25
Jerusalem A Pukna
(Jer 39:1-7; 52:3-11; 2Khang 36:13-21)
1 Tua ciangin Zedekiah in Babylon kumpipa lehdo hi. Tua ahih manin ama uk a kum kuana, tua kum a kha sawmna, tua kha a ni sawm ni-in Babylon kumpipa Nebukhadnezzar a galkap khempeuh tawh Jerusalem a sim dingin hong kuanin tua khua a umcih uh hi. Tua ciangin amaute in a kimkotah umcih nading panmun a bawl uh hi.Ref 25:1 Jer 21:1-10; 34:1-5; Ezk 24:2.*
2 Tua ahih ciangin Kumpi Zedekiah’ kum sawm le kum khatna kum dong tua khuapi ki-umcih hi.
3 A kha lina a ni kua ni-in tua khuapi sungah kialpi nasia mahmah ahih manin tua gam mite ading an om lo hi.
4 Tua ciangin khuapikulh sulet uh hi. Khaldea mite khuapi kiimah a ompi mahin, kumpipa’ huan kiang lam kulhpi nih kikal kulhkongpi lampi zui-in kumpipa le a galhang mi khempeuh zanin a tai uh hi. Arabah lam manawhin amaute pai uh hi.Ref 25:4 Ezk 33:21.*
5 Ahih hangin Khaldea mite’ galkapte in kumpipa delh uh a, Jerikho zanglei-ah amah pha uh hi; tua ciangin a galkap khempeuh ama kiang panin kithehthang hi.
6 Tua ciangin amaute in kumpipa man uh a, ama tungah thukhenna a pia, Riblah-a Babylon kumpipa kiangah amah paipih uh hi.
7 Amaute in Zedekiah’ muhna-ah a tapate thatin, Zedekiah’ mitte khel khia uh a, amah kol bulhin Babylon-ah a paipih uh hi.Ref 25:7 Ezk 12:13.*
Judah Mite A Kimatna
(2Khang 36:17-21; Jer 39:8-10; 52:12-30)
8 A kha ngana, tua kha a ni sagih ni-in, Babylon Kumpi Nebukhadnezzar’ kum sawm le kum kuana kumin, Babylon kumpipa’ nasem, amah a cingte a ukpa Nebuzaradan Jerusalem-ah hong pai hi.
9 Amah in Topa’ biakinn a kipan kumpipa’ inn le Jerusalem khua sunga om inn khempeuh hal a, inn lian khempeuh amah in haltum hi.Ref 25:9 1Kum 9:8.*
10 Tua ciangin a cingte a ukpa tawh a om Khaldea mi galkapte khempeuh in Jerusalem kimkota kulhpi susia uh hi.
11 Tua ciangin a cingte a ukpa Nebuzaradan in khuapi sungah a kinusia a omlai mite le Babylon kumpipa a taisan mite, mihonpi a omlai teng khempeuh salin paipih khawm hi.
12 Ahih hangin a cingte a ukpa in leenggui lote a en ding le lo kho dingin tua gammi a zawng pente pawlkhat nusia lai hi.
13 Tua ciangin Topa’ biakinn sungah a om sumngo khuampite, Topa’ biakinn sungah a om tuikuang kingaknate le sumngo tuikuangpi, Khaldea mite in satnen uh a, Babylon-ah a sumngo pua uh hi.Ref 25:13 1Kum 7:15-26; 2Khang 3:15-17; 4:2-5.*
14 Tua ciangin amaute in beelte, kawbiate, taitehte, paknamtui adingin pakante le biakinn sung nasepna a kizang sumngo nazatte khempeuh,Ref 25:14 1Kum 7:45; 2Khang 4:16.*
15 vutluahna le haite la khia uh hi. A cingte a ukpa in kham ahite kham mahin la-in, ngun ahite a ngun mahin a la hi.
16 Solomon in Topa’ biakinn a dinga a bawl khuampi nihte, tuikuangpi khat le a kingaknate, sumngo tawh kibawl hih nazatte khempeuh ahihleh tawi teh zawh ding hi lo hi.
