ESTHER
(Esther)
1
1 Hih lai-a kigen thu piangte pen India gam panin Ethiopia gam dong, gamneu za khat sawmnih-le-sagih a uk Ahasu-eras’ hun lai-a piang thu ahi hi.
2 Hih hun lai takin kumpi khua ahi Susa khuapi sunga a kumpi tokhom tungah amah tu hi.
3 Ama uk a kum thumna kumin ama nuai-a a uliante khempeuh leh a nasemte’ adingin pawi khat bawksak hi. Ama khut nuai-a om Persia leh Media galkapmangte leh ama nuai-a uliante leh a ma nuai-ah gam a uk sawnte a om lai takin,
4 a kumpi gam hauhna leh ama thupi ziazuana ni tampi sung, ni za leh ni sawmgiat sung tak lak hi.
5 Hih pawi hun a bei khit ciangin kumpi khua Susa khuapi sunga om mi lian mi neu mi khempeuh adingin kumpipa in pawi khat bawl hi; tua pawi pen kumpi inn huang sungah kibawl a, ni sagih kibawl hi.
6 Tua huang sungah suangkang khuamte kiphut a, khau malneu leh khau dupsan tawh ngun kualte ah kikhihin a kikhai dalna puan pakte kikhungin, suangmanpha a san, a dum, a kang, leh a vom, a nam tuamtuamte kizangin a kizeem suangphah kiphah tungah kham leh ngun kibawl lupnate kikoih hi.
7 Khamhai nam tuamtuamte tawh zu kihawm a, kumpipa’ hauhna tawh kituakin deih deihin zu kizang hi.
8 Tua lai-ah zu nekna zia pen kihah piak cih om lo hi; bang hang hiam cih leh mi khempeuh in amau’ duh zahzah bek a neksak nading uh kumpipa in ama nuai-a uliante thupia hi.
9 Tua banah Kumpinu Vashti in zong numeite’ adingin Kumpipa Ahasu-eras’ inn sung mah-ah pawi khat bawl hi.
10-11 A ni sagih ni, zu nekna hangin a lungnop ciangin kumpipa in ama na asem a innsung mang sagihte Mehuman, Biztha, Harbona, Bigtha, Abagtha, Zethar, leh Karkas-te sam a, mite leh uliante mai-ah ama meel hoihna a lah theih nadingin Kumpinu Vashti a kumpi lukhu khu sa-in ama kiangah a paipih nadingun sawl hi; bang hang hiam cih leh tua nu a meel a hoih takpi mah ahi hi.
12 Ahih hangin Kumpinu Vashti in innsung mangte’ thu puak kumpipa’ sapna nial hi. Hih a nialna thu ah kumpipa heh mahmah a, a hehna hangin a sin sung so hi.
13 Tua ciangin kumpipa in upadi siam a mi pilte thu dong hi; bang hang hiam cih leh upadi leh biakna lam thu theite khempeuh thu dotpen kumpipa’ zat ngei khat ahi hi;
14 ama gei nai pen ah a tu, hun omzia a thei, Persia leh Media gam ulian sagihte ahi Karshena, Shethar, Admatha, Tarshish, Meres, Marsena, leh Memukante hi uh a, kumpipa kiangah a hawh thei, kumpi gam sungah ulian pente ahi uh hi.
15 “Innsung mangte’ tung tawnin keimah Kumpi Ahasu-eras’ thupiakna bangin gamta lo ahih manin Kumpinu Vashti tungah upadi tawh kizui-in bangci kihih ding ahi hiam?” a ci hi.
16 Tua ciangin kumpipa leh uliante’ zakin Memukan in dawng a, “Kumpinu Vashti khial hi; kumpipa tung bek hi loin Kumpipa Ahasu-eras’ ukna gam sung khempeuh a, om uliante leh mi khempeuh tungah zong a khial ahi hi.
17 Kumpinu’ gamtatna thu numei khempeuh in thei ding uh a, hih thu hangin numeite in a pasalte uh simmawh ding uh hi; amaute in, ‘Kumpipa Ahasu-eras in ama kiangah a pai dingin Kumpinu Vashti thu pia napi-in pai lo hi,’ ci ding uh hi.
18 Hih banga kumpinu’ gamtatna thu a za Persia leh Media gam numei liante in kumpipa nuai-a uliante tungah tu ni mahmah-in hih thu gen ding uh a, kisimmawhna leh kizahtak lohna tampi piangsak ding hi.
19 Kumpipa in hoih nasak leh, kumpi thupiakna khat paisak in la, Kumpipa Ahasu-eras’ mai-ah Vashti a kilaak kik nawn loh nadingin a kikhel kik ngei nawn lo ding Persia mite leh Media mite’ upadi sungah gelhsak in; tua ciangin amah sangin a kilawm zaw numei khat ama za luahsak in.
20 Tua banga kumpipa’ thupiakna thu kumpigam sung khempeuh ah a kizak ciangin numei khempeuh in a neu a lian amau’ pasal ciat zahtak ding uh hi,” a ci hi.
21 Kumpipa leh uliante in hih ngaihsutna hoih sa uh a, Memukan’ gen bangin kumpipa gamta hi.
22 Pasal khempeuh in ama innsung ukpa ahih nading leh ama kam a kizuih kim nadingin kumpipa’ ukna gam khempeuh ah amau’ lai ciat, leh mi khempeuh tungah amau’ pau ciatin laikhakte kigelh hi.