6
Kumpi Sairas’ Thupiakna Kimu
1 Tua ciangin Kumpi Darias in thu pia a, Babylon khua sunga lai manphate a kisenna innte sung kizong hi.
2 Ahi zongin Babylon khua sungah na om lo a, Media gam sung kumpi khuapi Ekbatana-ah laizial khat kimu a, tua sungah hih a nuai-a bangin a kiciamteh kimu hi:
3 “Kumpi Sairas’ kum khatna kumin Jerusalem khua-a Pasian’ biakinn tawh kisai-in kumpipa in thu pia hi: Biakna kipia-in meihal biakna a kipaipihna munah biakinn lamsakkik un. A sanna pi sawmkua, a vai pi sawmkua mah hi dinga,
4 a kawm pen suang thuap thum le sing thuap khat tawh a kibawl, thuap li hi ding hi. Hih sum beinate ahihleh kumpi sum panin kipia ding hi.
5 Nebukhadnezzar in Jerusalem biakinn panin la khia-in Babylon-ah a hong tunpih Pasian’ biakinn sunga om kham le ngun tawh kibawl umlebeelte zong kipiakik ding hi. Tuate khempeuh Jerusalem biakinn-ah kipuakik dinga, Pasian’ biakinn sunga a omna munmun ciatah kikoihkik ding hi,”
ci-in kigelh hi.
6 Tua ciangin Kumpi Darias in hih bangin thu a pia hi:
“Tu-in Eufratis Gungal gam a uk Tattenai, Shetharbozenai le Eufratis Gungal gam sung a vaan na lawmte, tua mun panin na kihem khia ding uh hi.
7 Judah mi a ukpa le a upate in hih Pasian’ biakinn a lamkik theih nadingun na tuaci omsak ding uh hi. Ama mun ngei mahah a biakinn lamsakkik un.
8 Hih a kigen Pasian’ biakinn a kilamkik theih nadingin hih Judah upate adingin na hih dingte uh zong thu kong pia hi. Hih nasepna a mawk khawl loh nadingin, Eufratis Gungal gam sung panin a kingah siahte ahi kumpi sum sung panin beina khempeuh a cingin kipia ding hi.
9 Vantung Pasian’ tungah meihal biakna-in piak dingin a kisam khempeuh - bawngtalnote, tuutalte, ahih kei leh tuunote na pia ding uh a, Jerusalem-a siampite’ hong ngetna bangin mangbuh, ci, leenggahzu, ahih kei leh sathaute, kitasam loin nisimin amaute tungah piasak un.
10 Tua hileh amaute in vantung Pasian’ tungah a namtui biaknate pia-in kumpipa le a tapate’ nuntakna ding thu hong ngetsak thei ding uh hi.
11 Tua tham loin, mi khatpeuh in hih thupiakna a siatsak leh ama inn panin a innkam khat kidawhkhiat sakin tua tungah amah kihen cipin kisat gawp dinga, tua banah a inn zong a kisuksiatna ding thu kong pia thuah lai hi.
12 Hih ka thupiakna a siasak nuam, Jerusalem-a Pasian’ biakinn a susia nuam kumpi khatpeuh ahi a, mi khatpeuh ahi zongin a om leh, ama min omna dinga tua mun a bawl Pasian in tua mipa lawnthal tahen. Keimah Darias in thu kong pia hi. Ka thupiak bang teekteekin sep ding ahi hi,”
a ci hi.
Biakinn Apna
13 Tua ciangin Kumpi Darias in amaute tungah a thupiak bang teekteekin Eufratis Gungal gam sung a uksawn Tattenai, Shetharbozenai le a lawmte in sem uh hi.
14 Tua hi a, kamsang Haggai le Iddo’ suan Zekhariah’ thugenna hangin Judah upate in a biakinn lam uh zom suakin maavang uh hi. Israel Pasian’ sawlna le Persia kumpi Sairas le Darias le Artakzaksis-te’ thupiakna tawh amaute in a biakinn lam uh a zo uh hi.Ref 6:14 Hag 1:1; Zek 1:1.
15 Tua hi a, Kumpi Darias’ kum gukna, Adar kha a ni sawm le thum ni-in a biakinn kizo hi.
16 Tua ciangin Israel mite, siampite, Levi mite le sal a suaksa a hong ciahkik mi khempeuh in lungdamna lianpi tawh Pasian’ biakinn apna a bawl uh hi.
17 Amaute in Pasian’ biakinn apna-in bawngtal zakhat, tuutal zanih le tuuno zali go uh a, mawhna hanga biak nadingin Israel-te khempeuh adingin a minam phazah tawh kizui-in keeltal sawm le nih a pia uh hi.
18 Tua ciangin Moses laibu sungah a kigelh bangin Jerusalem-a Pasian’ nasep nadingin siampite amau’ panmun ngei-ah pangsak uh a, Levi mite amau’ nasepna ngei-ah a semsakkik uh hi.
Paisan Pawi
19 A kha masa a ni sawm le li ni-in sal a suaksa a hong ciahkik mite in Paisan Pawi a bawl uh hi.Ref 6:19 Pai 12:1-20.
20 Siampite le Levi mite a vekpi-un kisiansuah khin uh a, a vekpi-un zeh siang khin uh hi. Tua hi a, amaute in sal suaksa a hong ciahkik khempeuh ading, a siampipihte uh le amau mahmah adingin Paisan tuuno a go uh hi.
21 Salsuahna panin a hong ciahkik Israel-te le Israel Pasian, Topa a bia dingin tua gam a midang a teengte le a nitna uh pan amau le amau a kihem khia tawm mite khempeuh in tua Paisan Pawi an a ne uh hi.
22 Tua hi a, amaute in lungdamna tawh ni sagih sung silngo sawh loh anlum pawi a bawl uh hi. Bang hang hiam cih leh amau’ lungdamna ding a om theih nadingin Topa in Assiria kumpipa’ lungsim amau’ tungah a nuam dingin a bawlsak hi. Tua ahih manin Israel Pasian ahi Pasian’ biakinn a sepna uhah kumpipa in amaute a huh hi.