LATE 137
Babylon-ah Sala om Manin Gimna
1 Zion khuapi
i ngaihsut khak ciangin
Babylon luite gei-ah
eite tusukin i kapkap hi.
2 Tua lai-a gialhek kungte tungah
i laiza lasaknate i khai hi;
3 bang hang hiam cih leh
ei hong man mite in
la i sak ding hong deih a,
ei hong bawlsiate in
i gualnop ding hong deihin,
“Zion late khat hong sak un,”
4 Topa’ la, gam dangah
bangci sak theih ding ihi hiam?
5 Jerusalem khuapi aw,
nang kong mangngilh taak leh
ka taklam khut buisum tahen!
6 Nang kong phawk kei a,
kei’ lungdamna a lian pen sangin
Jerusalem a sang zaw-in
kong koih kei taak leh
ka dang tawngah ka leii toncip tahen!
7 Topa aw, Jerusalem a siat hun lai-in
Edom mite in, “Sumai un, sumai un!
A bulpi dongin sumai un!”
a cih vialna uh phawk in.
8 Mi susia Babylon aw,
kote’ tungah nong bawl bangin
nang tungah hong thukpa in
lungdamna ngah tahen!Ref 137:8 Mang 18:6.*
9 Na taneute hong laksakin
suangtumpi denna-in
a hong neihsak pa in
lungdamna ngah tahen!