1 Sal-a ka om uh kum guk a phak kum, a kha gukna, a ni nga ni-in sal-a om Judah makaite tawh ka inn sungah thu genin ka tut lai takun, thakhatin Topa Pasian’ vangliatna ka sungah hong tum hi. 2 Ka khuadak leh, mihing tawh a kibang pian khat ka mu hi. A kawng nuaisiah ding teng meikuang tawh kibang a, a kawng tungsiah ding teng sumsan kinawtngil tawh kibangin san heuhau hi. 3 A khut ding tawh a kibang pian khat in hong sawkin ka sam-in hong man hi. Tua ciangin hih ka maang sungin, Pasian’ Kha in vanah hong leen’pih to-in Jerusalem khuapi hong tun’pih hi. Tua lai panin, Pasian a hehsuahna ahi milim a omna mun, biakinn tual sungnung lutna, leilu lam kongpi-ah hong paipih hi. 4 Kuam sungah ka maang-a ka muh bang teekteekin, tua sanah Pasian’ minthan’na ka mu hi. 5 Amah in kei kiangah, “Ezekiel aw, leilu lamah khuadak in,” hong ci hi. Kei zong ka khuadak leh, kongpi kianga biakna tau kiangah, Pasian’ hehsuahna milim ka mu hi. 6 Tua ciangin amah in, “Ezekiel aw, amaute’ gamtatnate na mu hiam? Israel mite in a bawl uh a muhdahhuai gamtatnate, ka mun siangtho panin a gamla semsem-ah kei hong nawhkhiatnate en in . Hihte sangin a mindaihuai zaw nangawn na mu lai ding hi,” hong ci hi.

7 Tua ciangin biakinntual puanung lutna gei-ah hong paipih a, tua lai-ah kulh a van’na mun khat hong lak hi. 8 Amah in, “Ezekiel aw, hih kulh tovang in,” hong ci hi. Kei zong kulh ka tovang a, kongkhak khat ka tuak hi. 9 Tua ciangin amah in, “A sungah tum in la, a muhdahhuai a gitloh gamtatnate uh va en in,” hong ci hi. 10 Kei zong a sungah tumin ka khuadak hi. Kawm tung khempeuh ah gul lim, adang ganhing ninte lim, leh Israel mite’ biak milim khempeuh a kisuai ziazua ka mu hi. 11 Tua lai-ah Israel minam makai sawmsagih na om a, tuate lakah Shafan’ tapa Jaazaniah zong na om hi. Amaute in paknamtui halna kuang khat ciat tawi uh a, paknamtui hal khute van lamah kahto biaibuai hi. 12 Tua ciangin amah in, “Ezekiel aw, Israel mite in a kimu lo mun-a a gamtatnate uh tu-in na mu hiam? Amaute in milim a dimna inn sungah biakna bawl uh hi. Amaute in, ‘Topa in hong mu lo hi. Topa in hih gam nusia khin ta hi,’ ci-in paulap zong uh hi,” hong ci hi. 13 Tua ciangin, “Hihte sangin a muhdahhuai zaw a gamtatna uh zong na mu lai ding hi,” hong ci thuah lai hi.

14 Tua ciangin leilu lam-a om biakinn kongpi-ah hong paipih a, Tammuz a cih uh pasian a sihna hangin dahin a kapin a om numeite hong lak hi. 15 Tua ciangin amah in, “Ezekiel aw, na mu hiam? Hihte sangin a muhdahhuai zaw na mu lai ding hi,” hong ci hi. 16 Tua ciangin biakinntual sungnung ah hong paipih hi. Tua lai-ah biakinn kongkhak gei, biaknatau leh innlim kikal san-ah mihing sawmnih leh nga khawng na om a, biaknatau nung ngatin nisuahna lam nga-in ni suak tuung na bia uh hi. 17 Tua ciangin amah in, “Ezekiel aw, huate na mu hiam? Hih Judah mite in na muhsa a muhdahhuai a gamtatte uh tawh lungkim nai lo uh a, gam sung khempeuh ah ngongtatna dimsak uh hi. Tua banah ka heh semsem nadingin hih bangin gamta uh hi. A siathei tawpin hih bangin kei hong simmawh bawlna mu in! 18 Tua ahih manin amaute in ka heh mahmahna thuak ding uh a, amaute ka zah kei ding a, zong ka khasiat kei ding hi. Amaute in a tha neih tawpun kei tungah thu hong nget uh hangin amaute’ thungetna ka ngai kei ding hi,” hong ci hi.