6
Isaiah’ Maangmuhna le Amah A Kisapna
1 Kumpi Uzziah a sih kumin, a sang mahmah, a lian kumpi tokhom tungah Topa a tu ka mu hi. Ama kumpi puanpi pen biakinn sungteng a dim hi.Ref 6:1 2 Kum 15:7; 2Khang 26:23.
2 Ama kiimah serafim van mite a ding uh hi. Tuate in kha guk ciat nei uh hi; nih tawh a mai liahin, nih tawh a khe tuamin, nih tawh a leeng uh hi.
3 Amaute khatlekhat kisamin:
“Vanglian Topa,
siangtho, siangtho, siangtho;
leitung khempeuh
ama minthanna tawh kidim,”
ci-in awng uh hi.Ref 6:3 Mang 4:8.
4 Tua kikona aw in biakinn kongkhak khuam bulpite kiliingsak a, inn sungteng meikhu tawh a kidim hi.Ref 6:4 Mang 15:8.
5 Tua ciangin keimah in, “Gim ngah pa hi ta ing! Bang hang hiam cih leh a mawknapi ka hi hi; ka kama ka thugen khempeuh a mawkna vive hi a, a thugen khempeuh uh mawhna le nitna ahi mite lakah ka teengkha hi. Vanglian Topa, Kumpipa ka mukha khinta hi,” ka ci hi.
6 Tua ciangin serafim van mite khat, biakna tau panin taiteh tawh a teh mei-am khat a khutah tawi-in keima kiangah hong leeng hi.
7 Amah in ka muk hong bi a, “En in, hih in na muk sukha zo hi; na mawhna beita a, na khialhna kimaisak zo hi,” hong ci hi.
8 Tua ciangin, “Kua sawl dinga, eite adingin kua va pai ding ahi hiam?” Topa’ cihna aw ka za hi. Tua ciangin ke’n, “Hih lai-ah kei om ing! Kei hong sawl in,” ka ci hi.
9 Tua ciangin amah in,
“Pai inla, hih mite tungah,
‘Zaza napi tel lo;
mumu napi thei lo,’ va ci in.
10 Amaute in a mit uh tawh
a muh loh nading,
a bil uh tawh a zak loh nading,
a lungsim uh tawh
thu a theihtel loh nading,
amaute kihei-in
damna a ngah loh nadingun
hih mite’ lungsim mawlsak inla,
amau’ bil uh ngongsak inla,
a mit uh va sisak in,” hong ci hi.Ref 6:9-10 Mat 13:14-15; Mrk 4:12; Luk 8:10; Joh 12:40; Sawl 28:26-27.
11 Tua ciangin keimah in,
“Topa aw, bang tanvei
sawt ding ahi hiam?” ka ci hi.
Amah in, “Khuapi-ah a teeng
kuamah om loin hawm suakin,
innte-ah kuamah om loin,
leitang pen gamkhing suak kiuhkeuhin,
12 Topa in gamlapi-ah mite khiin khia-in,
leitungah a kinusia
mun tampi a om dong, hi ding hi.
13 Mi sawm ah khat bang
a omlai tei hangin,
taak kung le tawsaw kungte
a kiphuk khit ciangin
a bulsum a omlaite
mei tawh a kihalkik bangin
amaute zong kisusia ding hi,”
hong ci hi.
(A bulsum pen Pasian’ mite a kipatthakna ding lahna lim ahi hi.)