19
Sodom le Gomorrah a Siatna
1 vantungmi nihte Sodom ah nitakin hong tunga, Sodom khua kulhkongpi-ah Lot na tu hi. Lot in amaute a muh ciangin, amaute a dawn dingin dinga, leilakah a mai ngatin kun a,
2 “Ka tote aw, kong thum hi. Na nasem pa’ inn lamah hong kihei-in hong giak unla, na khete uh sil un. Tua ciangin zingsangin tho baihin na pai nading lam uhah pai pan un,” a ci hi. Amaute in, “Hi lo hi; khua lakah ka giak ding uh hi,” a ci uh hi.
3 Ahih hangin amah in amaute nakpitakin kun ahih manin ama lamah kihei uh a, ama inn-ah a lut uh hi. Amah in amaute adingin an bawl a, silngo sawh loh anlum emsak a, amaute in a ne uh hi.
4 Ahih hangin amaute’ lup ma-in Sodom khua mite, a moi a hamin mi khempeuh in a inn umcih uh hi.
5 Amaute in Lot sam uh a, “Tu nitak a nang kiangah hong tung mite koi-ah om ahi hiam? Amau’ taw ka luk theih nadingun ko kiangah amaute hong pai khiatpih in,” a ci uh hi.
6 Lot, kongkhak pua-ah mite kiangah pai-in kong lehkhak a,
7 “Ka sanggamte aw, tua banga na gitloh gamtat loh nading uh kong thum hi.
8 En un, ta nungak nih ka nei hi. No kiangah amaute hong pai khiatpihsak unla, na ut bangun amaute tungah gamta un. Hih mite’ tungah bangmah gamta kei bek un. Bang hang hiam cih leh amaute, keima inn sung hong tungkhin uh ahih manin ka hut ding kisam hi,” a ci hi.Ref 19:5-8 Thkna 19:22-24.*
9 Ahih hangin amaute in, “Tai khia in. Kote kiangah hong peem pak a, tu-in nang thukhen hong kineih ding na hi hiam? Tu-in amaute sangin nang kong siatbawl zaw ding uh hi,” a ci uh hi. Tua ciangin amaute in nakpitakin Lot’ lam hong neh uh a, kongkhak a phukham zah dongin hong neh uh hi.
10 Ahih hangin mi nihte in amau’ khut hong zanin inn sung amau’ kiangah Lot paipihin kong khak uh hi.
11 Inn kongkhak ah a om mi a lian a neute, amaute in a mit uh tawsak uh hi. Tua ahih ciangin kongkhak a zawtzawt hangun mu zo lo uh hi.Ref 19:11 2Kum 6:18.*
Sodom Panin Lot Paikhia
12 Tua ciangin mi nihte in Lot kiangah, “Hih lai-ah tanau dang na nei hiam? Makte, tapate, ahih kei leh khua sunga nang’ mi peuhpeuh hih mun panin pai khiatpih in.
13 Bang hang hiam cih leh hih mite a kimawhsakna thu Topa’ tungah tung khin a, a susia dingin Topa in hong sawl khin ahih ciangin hih khua a susia ta ding ka hi uh hi,” a ci uh hi.
14 Tua ahih ciangin Lot pai khia-in a tanute a teenpih dingte kiangah, “Manlangin hih khua panin pai khia un. Bang hang hiam cih leh Topa in hih khuapi a susia ding hi ta hi,” a ci hi. Ahih hangin amah pen a mak dingte tungah a ciamnui bang lel hi.
15 Zingsang khuavak ciangin vantung mite in, “Khuapi gimpiakna sungah kaangtum kha ding na hih uh ciangin kinawh inla, hih lai-a om na zi le na tanute la in,” ci-in Lot sawl hamtang uh hi.
16 Ahih hangin amah lungka-in omlai veve hi. Ahi zongin Topa in ama tungah hehpihna nei ahih manin, mite in amah le a zi le a tanu nihte a khut uh tawh manin, amaute in amah pai khiatpihin khua pualamah koih uh hi.Ref 19:16 2Pe 2:7.*
17 Amaute in a pai khiatpih khit uh ciangin, “Na nuntak nadingun tai un. Nunghei kei unla, kuam sungah zong khawl kei un. Note hong kaangtum kha ding ahih manin mualtungah taito un,” a ci uh hi.
