2
1 Nebukhadnezzar kumpi a suah zawh a kumnih lai takin mang khat a man’ hi. A lungsim patau lua mahmah ahih manin a ihmu thei kei hi.
2 Tua ahih ciangin bang mang man’ cih a hilh dingin mitphial siamte, mi bum theite, leh khongkhai siamte a samsak hi.
3 Amaute hong pai uh a, kumpipa mai-ah a din’ uh ciangin kumpipa in, “Mang khat ka man a, tua ka mang pen bang hiam cih thei nuam ka hih manin ka lungsim a patau mahmah hi,” a ci hi.
4 Amaute in Aram pau tawh, “Kumpipa aw, na khan’ sau ta hen! Na mang hong gen leteh a khiatna kong gen ding uh hi,” a ci uh hi.
5 Kumpipa in, “Ka mangmat leh a khiatna nong gen theih kei uh leh note kong semnen gawp ding a, na inn uh suksiat gawp dingin ka ngaihsun khin zo hi.
6 Ahi zongin ka mangmat leh a khiatna nong gen theih uh leh, letsong leh minphatna lianpi ka hong pia ding hi. Tua ahih ciangin tu-in ka mangmat bang hi a, a khiatna bang ahi hiam cih hong gen un,” a ci hi.
7 Amaute in, “Kumpipa aw, na mang hong gen phot leteh a khiatna ka hong gen ding uh hi,” ci-in a dawngkik uh hi.
8 Kumpipa in “Ka ngaihsutna sa teng hong zasak khin zo ka hih manin hunsau theihtheih nang a zong na hih lam uh tel takin kithei hi.
9 Ka mangmat nong gen kei uh leh note khempeuh thukhenna khat bek ka hong pia ding hi. No teng khempeuh in lungsim kikhat in zuau thu gengen leng a ngaihsutna hong kikhel ding hi a ci nuam na hi tazen uh hi. Tua ahih ciangin ka mangmat hong gen phot un, tua hi leh a khiatna zong hong gen thei ding ci-in ka hong muang ding hi,” a ci hi.
10 Khongkhai theite in, “Kumpipa aw, na deihna bang a hong gen thei ding hih leitungah mihing khat beek om lo hi. Kumpi gen loh mi lianpen leh mi thupi pen khat beek in aisan theite, mitphial siamte leh khongkhai theite’ tungah tua bang thu a dong ngei kuamah om nailo hi.
11 Kumpipa’ thu dotna pen haksa lua mahmah ahih manin, mihing ahi lo pasiante longal a gen thei ding kuamah om lo hi,” a ci uh hi.
12 Tua thu hangin kumpipa heh mahmah a, Babilon sunga kumpi’ thudot mi pilte khempeuh thahlup khit dingin thu a pia hi.
13 Tua ahih ciangin mi pilte khempeuh thahlup khit nang thu kipia a, tua thahlup dingte sungah Daniel leh a lawmte teng zong a kihel uh hi.
14 Tua ciangin Daniel in Babilon gamsunga mipil teng that lum dinga a kisawl kumpi cing Ariok kiangah kampau kidawm takin a va pai hi.
15 Amah in Ariok kiangah, “Bang dinga kumpipa in hi zah taka thu khauh suaksak ahi hiam? ci-in a dong hi. Ariok in thu piang khempeuh a gen hi.
16 Tua ciangin Daniel kumpipa’ kiangah pai a, a mangmat a khiatna a hilh theih nadingin, hun tawmvei sung a kingak lai nadingin phalna a ngen hi.
17 Tua ciangin Daniel innah ciah a, thu piang teng khempeuh a lawmte Hananiah, Mishael leh Azariahte kiangah a ko hi.
18 Amah in vantung Pasian in amaute hehpih a, tua thu thukpi genkhia thei a, Babilon gamsunga mipil dangte tawh thahna a thuak khawm loh nadingun thu i ngen ding hi ci-in a gen hi.
19 Tua ciangin tua zanin tua thu thukpi mangmuhna tawh Daniel’ tungah kihilh a, amah in vantung Pasian’ min a phat hi.
20 “Pasian min kiphat tawntung ta hen; amah pilin a vanglian hi.
21 Amah in hun leh khuahunte kheel; kumpite a koih a, lah a lakhia hi. Amah in mite pilna leh theihna a pia hi.
22 Amah in thu thukpite leh thu simte a lakkhia hi. Amah in khuamial sunga kiselte thei a, amah khuavak in a umcih hi.
23 Nang ka pu ka pate’ Pasian na hi a, Ka hong phat a, ka hong zahtak hi. Nangmah in pilna leh thahatna na hong pia zo hi; thungetna zong za a, kumpipa kianga ka gen ding thu nong lak zo hi,” a ci hi.
24 Tua ahih ciangin Daniel in kumpipa in Babilon mipilte that dinga a sawlpa Ariok kiangah pai a, “Babilon gamsunga mipilte that kei in. Kumpipa kiangah hong paipih in, tu-in a mangmat a khiatna ka gen ding hi,” a ci hi.
25 Tua ciangin Ariok in thakhatin Daniel kumpipa kiangah paipih pah a, “Kumpipa aw, na mangmat a khiatna a hong gen thei ding Judah salte khat ka va mu hi,” ci-in a gen hi.
