1  Ka sungah Topa hong om lamtak ka kiphawk a, ama Kha in kei hong paipihin, misi guh tawh a kidim-a om kuampi khatah hong koih hi. 2 Tua guhte lakah hong vakpih kawikawi a, tua guhte a tam mahmahna leh a keu mahmahna ka mu hi. 3 Amah in kei kiangah, “Ezekiel aw, hih misi guhte a nungta kik thei ding hiam?” ci-in hong dong hi. Kei zong, “Topa Pasian aw, hih thu nang bek in na thei ding hi,” ci-in ka dawng hi. 4 Tua ciangin amah in, “Hih guhte tungah thu hilh inla, hih guhkeute in Topa’thu a ngaih nadingun gen in. 5 Topa Pasian ahi keimah in amaute tungah ka gen thu hih bangin gen in: Note sungah hu kong guan ding a, note kong nungtasak kik ding hi. 6 Thagui leh sazang kong guan ding a, vun tawh kong tuam ding hi. Tua ciangin na sung uhah hu hong guan’in, kong nungtasak kik ding hi. Tua ciangin Topa ka hihna nong thei ding uh hi, ci-in gen in,” hong ci hi.

7 Tua ahih ciangin hong sawl bangin thu ka gen hi. Tua bangin thu ka gen lai takin a kigawi ziazua a ging ka za a, tua guhte khat leh khat kizom kik uh hi. 8 Tua bangin ka et lai takin thagui leh sazang in tua guhte tuam a, tua ciangin a vun in zong hong tuam hi. Ahi zongin tua pumpite sungah hin’ theihna hu om nai lo hi. 9 Tua ciangin amah in kei kiangah, “Ezekiel aw, huihte tungah thu gen in la, hih a sisa pumpite sungah hu sangin a hingkik sak dingin mun khempeuh panin hong pai un, ci-in Topa Pasian in thu hong pia hi, ci-in gen in,” hong ci hi. 10 Tua ahih ciangin hong sawl bangin ka gen hi. Tua pumpite sungah hin’ theihna hu lut a, tua ciangin amaute hingin a khe-un hong ding uh hi. Galkap honpi khat zah pha-in tam mahmah uh hi.

11 Tua ciangin Pasian in kei kiangah, “Ezekiel aw, Israel mite pen hih guhte tawh kibang uh hi. Amaute in, ‘I keucip a, lamet ding bangmah om lo a, i nuntakna guipi beita hi,’ ci uh hi. 12 Tua ahih ciangin ka mi Israelte tungah thu gen in la, Topa Pasian in hih bang ci hi, ci-in gen in: Ka mite aw, tu-in note’ hankhuk kong hon’sak ding a, note hong paikhiatpihin, Israel gam kong tun’pih kik ding hi. 13 Note na kiphumna uh hankhuk hong hon’sakin kong paikhiatpih ciangin Topa ka hihna thu nong thei ding uh hi. 14 Note sungah keima kha kong guan ding a, note hong hingsak kikin, na gam uhah kong teengsak kik ding hi. Tua ciangin Topa ka hihna thu nong thei ding uh hi. Hih bangin kong hih nading thu ka kiciam zo a, ka kiciam bangin kong hih ding hi. Topa ahi keimah in hih thu ka gen khin zo hi, ci-in gen in,” hong ci hi.

15 Topa in kei kiangah thu hong gen a, 16 “Ezekiel aw, sing ciangkhut khat la in la, a tungah, ‘Judah kumpi gam’, ci-in gelh in. Tua ciangin adang khat la leuleu in la, a tungah, ‘Israel kumpi gam’, ci-in gelh leuleu in. 17 Tua ciangin tua ciangkhut tegel ciangkhut khat abat theih nadingin na khut sungah tawi khawm in. 18 Bang a cih nopna ahi hiam, ci-in na mipihte in hong dot uh ciangin, 19 amaute kiangah, Topa Pasian in hih bangin ci hi: Israel ciangkhut la-in Judah ciangkhut tawh ka koihkhawm ding hi. Tua ciangkhut nihte ciangkhut khat-in ka bawl ding a, ka khut sungah ka tawi ding hi, ci hi, ci-in gen in. 20 Tua na gelh ciangkhut nihte mite’ muhin na khut sungah tawi in la, 21 amaute kiangah, Topa Pasian in hih bangin ci hi, ci-in gen in: Amaute’ omna minam dangte lak panin Israel mite la-in ka kaikhawm ding a, amaute’ gamah ka paipih kik ding hi. 22 Israel mual tung gamah, amaute minam khatin ka gawmkik ding hi. Amaute in a uk ding khat nei ding uh a, amaute minam nih-in kikhen nawn lo ding uh a, kumpi nih-in kikhen nawn lo ding uh a, kumpi gam nih-in zong kikhen nawn lo ding uh hi. 23 Amaute pen a muhdahhuai milimte tawh kininsak nawn lo ding uh a, mawhnate tawh zong kisiasak nawn lo ding uh hi. Amaute’ mawhna leh kei hong lehheknate panin ka suakta sak ding hi. Amaute a siangtho mi-in ka bawl ding a, amaute in keima mi hi-in, kei in amaute’ Pasian ka hi ding hi. 24 Ka nasempa David in amaute’ kumpi hi ding a, mi khat ukna nuai-ah amaute kigawmin, ka thukhamte hoih takin zui ding uh hi. 25 A pu a pate uh a ten’ nasa ahi ka nasempa Jakob tungah ka piak leitangah amaute teeng ding uh a, amaute bek hi loin a suan a khak dongun teeng suak ding uh hi. Ka nasempa David in amaute uk tawntung ding hi. 26 Amaute lungmuangin a om tawntung nading uh thuciamna khat ka bawl ding a, amaute thupha pia-in a mi ka pungsak ding hi. Amaute lakah a om tawntung dingin ka biakinnpi ka phut ding hi. 27 Amaute tawh teeng khawmin, amaute’ Pasian ka hi ding a, amaute pen keima mite hi ding hi. 28 Amaute lakah a om tawntung dingin ka biakinnpi ka koih ciangin, Topa ahi keimah in keima mi dingin Israel mite ka bawl khitna thu, minam dangte khempeuh in thei ding uh hi,” hong ci hi.