11
Ganhing a Siang le a Nin
(Thkna 14:3-21)
1 Topa in Moses le Aaron tungah,
2 “Israel mite kiangah hih bangin gen un: Hihte pen leitunga om ganhing khempeuh lak panin na nek theih ding uh a nungta ganhing ahi hi.
3 Ganhingte lak panin a khecin a ka, eknel a hai peuhmah na ne thei ding uh hi.
4 Ahi zongin eknel haite lak pan hitaleh khecin-kate lak pan hitaleh, note in na nek theih loh dingte uh: Kalaoh in eknel a hai hangin a khecin ka lo ahih ciangin note adingin a nin ahi hi.
5 Sakikh ganhing in eknel a hai hangin a khecin ka lo ahih ciangin note adingin a nin ahi hi.
6 Bilpi in eknel a hai hangin a khecin ka lo ahih ciangin note adingin a nin ahi hi.
7 Vok pen khecin ka ahih hangin eknel hai lo ahih ciangin note adingin a nin ahi hi.
8 Note in tuate’ sa na ne kei ding uh a, a sisate zong na lawng kei ding uh hi. Tuate pen note adingin a nin ahi hi.
9 “Tui sunga omte sung panin nek theih dingte: Tuipi sung hitaleh gun sung hitaleh tui sungah a om phe le lip a neite peuhmah na ne thei ding uh hi.
10 Ahih hangin tuipi sung, gun sunga om phe le lip a nei lo, tui sunga a hontat ganhingte le tui sunga a nungta ganhingte pen note adingin a kihhuai ahi hi.
11 Tuate pen note adingin a kihhuai hi ding hi. Note in tuate’ sa na ne kei ding uh a, a sisate zong na kih ding uh hi.
12 Tui sunga a omte sung panin phe le lip a nei lo peuhmah note adingin a kihhuai ahi hi.
13 “Vasate lak panin note in na kih ding uh, a kine lo ding, a kihhuaite: Muvanlai, mupi, luimu,
14 mumeika, musan nam khempeuh,
15 va-ak nam khempeuh,
16 vasa-kalaoh, pengpelep, vatawt, musi nam khempeuh,
17 keising, tuimu, gun vakang,
18 gam vatawt, tui vatawt, musane,
19 gun vapi, gun vazonei nam khempeuh, huihtun le bak ahi hi.
20 “Khe li tawh a pai, kha a nei ganhing khempeuhte, note adingin a kihhuai ahi hi.
21 Ahi zongin khe li tawh a pai, kha a nei ganhingte khempeuh lak panin leitungah a tuan nadingun a khepek uh tawh kizom ngaltak tawn a neite na ne thei ding uh hi.
22 Tuate lak panin na nek theih dingte uh: Kauphe kitom nam khempeuh, kauphe zol nam khempeuh, khuangbai nam khempeuh le kauphe kisau nam khempeuh ahi hi.
23 Ahih hangin khe li nei-in kha a nei ganhing dangte khempeuh note adingin a kihhuai ahi hi.
24 “Hihte tawh note a nin na suak ding uh hi. A sisa a lawng peuhmahte a nitak mateng a nin hi dinga,
25 a sisa themkhat a pua peuhmah in a puan sawpin, a nitak mateng a nin hi ding hi.
26 A khecin a ka ahih hangin eknel a hai lo ganhing peuhmah note adingin a nin ahi hi. Tuate a lawng peuhmah a nin hi ding hi.
27 Khe li tawh a pai ganhingte khempeuh lak panin amau’ khebom tawh a paite khempeuh note adingin a nin ahi hi. Tuate a sisa a lawngkha peuhmahte a nitak dong a nin hi dinga,
28 a sisa a puapa in a puan sawpin, a nitak mateng a nin hi ding hi. Tuate note adingin a nin ahi hi.
29 “Leitungah a vak kawikawi, a pai thei ganhingte lak panin note adingin a ninte: Savokphual, zusa, innhikpi nam khempeuh,
30 tawlbawkpi, tang, tangteuh le sehnel gam thankik ahi hi.
31 A hontat ganhing khempeuhte lak panin hihte pen note adingin a nin ahi hi. Tuate a sisa a lawng peuhmah a nitak mateng a nin hi ding hi.
32 Tuate a sisa khat peuhpeuh a tukna nate, sing nazat, puan, savun, ippi le na khat peuhpeuhin a kizang beel khat peuhpeuh hitaleh a nin hi ding hi. Tuate pen tui sungah kidiah dinga, a nitak mateng a nin hi ding hi. Tua khit ciangin a siang hi ding hi.
33 Tuate khat peuhpeuh leibeel khat peuhpeuh sungah a kiat leh, tua sunga om khempeuh a nin hi dinga, note in tua beel na sukham ding uh hi.
34 Tua leibeel sungah a om a kine thei ding an tungah tua bang tui a tuk leh a nin hi ding hi. Tua bang beel sunga om dawn theih ding peuhmah a nin hi ding hi.
35 Tua bang a sisa themkhat a tukna peuhmah a nin hi ding hi. Meibung hitaleh beelpei hitaleh kisuzan ding hi. Tuate a nin hi a, note adingin a kihhuai ahi hi.
36 Ahi zongin tuinak le tuibeem ahihleh a siang hi dinga, ahih hangin a sisate a lawng peuhmah a nin hi ding hi.
37 A kivawh ding khaici tungah tua a sisate themkhat a tuk leh, tua khaici a siang hi ding hi.
38 Ahih hangin khaici tui kidiah a, tua a sisate themkhat tua khaici tungah a tuk leh, note adingin tua khaici a nin ahi hi.
39 “Note’ nek theih ding ganhing khat peuhpeuh a sih leh a sisa a lawng pa pen a nitak mateng a nin hi dinga,
40 a sisa a ne pa in ama puante sawpin a nitak mateng a nin hi ding hi. A sisa a puapa in zong ama puante sawpin a nitak mateng a nin hi ding hi.
41 “Leitungah a hontat ganhing peuhmah a kihhuai hi a, tuate kine lo ding hi.
42 A awmtal peuhmah le khe li-a a pai peuhmah, ahih kei leh khe tampi a nei, leitungah a pai a hontat ganhing khempeuh, note in na ne kei ding uh hi. Bang hang hiam cih leh tuate pen a kihhuai ahi hi.
43 A hontat ganhing khat peuhpeuh tawh nomau mah a kihhuai-in na kibawltawm kei ding uh a, tuate tawh nomau na kininsak tawm kei ding uh hi. Na kinitsak tawm uhleh a nin na suak ding uh hi.
44 Kei pen Topa na Pasian uh ka hi hi. Tua ahih ciangin note ki-ap unla, kei siangtho ka hih manin note zong siangtho un. Leitungah a bokvak a hontat ganhing khat peuhpeuh tawh note na kininsak tawm kei ding uh hi.Ref 11:44 Siam 19:2; 1Pe 1:16.*
45 Bang hang hiam cih leh note’ Pasian ahi dingin Egypt gam panin note a hong pai khiatpih pa pen keimah Topa ka hi hi. Tua ahih ciangin kei siangtho ka hih manin note na siangtho ding uh hi,” a ci hi.
46-47 Hih pen a nin le a siang, a nungta ganhing nek theih ding le nek theih loh ding khen nadingin ganhing le vasa, tui sunga a pai a nungta ganhing khempeuh le leitungah a hontat ganhing khempeuh tawh kisai-in ngeina ahi hi.