1 A khak bel thu in ute naute aw, note in bang ci nuntak ding ahi zongin, Pasian lungdamsak nadingin bang ci gamtat ding ahi zongin kote kiang pan na ngah khin zo uh hi. Tua ahih manin tua mah bangin na khangto semsem un ci-in Topa Zeisu paulamin, hong thuumin kong hansuah uh hi. 2 Topa Zeisu’ thuneihna tawh hih bang lamlahnate kong piak uh na thei uh hi. 3 Pasian’ deihna in note in numei tawh khialhna tangin na sian’tho nading uh ahi zongin, 4-5 Pasian thei lo Gentailte in numei leh pasal kilunggulh luatna a neih bangun om loin, note na vekpi-un sian’thona leh a meel kilawm tawh na pumpi uh na kep theih nading uh ahi zongin, 6 hih thu-ah kuamah in a u, a nau tungah kheemna tawh a khialh loh nading ahi zongin a hong deih hi. Kote in hilhin, thuciam ka hong piaksa uh bangin Topa in tua banga khialhna khempeuh a thuk mi ahi hi. 7 Pasian in kihhuaina-ah eite hong sam ahi kei hi, sian’thona-ah hong sam hi. 8 Tua ahih ciangin hih thu a nial mi in mi bek nial ahi kei hi, note Kha Siangtho a hong pia Pasian nial ahi hi.

9 Ute naute ki-itna thu ahih leh, note kiangah gelhin mi khatpeuh kong piak nading a om kei hi. Bang hang hiam na cih uh leh, note khat leh khat na ki-it nading uh Pasian’ hilhna a ngah mi na hi uh hi. 10 Tua tham loin, Makedonia gam mun khempeuh ah a om ute naute khempeuh tungah tua bang na hih uh hi. Ahih hangin ute naute aw, note in khangin, na hauh semsem theih nadingun ahi zongin, 11-12 a pua lamah a om mite mai-ah akilawm gamta-in, sapna a om loh nadingin kote in ka hong vaikhak uh mah bangin, nuam takin omin, nomau’ na sem ciatin, nomau khut uh tawh na sep nadingun kote in hansuahin ka hong thuum uh hi.

13 Ute naute aw, muan’na a nei lo midangte a dah bangun note in na dah loh nadingun a si mite’ thu thei loin na om ding uh ka deih kei uh hi. 14 Zeisu in a sih khit ciangin a thawhkik eite in i up leh, tua bangin Zeisu sungah a si mite zong amah tawh Pasian in a kha khawm ding hi. 15 Topa’ thupiak kholhna bangin kote in note kiangah kong gen uh thu in: Topa hong kumsuk dongin nungta-in a om lai eite in a si mite mai-ah omna ngah ding i hi peuhmah kei ding hi. 16 Bang hang hiam na cih uh leh, Topa mah in kikona tawh, vantungmi mangpa’ kikona tawh, Pasian’ peengkul tumna tawh, vantung pan hong kumsukin, Khazih sungah a sisa mite in a tho masa ding uh hi. 17 Tua khit ciangin nungta-a om lai eite in van kim lai-ah Topa dawn dingin tua mite tawh meii tungah puakna i ngah mah bangin, Topa tawh i omkhawm tawntung ding hi. 18 Tua ahih ciangin hih thute tawh note khat leh khat na kihehnem un.