in lamdangsakna ngah nading ahi zongin, a hong pai ding Ni-ah tua mite in Topa maitang tawh ahi zongin, vangliatna tawh kipawl minthan’na tawh ahi zongin kikhenin, kisiat tawntungna ahi mawhna’ daantatna a thuak ding uh hi.
11 Tua ahih ciangin i Pasian leh Topa Zeisu Khazih’ hehpihna thupha tawh kizui-in tua i Topa Zeisu’ min in note hangin vangliatna a ngah nading ahi zongin, note in zong tua Topa hangin vangliatna na ngah nading uh ahi zongin note in hong sapna thupha a ngah ding a kilawm mi ci-in eite Pasian in hong ciamtehin,
12 hoihna tawh kipawl deihna khempeuh leh upna tawh kipawl gamtatna khempeuh a vangliatna tawh a kicin’ nadingin kote in note ading thu ka hong ngetsak tawntung uh hi.