1  Tua nung ciangin Paul in Athen khua pan paikhia a, Korin khua-ah a tung hi. 2 Tua lai takin Klaudia kumpipa in Judah mi khempeuh Rom khua pan a paikhiat nadingun thu pia zo ahih ciangin Pontas gammi ahi, a min Akuila kici Judah mi khat a zi Prisilla tawh, Italy gam panin a sawt loin hong tung uh a, Paul in a muh ciangin a kiangah a tung hi. 3 A nasepna uh a kibang ahih ciangin Paul in amau’ innah teeng a, na a semkhawm uh hi. Bang hang hiam i cih leh, amaute in puanbuk khuite ahi uh hi. 4 Paul in Nipi ni simin kikhopna inn sungah thuhilhin Judah mi leh Grik mite a zol hi. 5 Silas leh Timoti in Makedonia gam panin hong tun’ uh ciangin, Paul in thuhilh bek semin, Zeisu in Khazih hi ci-in Judah mite nakpi-in a hilh hi. 6 Judah mite in thu nial uh a, a selpho uh ciangin Paul in langpanna tawh ama puan singkhia-in, “Note’ si uh note lu tungah om ta hen! Keimah ka siang hi. Tu-a kipanin Gentailte kiangah ka pai ding hi,” a cih khit ciangin 7 tua san tak pan paikhia-in, Pasian a bia Titu Justas min nei, mi khat’ innah a pai hi. Tua pa’ inn in kikhopna inn tawh kinai-in a om hi. 8 Kikhopna inn ukpa Krispas in ama innkuanpihte tawh Topa a um hi. Korin mi tampite in zong thu ngai uh a, umin a kibaptaiz uh hi. 9 Zan lai takin Topa in mang sungah Paul kiangah a gen-inah “Lau kei in. Pau loin om kei in, thu na gen ding hi. 10 Bang hang hiam na cih leh, nangmah tawh hong omkhawm ka hih manin kuamah in nang hong doin hong liamsuah kei ding hi. Bang hang hiam na cih leh, hih khua sungah keimah in mi tampi ka nei hi,” a ci hi. 11 Paul in tua khua mite kiangah Pasian’ thu hilhin kum khat leh kha guk tawntung a om hi.

12 Gallio in Akhaia gam mangpa za a ngah ciangin Judah mite in lungsim kikhatin Paul a man uh a, thukhenna tokhom mai-ah a paipih khit uh ciangin, 13 “Hih pa in ngeina hi lopi-in Pasian biak nading mite a zol hi,” a ci uh hi. 14 Paul in kam pau ding a kisak lai takin Gallio in, “Judah mite aw, ngeina ahi lo thu ahi zongin, gitlohna kihhuai thu ahi zongin ahih leh, nomau thu ka ngaih ding a kilawm hi. 15 Tua ahih kei a, thu ahi zongin, min ahi zongin, nomau biakna thukhamna thu ahi zongin ahih leh, no na vaihawm ding uh hi. Tua thute khen ding ka ut kei hi,” a ci hi. 16 Tua ciangin thukhenna tokhom kiang panin a hawlkhia hi. 17 Mihonpite in kikhopna inn ukpa Sosthenes manin thukhenna tokhom mai-ah a sat uh hi. Gallio in ahih leh, tua thu phamawh sa loin a om hi.

18 Paul in ni tampi a tam khit ciangin ute naute tawh kikhen a, nidang lai-a a kiciamsa bangin Kenkhrea khua-ah a sam a met khit ciangin, Prisilla leh Akuila tawh teembaw tuangin Siria gamah a pai hi. 19 Efesa khua-ah a tun’ uh ciangin Akuila leh Prisilla a nusia hi. Paul ahih leh, kikhopna inn sungah lut a, Judah mite tawh a kikum hi. 20 Amaute in amaute tawh Paul a om lai nadingin thu a nget uh hangin mang loin, 21 “Pasian in hong awi leh, khatvei kong paikik ding hi,” ci-in amaute tawh kikhenin teembaw tuangin Efesa khua pan a paikhia hi.

22 Paul in Kaisaria khua a tun’ khit ciangin pawlpite tawh kihopih dingin a paitoh khit ciangin Antiok khua-ah a paisuk hi. 23 Tua khua-ah sawtpi a om khit ciangin paikik a, Galati gam leh Frigia gam pai-in nungzuite khempeuh a kipsak hi.

24 Alekzandria khua mi Apollos min nei, thuhilh siam, Judah mi khat in Efesa khua-ah a tung hi. 25 Tua pa in Lai Siangtho siam a, Topa’ Lampi thu sintel-in, lungsim lawpna tawh Zeisu thu a tel takpi a hilh hangin, Johan baptaizna thu bek a thei hi. 26 Amah in kikhopna inn sungah lau loin thu a hilh hi. Prisilla leh Akuila in ama thu a zak uh ciangin, a sam uh a, Pasian’ ngeina thu a tel zaw-in a hilh uh hi. 27 Tua ciangin amah in Akhaia gamah pai a sawm ciangin, ute naute in tua lai-a om nungzuite in a tun’sak nadingun vaikhakna lai a pia uh a, a hansuah uh hi. Amah in a tun’ ciangin hehpihna thupha tawh a um mite nakpi-in a huh hi. 28 Bang hang hiam i cih leh, Zeisu in Khazih ahi hi cih thu Lai Siangtho tawh tel takin lak a, mite mai-ah Judah mite’ kam a nial hi.