62
1 Zion a kihotkhiatna thu
khuavak bangin
a taankhiat mateng,
ama gualzawhna thu
meivak kuang bangin
a taankhiat matengin,
Zion ka ngaihsutna-in
gamdai takin ka om mawk kei dinga,
Jerusalem ka ngaihsutna-in
ka khawl mawk kei ding hi.
2 Minamte in na gualzawhna mu ding uh a,
kumpi khempeuh in
na minthanna mu ding uh hi.
Topa in nang a hong phuah
min thak tawh nang hong kisam ding hi.
3 Nang pen Topa adingin
hotkhiatna lukhu,
na Pasian adingin
kumpi lukhu tawh na kibang ding hi.
4 Nang pen a kinusia,
hong kici nawn lo dinga,
na leitang pen Gamkhing,
kici nawn lo ding hi.
Nang pen ama tungah ka lungkimna om,
hong kici dinga,
na leitang pen a Kiteenpih,
kici ding hi.
Bang hang hiam cih leh
nang tungah Topa lungkim a,
na leitang pen
a kiteenpih zi tawh kibang ding hi.
5 Bang hang hiam cih leh tangval in
nungak khat a teenpih mah bangin
nang hong lam pa in
nang hong teenpih dinga,
zipi pa mothak nu tungah
a lungdam mah bangin
nang tungah na Pasian
6-7 Jerusalem aw, na kulhte tungah
galvilte ka koih khin a,
sun tawntung le zan tawntungin
amaute gamdai ngei lo ding uh hi.
Amaute in a thuciamna
Topa phawksak ding uh a,
amah in Jerusalem kipsakin
leitung mite’ phat dingin
a bawlkik matengin
amaute khawl lo ding uh hi.
8 Topa in limtakin
thuciamna bawl khinzo a,
a vangliatna tawh tungsak ding hi.
“Na galte’ an dingin na ante
ka piakik nawn kei dinga,
nangma sepsa leenggahzu
gamdang mite in dawn nawn lo ding hi.
9 Ahih hangin an a kholte in ne-in
Topa na phat ding uh a,
a kaikhawmte in
keima biakinn huang sungah
a dawn ding uh hi,” ci hi.
10 Jerusalem mite aw,
kulhkongpite panin pai khia unla
a hong ciahkik na mipihte uh adingin
lam bawl khol un.
Lam zik un; lam lianpi zikin
suangtumte pai khia unla,
mite’ muh dingin lim khat khaito un.
11 Leimong dongah Topa taangko khin hi.
Jerusalem mite tungah,
“En un, no hong hon khia pa hong pai hi.
Ama sep thaman a mite hong pua a,
a gualzawhna thaman
a mite hong masuan hi,” ci un.Ref 62:11 Isa 40:10; Mang 22:12.
12 Amaute pen A Siangtho Mi,
Topa’ Hotkhiatte kici dinga,
nang pen A kizong khia,
a kinusia lo khuapi, hong kici ding hi.