21
Nungzui Sagihte tungah Jesuh Kilang
1 Tua khit ciangin a nungzuite omna Tiberias Tuili gei-ah Jesuh kilang leuleu a, a thu pianzia hih bang ahi hi:
2 Simon Peter, Unau Peeng minno a nei Thomas, Galilee gam Kana khuami Nethanel, Zebedi’ tapate le nungzui dang nihte mun khatah a omkhawm uh hi.
3 Simon Peter in a lawmte kiangah, “Kei, ngasa bengin kuan ning,” ci-in a gen leh a lawmte in, “Ko zong hong kuan nung,” ci uh ahih manin, amaute kuan khia-in gunkuang tungah a tuang uh hi. Ahi zongin tua zanin ngasa khat zong man lo uh hi.Ref 21:3 Luk 5:5
4 Zingsang khua a vak ciangin tui gei-ah Jesuh dinga, ahi zongin a nungzuite in amah ahih lam thei lo uh hi.
5 Jesuh in amaute kiangah, “Tangvalte aw, ngasa na man uh hiam?” ci-in a dot leh amaute in, “Bangmah ka man kei uh hi,” ci-in a dawng uh hi.
6 Tua ciangin amah in, “Na gunkuang taklam pang uhah na ngen uh paai le-uhcin na man ding uh hi,” a ci hi. Amaute in zong a ngen uh paai uh a, ngasa tam awk lua ahih manin a ngen uh a kai zo kei uh hi.Ref 21:6 Luk 5:6
7 Tua ciangin Jesuh in a it nungzui pa in Peter kiangah, “Topa hi!” a ci hi. Simon Peter in Topa ahihna thu a zak ciangin (a nga betna uhah a puante uh suah khia uh ahih manin) a puan silh buatbuatin tui sungah a leeng khia hi.
8 Nungzui dangte ahihleh gunkuang mahah tuangin a ngen uh tawh ngasa a dimtakin a hong kai uh hi. Tua lai mun le a tui gei pen pi zathum bang bek kigamla hi.
9 Tui gei a tun uh ciangin mei-am tungah ngasa le anlum a ki-em a mu uh hi.
10 Jesuh in amaute kiangah, “Tu-a na ngasa matte uh pawlkhat hong paipih un,” ci-in a gen ciangin
11 Simon Peter zong gunkuang tungah va kahin ngasa a dimin a om ngen va kai a, ngasa a vekpi-in za le sawmnga le thum pha-in tam mahmah napi-in a ngen uh themkhat zong kikeek lo hi.
12 Tua ciangin Jesuh in amaute kiangah, “Hong pai un; zing an ne ni,” a ci hi. Amah pen Topa ahih lamtak thei uh ahih manin, “Nang kua na hi hiam?” ci-in a nungzuite khat beek in dong ngam lo uh hi.
13 Jesuh hong pai-in anlum la-in amaute tungah pia a, tua mah bangin ngasa zong a pia hi.
14 Hih pen sihna panin Jesuh a kithawhkiksak khit zawh nungzuite tungah a kilah a thum veina hita hi.
Ka Tuute Kem In
15 An a nek khit uh ciangin Jesuh in Simon Peter kiangah, “Johan’ tapa Simon aw, hih adang khempeuhte’ hong it sangin kei na hong nak it zaw hiam?” ci-in a dot ciangin amah in, “Topa aw, ka hong it zaw hi. Nang ka hong itna na thei hi,” ci-in a dawng hi.
16 Tua ciangin Jesuh in, “Ka tuunote na kem in,” a ci hi. Tua ciangin Jesuh in a nihveina dong leuleu a, “Johan’ tapa Simon aw, kei na hong it hiam?” ci-in a dot ciangin, “Topa aw, nang ka hong it a, ka hong itna thu na thei hi,” a cih ciangin, “Ka tuute na kem in,” a ci leuleu hi.
17 Jesuh in a thumveina dong leuleu a, “Johan’ tapa Simon aw, kei na hong it hiam?” a cih ciangin, “Kei na hong it hiam?” ci-in thumvei tak a dotna hangin Peter zong a dah suak hi. Tua ahih manin, “Topa aw, nangmah in na khempeuh na thei a, nangmah ka hong itna thu zong na thei hi,” ci-in a dawn ciangin Jesuh in, “Ka tuute na kem in.
18 A mantakin ci lehang, na khangno lai-in na kawnggak gakin na utna peuhah na pai zialzial thei hi. Ahi zongin na khangham ciangin na khutte na zan dinga, midangte in na khutte hong henin na ut loh napi ah hong paipih ding uh hi,” a ci hi.
19 (Hih bangin a thugenna pen Peter a sih nading zia le Pasian’ min a thansak nading thu a gen nopna ahi hi.) Tua ciangin Jesuh in Peter kiangah, “Hong zui un,” a ci hi.
Jesuh’ It Nungzui pa
20 Peter a kihei ciangin, nitak an a nek lai-un Jesuh’ gei-ah tu-in, “Topa aw, nang kua in hong lehhek ding ahi hiam?” ci-in a dong, Jesuh’ it a nungzui pa ama nungah a om a mu hi.Ref 21:20 Joh 13:25
21 Peter in amah a muh ciangin Jesuh kiangah, “Topa aw, hih mipa bangci ding ahi hiam?” ci-in a dot leh
22 Jesuh in, “Ka hong paikik mateng amah a nungta dingin ka deih nakleh nang bang phamawh sa na hi hiam? Nangmah in ka nung hong zui peuh in,” ci-in a dawng hi.
23 Tua ahih manin hih nungzui pa si lo ding hi, ci-in a nungzuite lakah a kigen hi. Ahi zongin Jesuh in, “Amah si lo ding hi,” a ci hi loin, “Ka hong paikik mateng amah a nungta dingin ka deih nakleh nang bang phamawh sa na hi hiam?” a ci bek ahi hi.
24 Jesuh in tua a cih nungzui pa pen hih thute genin lai sungah a gelh pa hi a, ama thugente a mantaktak hi, ci-in ka thei uh hi.
25 Jesuh in a sep thute tampi tak omlai hi. A sep khempeuh a ban banin laibu sungah a kigelh hileh a laibute pen leitungah ta zo lo ding hi, ci-in ka um hi.