PIANCILNA
(Genesis)
Thupatna
Piancilna cih kammal pen ‘kipatna’ a cihna ahi hi. Hih laibu sungah van le lei a kipiansakna, mihing hong kipat khiatna leitungah mawhna le gimna hong kipatna, Pasian in mihingte tungah na hong sepna ziate kigen hi. Piancilna laibu a thu khen nih kisuah thei hi.
1. A lian 1—11. Leitung a kipiansakna le mihing a piang masate thu ahi hi. Hih sung tengah Adam le Eve, Kain le Abel, Noah le tuiciin le Babel Tausangpi thute a om hi.
2. A lian 12—50. Israel mite’ pianna pupi masate’ thu a om hi. A masa pen Abraham hi a, Pasian a upna le a thu a manna hangin a minthang khat ahi hi. Tua ciangin ama tapa Isaac’ thu in hong zom a, tua ciangin a tupa Jakob (Israel zong a kici pa) in hong zom a, tua ciangin Jakob’ ta sawm le nihte in hong zom a, hih sawm le nihte pen Israel minam sawm le nihte’ hong piankhiatna ahi uh hi. Hih sung tengah, Jakob’ ta sawm le nihte’ lakah Josef a kici pa’ thu le a dangte a innkuan ciat uh tawh Egypt gamah a teeng dingin a paina thu kilim gen pha diak hi.
Hih laibu sungah mihingte’ thu kigen a, tua sung panin Pasian’ sepna bulphuhin kigen hi. Pasian in van le lei a piansakna thu tawh na kipan a, Pasian in ama mite a lunghihmawhpih tawntung nading kamciamna tawh a thu na khum hi. Hih laibu sung khempeuh ah Pasian a sem khia bulpi pa ahihna thu na gen a, amah in a khial mite tungah thu khenin gim a piakna, a mite makaihin a huhna le a mailam nuntak nading zia uh a bawlsakna thute kigelh hi. Hih laibu pen mihingte in upna a neihna thu ciamteh nading le tua upna a letkip paisuak zawh nading uh deihna tawh a kigelh ahi hi.
1
Leitung le Mihing Piansakna
1 A kipat cil-in Pasian in vantung le leitung a piangsak hi.
2 Leitung in limlemel nei loin a awngthawlpi ahi hi. Tuipi tung tengah khua mial bikbek a, tua tui tungah Pasian’ Kha in na a sem hi.
3 Pasian in, “Khuavak om hen,” ci hi; tua ciangin khuavak om pah hi.Ref1:3 2Kor 4:6.
4 Pasian in tua khuavak hoih hi, ci-in a mu hi. Pasian in khuamial panin khuavak khen khia hi.
5 Pasian in khuavak pen “Sun” ci a, khuamial pen “Zan” ci hi. Nitak hong bei-in, zingsang hong tunga, ni khat ni ahi hi.
6 Pasian in, “Tuite’ laizangah van kuumpi om henla, tua van kuumpi in tui le tui kikhensak hen,” ci hi.
7 Pasian in van kuumpi bawl a, van kuumpi tunga om tuite le van kuumpi nuai-a om tuite a khen hi. Tua mah bangin a piang pah hi.
8 Pasian in van kuumpi pen “Vantung” ci hi. Nitak hong bei-in zingsang hong tunga, ni nih ni ahi hi.Ref 1:6-8 2Pe 3:5.
9 Pasian in, “Vantungte nuai-a om tuite mun khatah kikhawm henla, lei keu kidawk hen,” ci hi. Tua mah bangin a piang pah hi.
10 Pasian in lei keu pen “Leitung” ci a, a kikaikhawm tuite pen “Tuipi” ci hi. Pasian in tua pen hoih hi, ci-in a mu hi.
11 Pasian in, “Leitung in kung tuamtuamte piangsak henla, tang a nei kungnote, a gah sungah tang a om singgah kungte, amau’ nam ciatin leitungah piangsak hen,” ci hi. Tua mah bangin a piang pah hi.
