LATE 81
Pasian’ Hoihna le Ama Mite A Lunggulhna
1 Eite’ thahatna Pasian’ tungah
nakpitakin la sa unla,
Jakob Pasian’ tungah
lungdamin awng un.
2 La khat phuangin, khuangno tumin,
a ngaih laiza khausai lasakna
le harp khausai lasakna
limtakin tum un.
3 Khadet, khalik,
i pawi ni-in peengkul tum un.Ref 81:3 Gam 10:10.
4 Bang hang hiam cih leh,
tua bang hih ding pen
Israel-te adingin thukham hi a,
Jakob Pasian’ biakna ngeina
a kip khat ahi hi.
5 Egypt gamah a pai lai-un
Israel mite’ tungah thupiakna-in
Ka theih ngei loh kampau khat
hih bangin ka za hi:
6 “Na liangko uha om na vangikte uh
ka hong lakkhiatsak a,
na khut uha vangikte
ka hong khiasak hi.
7 Na cihmawh uh ciangin
kei na hong sam uh a,
keimah in
note ka hong hon khia hi.
A kilang lo vanging sung panin
note kong dawng a,
Meribah tui phualte-ah
note ka hong ze-et hi.Ref 81:7 Pai 17:7; Gam 20:13.
8 Ka mite aw,
note kong thuhilh laitakin
limtakin hong ngai un.
Israel-te aw,
keima thu
a hong ngai hi hoh le-uh cin!
9 Note’ lakah
pasian dang om lo dinga,
pasian dang khat’ mai-ah
na kun kei ding uh hi.Ref 81:9 Pai 20:2-3; Thkna 5:6-7.
10 Egypt gam panin
note a hong la khia,
Topa na Pasian uh ka hi hi.
Na kam uh a golin ka un,
keimah in kong dimsak ding hi.
11 “Ahih hangin ka mite in
keima thu hong ngai lo uh a,
Israel-te in keima thu
themkha zong zui lo uh hi.
12 Tua ahih ciangin
a ut bangun a gamta dingin
amau’ lungsim khauhna bangin
ka gamtasak hi.
13 Ka mite in ka thu hong ngai-in,
keima deih bangin Israel a gamta hileh!
14 Amau’ galte khempeuh
ka zawhsak pak dinga,
amau’ galte langpangin
ka khut ka liik ding hi.
15 Kei a hong mudahte
ka mai-ah hong kun ding uh a,
amaute’ gimthuakna
kip paisuak ding hi.
16 Mangbuh hoih pen tawh
note ka hong vak dinga,
suangpi pan a khuaizu tawh
note kong gilvahsak ding hi,” a ci hi.