12
Ziklag-ah David A Huhte
1 Tu-in Kish’ tapa Saul’ hangin a ut utin David a tat theih loh laitakin Ziklag-a ama kiangah mite hong pai-in amah pawlpih uh hi. Gal sungah amah a huh a thahatte lakah amaute a kihelte ahi uh hi.
2 Amaute pen thal tawite hi uh a, taklam khut tawh ahi a, veilam khut tawh ahi zongin thaltang le suangte lawn thei uh hi. Amaute pen Saul’ behte Benjamin mi ahi uh hi.
3 Ahiezer a ukpi hi a, tua ciangin Joash ahi hi. Amau tegel pen Gibeah khuami Shemaah’ tapate ahi uh hi. Amau gel nuai-ah galkapte:
Azmaveth’ tapate Jeziel le Pelet;
Anathoth khuami Berakah le Jehu;
4 Gibeon khuami Ishmaiah, mihing sawmthumte lakah a thahatpa le sawmthumte a makai pa;
Gederah khuami Jeremiah, Jahaziel, Johanan le Jozabad;
5 Harif mi Eluzai, Jerimoth, Bealiah, Shemariah le Shefatiah;
6 Korah mi Elkanah, Isshiah, Azarel, Joezer le Jashobeam;
7 Gedor khuami Jeroham’ tapate Joelah le Zebadiah ahi uh hi.
8 Gad minam sung panin gamlak a munmuanhuai a David kiangah a thahat a siam galhangte, lum le tei zat a siam, a maitang uh humpinelkai maitang bangin, mual tunga om sakhi bangin a manlang mi hong paite:
9 A ukpi Ezer, a nihna Obadiah, a thumna Eliab,
10 a lina Mishmannah, a ngana Jeremiah,
11 a gukna Attai, a sagihna Eliel,
12 a giatna Johanan, a kuana Elzabad,
13 a sawmna Jeremiah, a sawm le khatna Makbannai ahi uh hi.
14 Hih Gad mite pen galkap uliante hi a, a neu zawte in zakhat val, a gol zawte in tulkhat val uk uh hi.
15 Hihte pen Jordan a piau khempeuh a dimlet laitak kha masa sungin Jordan kantanin kuam sunga om mite nisuahna lam le nitumna lamah a taisak mite ahi uh hi.
16 Tua ciangin Benjamin mi le Judah mi pawlkhat David kiang munmuanhuai-ah hong pai uh hi.
17 Amaute a dawntuah dingin David pai khia-in amaute kiangah, “Kei kiangah kilawmtatna tawh keimah a huh dingin hong pai na hih uhleh note tawh ka lungsim kihual khawm ding hi. Ahih hangin keimah in bangmah khialhna nei lo napi-in ka langte tungah kei a hong lehhek dingin a hong pai na hih uhleh, i pu i pate’ Pasian in thei henla, note hong tai tahen,” a ci hi.
18 Tua ciangin mihing sawmthum a ukpipa Amasai’ tungah Pasian’ kha hong tungin amah in,
“David aw, kote, nangma a’ hi ung!
Jessi’ tapa aw, nangma pawl hi ung!
Nangma tungah nopna hong om henla,
nang hong huhte tungah zong
nopna hong om tahen!
Bang hang hiam cih leh
na Pasian in nang hong huh hi,”
a ci hi. Tua ciangin David in amaute sang a, ama galkap uliante-in a bawl hi.
19 Saul a do dingin Filistia mite tawh David a kuan laitakin Manasseh mi pawlkhat tai-in David a beel hi. (Ahi zongin David in Filistia mite huh thei lo hi; bang hang hiam cih leh Filistia mi a ukte in thu kikupna khat nei uh a, “Eite’ makaite’ siat nadingin a topa Saul kiangah David tai ding hi,” ci-in amah sawl khia uh hi.)
20 Ziklag-ah amah a pai laitakin Manasseh sung panin tai-in amah a beelte: Adnah, Jozabad, Jediael, Mikhael, Jozabad, Elihu le Zillethai hi a, Manasseh sungah mi a tulin a ukte ahi uh hi.
21 Amaute in mi’ na a sut thei mite panin David huh uh hi; bang hang hiam cih leh amaute a thahat a vanglian mi hi a, galkap sungah a ukte ahi uh hi.
22 Pasian’ galkap hon bangin galkap hon tampi a phak dongin a ni ni-in David a huh dingin mi hong paipai hi.
Hebron-a David’ Galkapte
23 Hihte pen Topa’ thugen bangin Saul kumpipa’ gam David tungah a hei dingin Hebron-a ama kiangah a pai galkap a khen phazah ahi uh hi:
24 Judah mi: Lum le tei a pua galkap tulguk le zagiat ahi hi.
25 Simeon mi: Galdo dingin a thahat a vanglian mihing tulsagih le zakhat ahi hi.
26 Levi mi: Tul li le zaguk ahi hi.
27 Aaron’ suante sung pan ulian Jehoiada le amah tawh mi tulthum le zasagih ahi hi.
28 A thahat a vanglian a khangno Zadok le ama beh sung panin galkap a ukte mi sawmnih le nih ahi hi.
29 Benjamin mi: Tua hun ciang dong mi a tam zaw Saul tawh a kipawl, Saul’ behte ahi Benjamin mite sung panin mihing tulthum ahi hi.
30 Efraim mi: Amaute sung panin a thahat, a vanglian, amau’ beh sungah a minthang mi tul sawmnih le zagiat ahi hi.
31 Manasseh minam alangte: Amau sung panin hong pai-in David kumpi-in a bawl dingin a min a kilo mihing tul sawm le tulgiat ahi hi.
32 Issakhar mi: Amaute sung panin Israel in bang a sep dingin kilawm cih a thei, hun paizia a thei ukpi zanih le amau’ ukna nuai-ah a om amau’ behte khempeuh ahi uh hi.
33 Zebulun mite: Amaute sung panin David a huh dingin lungsim a kikhat, hun khempeuh ah gal a kap thei, galdo nadingin galhiam khempeuh a nei mihing tul sawmnga ahi hi.
34 Naftali mi: Amaute sung panin galkap a ukte tulkhat le amau tawh a om lum le tei a tawi mihing tul sawmthum le tulsagih ahi hi.
35 Dan mi: Amaute sung panin galdo dingin a kithawi mihing tul sawmnih le tulgiat le zaguk ahi hi.
36 Asher mi: Amaute sung panin galdo dingin a baihsa-in a om hun khempeuh ah gal a kap thei mihing tul sawmli ahi hi.
37 Jordan gal khata om Reuben mite le Gad mite le Manasseh minam alangte sung panin galhiam nam khempeuh tawh a kithawi mihing tul zakhat le tul sawmnih ahi hi.
38 Galkap mi ahi, galsim dingin a kithawi hih mite khempeuh, Israel tungah David kumpi-in koih ding ngaihsutna takpi tawh Hebron-ah hong pai uh hi. Tua mah bangin Israel a omlaite khempeuh zong David kumpi-in a bawl ding uh a ngaihsutna uh kikhat hi.
39 A sanggamte un amaute adingin na vaihawm khol uh ahih manin amaute tua lai-ah David tawh ni thum sung an ne tui dawnin omkhawm uh hi.
40 Israel gam sungah lungdamna om ahih manin a veengte uh Issakhar le Zebulun le Naftali ciang dong panin zong hong pai-in late le kalaohte le la-sakolte le bawngtalte tawh an hong pua-in, an tampi tak, theimohte, leenggahkeu bawkte le leenggahzu le sathau, bawngtalte le tuute, lungdam lahna-in hong puak uh hi.