26 Kumpipa in Belteshazzar a kici Daniel kiangah, “Ka mangmat bang hi a, a khiatna bang hiam cih hong gen thei ding na hi hiam?” ci-in a dong hi.
27 Daniel in, “Kumpipa aw, tua na theih nop thu a hong gen thei ding khongkhaithei, mitphial siam, aisan siam kuamah om lo hi.
28 Ahih hangin thusim a lak thei vantungah Pasian khat a om hi. Amah in mai lamah bang thu hong piang ding cih nangmah Nebukkhadnezzar kumpipa tungah a hong hilh zo hi.
29 Kumpipa na ihmut lai takin mai lama hong piang ding mang khat na man’ a, thu thukpi a lakkhia Pasian in a piang ding thu a hong lakkhol zo hi.
30 Tu-in midangte sangin ka pil zawk mana kei tungah tua a hong kilak hi loin, Kumpipa in na mangmat a khiatna leh na ngaihsut thu na theih nadingin a hong kilak ahi zaw hi.
31 “Kumpipa aw, na mangin a tee daldal milim lian mahmah khat na mu a, kihtak huai mahmahin na mai-ah a ding hi.
32 Tua milim lutang pen kham hoih mahmah tawh a kibawl hi. A awm leh a bante ngun tawh kibawl a, a gil leh a pheite sumngo tawh a kibawl hi.
33 A khete sik tawh kibawl a, a khepekte khenkhat sik leh khenkhat tungman kigawm ahi hi.
34 Tua banga na et lai takin, kuama khuk lohin mual tung pan suangtumpi khat hong tuk a, sik leh tungman kigawm milim khete deng tanin a kithehthang hi.
35 Thakhatin sik, tungman, sumngo, ngun leh khamte kitam nen gawp a, khualkhal hun-a ansi zap bangin a lengmang hi. Huih in leen’ mangkhin ahih manin them kha beek a kimu nawn kei hi. Ahih hangin tua suangtum hong khangkhanga mual cia hong phain leitung khempeuh a dim hi.
36 “Na mangmat pen tu-a teng ahi hi. Tu-in a khiatna ka hong gen ding hi.
37 Kumpipa aw, kumpi khempeuh lak pan nang a lianpen na hi hi. Vantung Pasian in nang kumpi-in hong koih a, ukna, vangliatna, thahatna leh minthan’na hong pia hi.
38 Amah in mi’ teen’na leitung teng, ganhing teng leh vasate uk dingin a hong koih hi. Tua kham lutang in nangmah na hi hi.
39 Nang khit ciangin nang sanga neuzaw kumpi gam adang khat hong piang ding a, tua khit ciangin sumngo ahi kumpigam thumna in leitung khempeuh a uk ding hi.
40 Tua khit ciangin kumpi gam lina hong piang ding a, sik bangin a khauh ding hi. Sik in na khempeuh sat nen a, a gawivui bangin, amasa kumpi gam teng khempeuh a sukham ding hi.
41 A khepek leh a khemete khen khat sik leh khen khat tungman kigawm ahi na mu hi. Tua in kumpigam kikhenthang ding hi cihna ahi hi. Tungman leh sik kigawm ahih mah bangin sik bangin a hoih khop khat khauhna ciang a nei ding hi.
42 Khemete khenkhat sik hi a, khenkhat tungman ahih mah bangin kumpi’ gam khenkhat thahatin khenkhat a thahat kei ding hi.
43 Sik leh tungman kigawm na muh mah bangin tua kumpi gam’ukte in kigawm ding hanciamin zi leh ta-in a kiman ding uh hi. Ahih hangin sik leh tungman a kimat theih loh mah bangin a kigawm thei kei ding uh hi.
44 Tua kumpite a maan’ lai takun, vantung Pasian in a bei thei ngei lo ding kumpigam a hong phut ding hi. Tua kumpigam kuamah in zo zo lo ding a, tua gam in gam dang khempeuhte zo gawpin, a kip tawntung ding hi.
45 Kuama lawn’ loh a, mualtung pan hong tuksuk suangtum in sik, sumngo, tungman, ngun leh kham tawh kibawl milim a den paih na mu hi. A lian Pasian in mai lamah bang hong piang ding cih Kumpipa a hong hilh hi. Na mangmat pen ahi bang tektekin kong gen a, a khiatna zong a maan bangin kong gen zo hi,” a ci hi.
46 Tua ciangin Nebukhadnezzar kumpipa in Daniel’ mai lei lakah kun sukin, Daniel tungah sagawh biakna leh namtui biakna piakna bawl dingin thu a pia hi.
47 Kumpipa in, “Hih thu thukpi hong gen thei na hih manin na Pasian in thu thuk a lak, pasian khempeuh sung pan a lianpen, kumpite tunga Topa ahi hi,” a ci hi.
48 Tua ciangin kumpipa in Daniel letsong hoih tampi pia a, a za liansak a, Babion gam teng uk sakin, Babilon mipil thu dotte ukpipa dingin a koih hi.
49 Kumpipa in Daniel’ ngetna mah bangin Shadrak, Meshak, leh Abednego-te Babilon gam khawk uk dingin koih a, Daniel pen kumpi inn sungah a omsak hi.