LATE 32
Mawh Maisakna hanga Thupha
1 Ama khialhna kimaisak a,
ama mawhna a kiselcipsak mi,
thupha ngah ahi hi.
2 Topa in mawhna a khuksak loh mi,
a lungsim sungah khemna
a om lo mi, thupha ngah ahi hi.Ref 32:1-2 Rom 4:7-8.
3 Ka mawhna ka pulak loh ciangin,
sunthapai ka tautauna hangin
ka pumpi a thaneem hi.
4 Sun le zan tawntung
gim nong piakna ka thuak a,
khuakhal nisa’ kat bangin
5 Keima khialhnate
nangma tungah kong pulak a,
ka mawhna ka im kei hi.
“Ka khialhnate khempeuh
Topa’ tungah ka pulak ding hi,”
ka ci hi.
Tua ciangin ka mawhna nin
nong maisak hi.Ref 32:5 2Sam 12:13.
6 Tua ahih ciangin
nang hong kimuh theih lai-in
mihoih khempeuh,
nang tungah thu kingensak in.
Tua hileh tuikhang in
amaute ban lo ding hi.
7 Nang pen kei adingin
ka bukna mun na hi a,
haksatna pan kei hong kemin
hotkhiatna kicing nong pia hi.
8 Na pai nading lampi lakin
kong hilh dinga,
ka mit tawh hong enin
thu kong hilh ding hi.
9 A kamkaih tawh uk lohin
a phamawh, thutheihna a nei lo,
10 Migilote in gimna tampi thuak uh a,
Topa a muangte ahihleh
itna kip in a hu hi.
11 Thumante aw,
Topa tungah
lungdamin kipak un.
Lungsim man mi khempeuh aw,
lungdamin awng un!