17 Khuampi khat a sanna pi sawmnih le sagih hi a, tua tungah sumngo khuamluzepna khat om hi; khuamluzepna a sanna pi li le alang ahi hi. Sumngo tawh a kibawl ngen banga kikalh simsiam le mang kawlsingte khuamluzepna kimkotah om hi. A khuampi nihna zong tua mah bangin, ngen banga kikalh simsiam tawh ahi hi.
18 Tua ciangin a cingte a ukpa in siampi lianpa Seraiah, siampi nihna Zefaniah le kong a cing mi thumte a la hi.
19 Tua ciangin khuapi panin galkapte a uk ngei ulian khat le khuapi sungah a om kumpipa’ thukuppihte mi nga a la hi. Tua ciangin gam sung mite a khawm galkapte a ukpa’ lai-at pa a la hi. Tua ciangin khuapi sungah a om tua gam sung mi sawmguk a la hi.
20 Tua ciangin a cingte a ukpa Nebuzaradan in amaute la-in Riblah-a Babylon kumpipa kiangah amaute a paipih hi.
21 Tua ciangin Babylon kumpipa in amaute vat a, Hamath gam sung Riblah-ah amaute a that hi. Tua ahih ciangin amau’ gam panin salin Judah mite kila khia hi.
A Omlaite Egypt-ah Tai
(Jer 40:7-9; 41:1-3)
22 Tua ciangin Judah gam sungah a omlai, Babylon kumpipa Nebukhadnezzar in a nusiatte tungah a uk dingin Shafan’ tapa Ahikam, a tapa Gedaliah amah in a seh hi.
23 Tu-in gam sunga om galkap a ukte le a mite in Babylon kumpipa in a uk dingin Gedaliah a sehna thu a zak uh ciangin amaute a mite uh tawh Mizpah-a Gedaliah kiangah hong pai uh hi. Tuate pen Nethaniah’ tapa Ishmael, Kareah’ tapa Johanan, Netofah mi Tanhumeth’ tapa Seraiah le Maakath mi Jaazaniah ahi uh hi.
24 Tua ciangin amaute le a mite uh tungah Gedaliah kiciamin, “Khaldea mi uliante’ hangin lau kei un; gam sungah teengin, Babylon kumpipa’ na sem un. Tua hileh note adingin thu hong nuam ding hi,” a ci hi.Ref 25:22-24 Jer 40:7-9.*
25 Ahih hangin a kha sagihna sungin kumpi innkuan sung panin Elishama’ tapa Nethaniah, a tapa Ishmael mihing sawm tawh hong kuanin Gedaliah le Mizpah-ah amah tawh a om Judah mi le Khaldea mite simin a that hi.Ref 25:25 Jer 41:1-3.*
26 Tua ciangin a lian a neu-in mi khempeuh le galkap a ukte kithawi-in Egypt-ah pai uh hi; bang hang hiam cih leh amaute in Khaldea mite kihta uh hi.Ref 25:26 Jer 43:5-7.*
Babylon-ah Jehoiakhin Kikhahin Kipahtawi
(Jer 52:31-34)
27 Judah kumpi Jehoiakhin thong sungah a om zawh kum sawmthum le kum sagihna kum, kha sawm le nihna, tua kha ni sawmnih le sagih ni, Babylon kumpipa Evilmerodak in uk ding a kipat kumin, hehpihna tawh thong panin Judah kumpi Jehoiakhin a khah hi.
28 Amah in migitna kam tawh amah hopih a, Babylon sunga amah tawh a om kumpi a mat dangte khempeuh sangin a sang zaw-in amah a pahtawi hi.
29 Tua ahih ciangin Jehoiakhin in a thong puante suah khia hi. Tua ciangin a nuntak sung nisimin kumpipa’ sabuai-ah a manmanin an a ne hi.
30 Tua ciangin ama ngahthuap dingin, amah a nuntaksung tawntung nisimin tanh khat, a manmanin ngahthuapna ama tungah kumpipa in a pia hi.