12 Leitung in kung tuamtuamte piang khiasak a, kungnote in amau’ nam ciatin tang piangsakin, singkung in a sungah tang a om gahte piangsakin, amau’ nam ciatciatin piangsak hi. Pasian in tua pen hoih hi, ci-in a mu hi.
13 Nitak hong bei-in zingsang hong tunga, ni thum ni ahi hi.
14 Pasian in, “Sun le zan a khen dingin vantungah khuavakte om hen; tuate pen pawi hun le khuahun, ni le kumte khen nading hi henla,
15 leitung khua a vaksak dingin vantungah khuavak hi uh hen,” ci hi. Tua mah bangin a piang pah hi.
16 Pasian in khuavak lian nih bawl a, khuavak lian zaw pen sun a uk ding, khuavak neu zaw pen zan a uk dingin bawl a, amah in aksite zong a bawl hi.
17-18 Leitungah khua a vaksak ding, sun le zan a uk ding, khuamial panin khuavak a khen khia dingin Pasian in vantungah tuate a koih hi. Pasian in tua pen hoih hi, ci-in a mu hi.
19 Nitak hong bei-in zingsang hong tunga, ni li ni ahi hi.
20 Pasian in, “Tuite in a nungta ganhing honpite piangsak henla, vantung kantanin leitungah vasate leeng tahen,” ci hi.
21 Tua ahih ciangin Pasian in tuipi ganhing golpite le amau nam ciatin tuipi sungah tampi a pha, nuntakna a nei a gamtang thei ganhing namkim le kha a nei vasa khempeuh amau nam ciatin a piangsak hi. Pasian in tua pen hoih hi, ci-in a mu hi.
22 Pasian in amaute thupha pia a, “Ci pha-in tampi pha-in, tuipi sung dim unla, leitungah vasate tampi pha un,” ci hi.
23 Nitak hong bei-in zingsang hong tunga, a ni nga ni ahi hi.
24 Pasian in, “Nuntakna a nei ganhingte amau nam ciatin leitung in piangsak hen: Innsa, gamsa le a bokvak ganhingte amau nam ciatin piang tahen,” a ci hi. Tua mah bangin a piang pah hi.
25 Innsa, gamsa le a bokvak ganhing khempeuh amau nam ciatin Pasian in a piangsak hi. Pasian in tua pen hoih hi, ci-in a mu hi.
26 Tua ciangin Pasian in, “Eima lim, eimah hong sunin mihing bawl ni. Tuipi ngasate tung, huihlak vasate tung, ganhingte tung le leitunga, a bokvakte tungah ukna neisak ni,” a ci hi.Ref 1:26 1Kor 11:7.
27 Tua ahih ciangin Pasian in ama lim bangin mihing piangsakin, Pasian’ lim bangin amah a piangsak hi. Amah in numei le pasal a piangsak hi.Ref 1:27 Mat 19:4; Mrk 10:6.
28 Pasian in amaute thupha pia a, Pasian in amaute tungah, “Ci pha-in tampi pha unla, leitung dimin zo un. Tuipi ngasate tung, leitungah a gamtang, a nungtate tungah ukna nei ta un,” a ci hi.Ref 1:27-28 Pian 5:1-2.
29 Pasian in, “En un, leitung maitang khempeuh ah a om, tang a piangsak kungno khempeuh le a gah sungah tang a om singkung khempeuh note tungah kong pia khinta hi. Tuate an-in na nei ding uh hi.
30 Leitung ganhing khempeuhte tung, huihlak vasate tung, leitungah a bokvakte tung, nuntakna hu a neite tungah an dingin kung hing khempeuh kong pia khinta hi,” a ci hi. Tua mah bangin a piang pah hi.
31 Pasian in a bawlsa khempeuh en a, hoihsa mahmah hi. Nitak hong bei-in zingsang hong tunga, a ni guk ni ahi hi.