13
Biakinn Siat ding Jesuh’n Genkhol
(Mat 24:1-2; Luk 21:5-6)
1 Biakinn panin Jesuh a pusuah laitakin a nungzuite khat in, “Sia aw, hih biakinnte bangzah takin lian a, a suangte bangzah takin gol ahi hiam?” a ci hi.
2 Jesuh in, “Hih innte liansa-in thupi na sa mahmah hi. Ahi zongin hih innte lamna-a a kiciang suangte nih bek nangawn a kithuapna a om lo zah dongin a kiphelkek gawp hun hong tung ding hi,” ci-in a dawng hi.
Gimna Kipatna
(Mat 24:3-14; Luk 21:7-19)
3 Biakinn galkhat ah a om Oliv Mual tungah Jesuh tu-in a om laitakin Peter, James, Johan le Andru hong pai-in amauteng guak a om laitakin,
4 “Hih na thugen cik ciangin hong tung dinga, hih na thugente khempeuh hong tun ding ciangin bang lim hong om ding ahi hiam?” ci-in a dong uh hi.
5 Jesuh in amaute kiangah, “Kuamah in hong khem zawh loh nadingin na kidawm un.
6 Keima min pua-in mi tampi hong pai ding uh a, ‘Keimah, Khrih ka hi hi,’ ci-in mi tampi a khem zo ding uh hi.
7 A gamla a galkidona thute le a nai-a galkidona huging na zak uh ciangin patau kei un. Tuate a piang ding mah hi a, hun beina ding hi nai lo hi.
8 Minam khat le minam khat, kumpi khat le kumpi khat kido ding uh hi. Mun tuamtuamah zin hong liing dinga, kial zong hong tung ding hi. Hihte khempeuh pen gimna kipatna hi pan hi.
9 “Limtakin kidawm un. Note hong kimanin thukhen zumah hong kipaipih dinga, kikhopna inn sungah zong hong kisat ding hi. Ukpite le kumpite mai-ah keima thu gen nading hun na ngah ding uh hi.
10 Ahi zongin hun beina a tun ma-in mi khempeuh tungah Lungdamna Thu kihilh masa phot ding hi.
11 Note hong kimanin, thusitna a thuak dingin thukhen zumah hong kipaipih ciangin bang gen ding ihi hiam, ci-in ma lunghihmawh kei un. A thugen ding pen note hi loin Kha Siangtho ahih manin a hun tak ciangin na gen dingun a hong kisawl peuhpeuh na gen un.Ref 13:9-11 Mat 10:17-20; Luk 12:11-12
12 Unau khatlekhat a sih nadingun kikhia ding uh a, pa in a ta khia-in, ta in a nu le a pate khia-in a thatsak ding uh hi.
13 Keima hangin Gentail mi khempeuh in note hong mudah ding uh a, ahi zongin a sih dongun a thuak zote in hotkhiatna a ngah ding uh hi.Ref 13:13 Mat 10:22
Gimna Lianpi
(Mat 24:15-28; Luk 21:20-24)
14 “Ama om loh nading pi-ah a lipkhaphuai zehphitna a hong om na muh uh ciangin (hih lai a simte in Jesuh’ cihnopna thei ta un!) Judea gam a om mite mualtungah tai un.Ref 13:14 Dan 9:27; 11:31; 12:11
15 A innkhum zangah a om laitak ahi khate zong, a kumsuk ciangin a neihsate a taipih dingin a la dingin a inn sungah lut nawn kei hen.
16 Lolai-ah a om laitak ahi khate zong, a puan la dingin a inn uh zuan nawn kei hen.Ref 13:15-16 Luk 17:31
17 Tua laitakin nupi naupaiite le naungek neite adingin haksa mahmah ding hi.
18 Phalbi laitakin hih thu hong piankhak loh nadingin thu na ngen un.
19 Bang hang hiam cih leh Pasian in leitung a piansak cil a kipanin tuhun dong, cikmahin tua bang haksatna a om ngei lo, nidang ciangin zong a om ngei nawn lo ding, tua hun laitakin hong tung ding hi.Ref 13:19 Dan 12:1; Mang 7:14
20 Topa in tua gimna hun a ni khiam lo hileh a suakta zo kuamah om lo ding hi. Ahi zongin ama teel mite a khualna-in a ni a khiam hi.
21 “Tua laitakin mi khatpeuh in, ‘Hih lai-ah Khrih om hi; hua lai-ah Khrih om hi,’ ci-in hong gen leh, um kei un.
22 Bang hang hiam cih leh Khrih kineihkhemte le kamsang kineihkhemte hong piang dinga, ahih zawh leh a teelsa mite nangawn a khem nadingun lim le na lamdangte hong bawl ding uh hi.
23 Tua ahih manin kidawm un! A hun ma-in kong genkhin hi.
Mihing Tapa Hong Paina
(Mat 24:29-31; Luk 21:25-28)
24 “Tua haksatna hun khit ciangin ni hong mial dinga, kha hong taang nawn lo ding hi.Ref 13:24 Isa 13:10; Ezk 32:7; Joel 2:10, 31; 3:15; Mang 6:12
25 Van panin aksite hong kia dinga, vantung a om nate a omngei bangin om thei nawn lo ding hi.Ref 13:25 Isa 34:4; Joel 2:10; Mang 6:13
26 Tua ciangin Mihing Tapa, vangliatna le minthanna tawh meii lakah a hong paisuk kimu ding hi.Ref 13:26 Dan 7:13; Mang 1:7
27 Tua ciangin leitung mun khempeuh ah vantung mite sawl dinga, leimong khat pan mong khat kikalah a om a teel mite khempeuh a kaikhawmsak ding hi.
Theikung’ Thuhilhna
(Mat 24:32-35; Luk 21:29-33)
28 Theikung tung pan a thupiang panin thu thei un. A hiangte hong meeng a, a teh hong no ciangin khuakhal hun hong naita ding hi, ci-in na thei un.
29 Tua mah bangin hih thute hong tun ciangin amah hong naita a, hong tung dektak hi, ci-in na thei un.
30 Hih thu limtakin phawk un. Tu laitakin a nungta mi khempeuh a sih khit ma-in hih thute hong tung ding hi.
31 Van le lei mangthang dinga, ahi zongin ka thugente mangthang ngei lo ding hi.
A Ni le A Nai Hun Kuamah’n Thei lo
(Mat 24:36-42; Luk 17:26-30, 34-36)
32 “Ahi zongin tua ni le tua nai hun ding kuamah in thei lo hi. Vantunga om vantung mite ahi a, Tapa ahi keimah in ahi zongin ka thei kei a, ka Pa bek in a thei hi.Ref 13:32 Mat 24:36
33 Tua hun ding thei lo na hih manun kikemin pilvang un.
34 Mi khat khualzin dingin pai khia a, a dinkhiat ding ciangin amau’ sep ding ciat a nasemte tungah tavuan pia a, kongcing pa in limtakin a cin ding a sawl mipa tawh kibang hi.Ref 13:34 Luk 12:36-38
35 Inn nei pa, nitak ahi a, zankim ahi a, zingsang ak khuankuan ahi a, zingsang khuavak khit ahi zongin a bang hunin hong tung ding cih thei lo na hih manun ngakin na pilvang un.
36 Tua hikeileh amah thakhatin hong tungin na ihmut laitakun hong tuakkha ding hi.
37 Note tungah kong gen mah bangin mi khempeuh tungah zong, ‘Ngakin na pilvang un,’ ka ci hi,” a ci hi.