5
1 Belshazzar in kumpi a suah ciangin pawi lianpi bawl a, u liante tulkhat samin amaute tawh zu a dawn uh hi.
2 Zu a nek lai takun, Belshazzar in a pa Nebukhadnezzar in Jerusalem biakinnpi pana a puakkhiat ngunhai, khamhai leh kuangte va la dingin thu a pia hi. Kumpipa in a miliante leh a zite leh, a zi neute in tua haite tawh zu a dawn theih nadingun hai la dingin thu a pia hi.
3 Thakhatin khamhai leh kuangte hong paipih uh a, a vekpi-un tua haite tawh zu a dawn uh hi.
4 Amaute in zu dawn uh a, kham tawh, ngun tawh, sumngo tawh, sik tawh, sing tawh, suang tawh kibawl pasiante a phat uh hi.
5 Thakhat thu-in kumpi inn sung meivak tan’ penna lam kawm tungah mihing khut khat hong kilang a, lai a hong gelh hi. Kumpipa in tua khut in lai a gelh laitak a mu hi.
6 Tua ciangin kumpipa lau lua mahmah a, a mai daang gawpin a khut a liing kauhkauh hi.
7 Amah in mitphial siamte, aisan siamte, aksi et siamte va sam pak un ci-in Babilon mipilte kiangah a gen hi. Tua mite a hong tun’ uh ciangin kumpipa in, “Hih laigelh a sim thei, a khiatna a hong gen thei peuhmah kumpi puanpi san silh sakin, minphatna khamkhi a ngawngah ka ok sak ding a, kumpi gam sungah a za lian thumna-in ka koih ding hi,” a ci hi.
8 Kumpipa’ thudot mite hong tung uh a, ahih hangin tua lai a sim thei leh kumpipa tunga a khiatna a gen thei kuamah a om kei uh hi.
9 Tua ciangin Belshazzar kumpipa a lungkham mahmah a, a mel daang semsem a, a u liante in a cih nading meel a thei kei uh hi.
10 Kumpipa leh a u liante gamlum ngeingai-a a om lai takun, kumpinu pawi inn sungah hong lut a, “Kumpipa aw, sau veipi nungta in. Bang hangin lungkham lua-in na mel daangsak ngeingai zenzen na hi hiam?
11 Na gam sungah a siangtho pasiante’ kha a nei mi khat a om hi. Na pa kumpi ahih lai takin, tua mipa in pasiante’ pilna tawh a kibang pilna, theihna leh lungsim navakna a nei hi. Tua hi a, na pa Nebukhadnezzar kumpipa in tua pa aisan theite, mitphial siamte, khongkhai siamte leh aksi et siamte’ ukpi dingin a koih hi.
12 Amah in a kan zaw siamna nei a, mang khiat siamna, thu dotna haksa nonote dawn’ theihna leh thu thukpite gentel theihna a nei hi. Tua ahih ciangin kumpipa in Belteshazzar ci-a a kiphuakpa Daniel sam sak in, tua hi leh amah in a khiatna a hong gen thei pah ding hi,” a ci hi.
13 Tua ciangin Daniel thakhatin kumpipa kiangah a paipih uh hi. Kumpipa in, “Nang Daniel pen ka pa kumpipa in Judah gam pana a hong lakkhiat Judah salte khat hilo na hi hiam?
14 Na sungah pasiante’ kha om ahih manin siamna na nei a, lung pilna leh theihna na neih lam ka thei hi;
15 Ka thudot mite leh mitphial siamte in hih lai kigelh sim ding leh a khiatna gen dinga hong pai uh hi napi, a khiatna a thei zo kei uh hi.
16 Ahih hangin nangmah in thu thukpi leh kuama theih zawh loh thute gen thei hi ci-in kong za zo hi. Hi lai kigelh na sim theih a, a khiatna nong gen theih leh, kumpi puanpi san kong silhsak ding a, minphatna khamkhi na ngawngah hong ok sakin, kumpigam sungah a za lian thumna-in ka hong koih ding hi,” a ci hi.
17 Daniel in kumpipa kiangah, “Letsong pen kei hong pia kei in la, midang khatpeuh pia zaw in. Ahi zongin tua lai kigelh kong simsak ding a, a khiatna kumpipa kong hilh ding hi.
18 Sangpen Pasian in na pa Nebukhadnezzar kumpi lianin koih a, zahtakna leh vangliatna a pia hi.
19 Amah lian lua mahmah ahih manin gam khempeuh, nam khempeuh, pau khempeuhte in kihta in a liing uh hi. Mi khatpeuh a thah nop leh that a, a nuntak sak nop leh a nungta sak hi. A ut leh mi khatpeuh pahtawi-in, a ut leh a daisak thei hi.
20 Ahih hangin amah a lungkhauhin kiphasak a, gilo lua ahih manin a kumpi tokhom panin kilakhia a, a minthan’na a taan hi.
21 Amah mihingte lak panin kihawlkhia a, ganhing lungsim a nei hi. Gam sakolte tawh teeng khawmin, bawngtal bangin lopa ne a, daitui dal ding nei loin a pua lamah a lum hi. A tawp khakna ah Sangpen Pasian in mihingte’ kumpi gamte uk a, a teel peuhpeuh kumpi a suak hi ci-in a phawk thei hi.
22 Ahih hangin a tapa ahi nang mah Belshazaar in hih thu khempeuh na theih hangin na kiniamkhiat tuan kei hi.
23 Vantung Topa langah na pang hi. A biakinnpi hai leh kuangte la-in sabuai tungah nangmah tawh, na u liante tawh, na zite leh na zi-neute uh tawh zu dawnna-in na zang uh hi. Theihna a neilo, a mu thei lo, khua a za thei lo, ngun, kham, sumngo, sik, sing leh suang tawh a kibawl pasiante’ min na phat uh hi. Na nuntakna leh na hihna khempeuh a hong uk Pasian na zahtak kei hi.
24 “Tua ahih ciangin Pasian in hih lai malte tua khut a hong gelhsak hi.
25 Tua a kigelh laimal in hi bang ahi hi: MENE, MENE, TEKEL, PARSIN,
26 A khiatna in: MENE: Pasian in na gam ukna nite hong sim sak a, a beisak zo hi.
27 TEKEL: nang a hong kitawikhai a, na leek zo kei hi.
28 PARSIN: na gam kikhen kham a, Media leh Persiate a kipia zo hi,” ci-in a dawng kik hi.
29 Tua ciangin Belshazzar in Daniel kumpi puansan silhsak dingin thu pia pah a, minphatna khamkhi a ngawngah a oksak hi. A gam sunga a za lian thumna dingin a koih hi.
30 Tua zan mahmah in Babilon kumpipa Belshazzar kithat a,
31 Media mi Darias kumpi a suak hi. (Tua lai takin, Darias kum sawmguk leh kumnih a pha hi).