LATE 53
Mite’ Haina le Gitlohna
(Late 14:1-7)
1 Mihai in a lungsim sungah,
“Pasian om lo hi,”
ci-in ngaihsun hi.
Amaute sia uh hi.
A kihhuai-in gamta uh a,
a hoihin a gamta
2 A pil, Pasian a zong mi
a om uh hiam,
cih a theih nadingin
Pasian in vantung panin
mihingte hong ensuk hi.
3 Amaute khempeuh
a vekpi-un pukkhin uh hi.
A kibangin kisia kim uh a,
a hoihin a gamta
khat beek om lo hi.Ref 53:1-3 Rom 3:10-12.
4 Pasian tungah thu a ngen lo,
an nek bangin ka mite a netum,
siatna a bawlte in
thu theihtelna nei lo ahi hiam?
5 Cikmahin tua bang launa
a om ngei lo, launa lianpi
sungah amaute om uh hi.
Bang hang hiam cih leh
Pasian in migilote’ guhte
thehthang ding hi.
Pasian in amaute nial ahih manin,
amaute maizumin kikoih ding hi.
6 Zion panin Israel-te ading
hotkhiatna hong tunna ding
thu ka ngenngen hi.
Pasian in ama mite tungah
nopsakna a piakkik ciangin,
ama mi Israel-te
kipak mahmah ding uh hi.