18 Ahi zongin Lot in amaute tungah, “Hi lo hi, ka tote aw;
19 en un, note’ muhna-ah na nasem pa in maipha mu zo a, ka nuntakna nong hutna uhah migitna lianpi kei tungah nong lak khin uh hi. Ahih hangin mual tung gamla ahih manin ka tun ma-in siatna in kei hong pha-in ka si ding hi.
20 En un, gal-a om khuapi, tai nadingin nai a, khuapi neu khat ahi hi. Tua lai-ah hong taisak un - khuapi neu khat hi lo ahi hiam? tua hileh ka suakta ding hi,” a ci hi.
21 Amah in ama kiangah, “En in, na gensa khuapi ka lumlet loh nading, hih maipha zong nang kong pia hi.
22 Kinawh inla, tua lai-ah tai in. Bang hang hiam cih leh tua lai-ah nang na tun mateng ke’n bangmah ka hih thei kei hi,” a ci hi. Tua ahih ciangin tua khuapi min Zoar kici hi.
23 Zoar-ah Lot a tun ciangin tua lai-ah ni suak khinta hi.
24 Tua ciangin Topa in vantung panin Sodom le Gomorrah khuate tungah kaat le meikuang zusak hi.
25 Amah in tua khuapite, kuamte khempeuh, khuapite sunga mi teengte khempeuh le leitunga a po khempeuh a susia hi.Ref 19:24-25 Mat 10:15; 11:23-24; Luk 10:12; 17:29; 2Pe 2:6; Jude 7.*
26 Ahih hangin a nunga om Lot’ zi nunghei a, amah ci khuam a suak hi.Ref 19:26 Luk 17:32*
27 Topa’ mai-a a dinnasa munah zingsang tungin Abraham va pai hi.
28 Sodom le Gomorrah le kuamte khempeuh lam nga sukin khuadak a, leitang khu pen, meiphualpi khu bangin a kah to a mu hi.
29 Pasian in kuam sunga khuapite a suksiat lai-in, amah in Abraham phawk a, amah in Lot’ tenna khuapite a suksiat ciangin tua bang a suksiatna sung panin Lot sawl khia ahih manin a suakta ahi hi.
Moab mite le Ammon mite’ Pianna
30 Tu-in Zoar panin Lot pai khia to-in a tanu nihte tawh mualtungah a teeng hi. Bang hang hiam cih leh Zoar-ah a ten ding lau hi. Tua ahih ciangin a tanu nihte tawh suanghawm sung khatah a teeng uh hi.
31 A u pen in a nau tungah, “I pa lah teek ta a, leitung ngeina bangin eite hong luppih ding pasal khat zong om lo hi.
32 Hong pai in; i pa leenggahzu khamsak ni; i pa tawh suanlekhak i kizopsak theih nadingin amah tawh lumkhawm ni,” a ci hi.
33 Tua ahih ciangin amaute in tua nitakin a pa uh leenggahzu khamsak uh hi. A unu pai-in a pa tawh lum hi. A tanu a luplam hitaleh a thawhlam hitaleh amah in phawk lo hi.
34 A zing ciangin a u in a nau tungah, “En in, zan zanin i pa tawh ka lum hi. Tu nitakin zong amah leenggahzu khamsak leuleu ni. Tua ciangin nang pai inla, i pa tawh suanlekhak i kizopsak theih nadingin amah tawh lumkhawm in,” a ci hi.
35 Tua ahih ciangin amaute in tua nitakin zong a pa uh leenggahzu khamsak uh hi. A nau pai-in amah tawh lum hi. A tanu a luplam hitaleh a thawhlam hitaleh amah in phawk lo hi.
36 Tua ahih ciangin Lot’ tanu tegel in a pa uh tawh naupaii uh hi.
37 A u in tapa khat nei-in a min Moab phuak a, amah pen tuhuna Moab mite’ pianna pupi ahi hi.
38 A nau in zong tapa khat nei-in a min Benammi phuak a, amah pen tu donga Ammon mite’ pianna pupi ahi hi.