LATE 95
Pasian Phatna: Thumang lote Hilhkholhna
1 Hong pai un, Topa phat ni.
Eite a hong hu,
a hong hon khia pa tungah
lungdamna la sa ni.
2 Ama omna-ah lungdamna ko-in pai ni.
Phatna late,
ama tungah lungdam takin sa ni.
3 Bang hang hiam cih leh
Topa, a lian Pasian hi a,
pasian khempeuh tungah
Kumpi lianpa ahi hi.
4 Amah in leitung khempeuh uk a,
guam thuk pen panin
mual sang pen dawn dongin
amah in a uk hi.
5 Ama bawlsa tuipite uk a,
ama bawlsa leitung zong amah in a uk hi.
6 Hong pai un, amah bia-in kun ni.
Eite hong Bawl Topa’ mai-ah
khukdin ni.
7 Bang hang hiam cih leh
amah pen eite’ Pasian hi a,
eite pen ama hong kep mite le
ama khutsunga om a tuute ihi hi.
Tuni-in hih bangin
ama hong thugen za un:
8-9 Amaute in ka nasepna
mu khin uh hinapi,
Meribah le Massah munah
na pate un kei hong ze-etin,
gamtatna tawh ka lah ding
hong kalh hun lai uh bangin,
note in na lungsim uh
khauhsak kei un.Ref 95:7-8 Heb 3:15; 4:7. Ref 95:8-9 Pai 17:1-7; Gam 20:2-13.
10 Kum sawmli sung tua minam ka kih a,
“Amaute pen a lungsim uhah
a khial mi hi a,
amaute in ka thupiakte
mang lo uh hi,” ka ci hi.
11 Tua ahih ciangin keima nopsakna munah
amaute a lut lo dingin
sinso kawmin ka kiciam hi.Ref 95:7-11 Heb 3:7-11. Ref 95:11 Gam 14:20-23; Thkna 1:34-36; 12:9-10; Heb 4:3,5.