EZEKIEL
(The Book of Ezekiel)
Thupatna
Kamsang Ezekiel pen B.C. 586 kumin Jerusalem khuapi a kiat ma le tua hun khit-a a nungta pa ahi hi. Ama thugente pen Babylon-ah salin a om mite le Jerusalem khua-ah a omlai mite tungah a kigen ahi hi. Ezekiel Laibu sunga thu omte khen lian guk kisuah a, tuate pen:
1. Pasian in kamsang nasem dingin Ezekiel a sapna.
2. Pasian in mite gim pia-in thu a khenna ding le Jerusalem khuapi pukin a kisuksiatna ding thu a hilhkholhna.
3. Ama mite bawlsia-in lam a khialsak minam tuamtuamte tungah Topa in thu a khenna tawh kisai a thugenna.
4. Jerusalem khuapi a puk khit ciangin Israel mite hehnepna le mailam hun a nop zawk nading thuciamna.
5. Kumpi Gog a siatna ding thugenna.
6. A kilamkik ding Biakinnpi le a kipanphakik amau minamte tawh kisai Ezekiel’ muhna dan.
Ezekiel pen upna thuk nei-in, thu ngaihsuttawm a siam mahmah khat ahi hi. A thu theihna tampi tak a maang sung pan a muh hi a, a thugen nopte khempeuh gamtatna tawh a kitel sinsenin a gen thei hi. Lungsim le ngaihsutna thaksuaksakna ding a kisapna le a kuamah peuh in ama mawhna ciat a pua ding ahihna thu a lim gen hi. Amau minam bup nuntakna a kithak bawlna ding a lametna zong a gen hi. Amah kamsang le siampi nasep a thuahkhawm ahih manin biakinnpi le sianthona ding a kisapna thu a kin bawl diak pa ahi hi.
1
Kamsangpa in Pasian’ Vangliatna Mu
1 Kum sawmthum ka phak kum, a kha lina, a ni nga ni-in Babylon gam a om Khebar Gun gei-ah sala om Jew midangte tawh ka om laitakin maang ka mu hi. Tua ka maangmuhna ah van hong kihong a, Pasian ka mu hi.Ref 1:1 Mang 19:11.
2 Tua hun pen Kumpi Jehoiakhin salin a kimat zawh a kum ngana, tua kha sungah a ni nga ni mah ahi hi.Ref 1:2 2Kum 24:10-16; 2Khang 36:9-10.
3 Tua Babylon gam Khebar Gun gei-ah ka om laitakin siampi Buzi’ tapa keimah Ezekiel in Topa’ hong thugenna ka za a, ama vangliatna zong kei tungah a hong tunna ka phawk hi.
4 Ka khuadak leh leilu lam panin huihpi a hong nung ka mu hi. Tua huihpi tawh a hong ton meiipi lak panin khua hong phia a, ka kimkot teng taang pempam hi. Tua khuaphiatna mun pen sumngo tawh kibangin a taang hi.
5 Tua huihpi laizangah ganhing li a om tawh a kibang pian ka mu hi. Tua ka muhte in mihing lim pua napi-in,Ref 1:5 Mang 4:6.
6 maitang li le kha li ciat a nei uh hi.
7 A khete uh mam zeza a, ahi zongin a khepekte uh bawng khe tawh kibang hi. Tua ganhingte pen a kinawtngil sumngo tawh kibang uh hi.
8 Maitang li le kha li ciat a neih ban uhah, a khaphung nuai a pangpi uh panin a meeng khia mihing khut tawh a kibang li ciat mah nei lai uh hi.
9 Tua ganhing lite in a kha nih ciat uh zalin, a mong le a mong kimatsak uh a, ki-umcihin sikli nei-in kimu hi. Amaute a gamtat uh ciangin a li-in tatkhatin tang uh ahih manin a pumpi uh kituam hei lo hi.
10 Tua ganhingte in maitang li ciat nei uh hi. Maitang ngeina lamah mihing mai, taklam pangah humpinelkai mai, veilam pangah bawngtal mai, a dek lamah muvanlai mai nei ciat uh hi.Ref 1:10 Ezk 10:14; Mang 4:7.
11 Tua ganhingte in a kha nih ciat uh zalin a zom a omte’ kha mong dawn tawh kimatsak uh a, a omlai a kha nih tegel ciat uh khupin a pumpi uh a tuam uh hi.
12 Tua ganhingte in maitang li ciat nei-in mun khempeuh a maingat suak uh ahih manin a painop uh ciangin a pumpi uh kihei kul loin a utna peuh uhah pai thei pahpah uh hi.
13 Tua ganhingte lakah meikuang tawh a kibang a phia niloh om hi. Tua meikuang pen kuang pha mahmah a, khua phiasak zaizai hi.Ref 1:13 Mang 4:5.
14 Tua ganhingte khuaphia mah bangin kin zalzal kawikawi uh hi.
15 Tua ganhing lite ka et laitakin amaute in leengpei khat ciat a neihlam uh ka mu a, a leengpeite leilakah kinga hi.
16 Tua leengpeite a vekpi-in kibang kim a, suangmanpha bangin tee uh hi. Tua leengpeite in a kikantan lamin pei khat ciat nei thuah uh ahih manin,
17 a utna lam peuhpeuhah pai thei uh hi.
18 Tua leengpei kualte tungah mittang vive a dimin om hi.Ref 1:18 Mang 4:8.
19 Tua ganhingte a kin ciangin leengpeite tawh kin khawm a, leilak panin tua ganhingte van lamah kikhangin a kahtoh ciangin a leengpeite tawh zong kikhangto khawm hi.
20 Amau’ utna peuhpeuh uhah tua ganhingte pai uh a, tua leengpeite pen a ganhingte’ khutnuai ahih manin, ganhingte’ paina peuhpeuhah a pai uh hi.
21 Tua leengpeite pen ganhingte’ khutnuai-a om ahih manin ganhingte pai leh pai-in, ganhingte khawl leh khawlin, vanah kahto leh kahto-in, a ganhingte’ tat bang teekteekin a ta uh hi.Ref 1:15-21 Ezk 10:9-13.
22 Tua ganhingte’ lu tung sanah limlang tawh a kibawl a kuum kiukiau pian khat om hi.Ref 1:22 Mang 4:6.
23 Tua a kuum nuai-ah, ganhingte in a kizompih ciatte’ lamah a kha nihte ciat zal uh a, a kha nih ciat uh tawh amau’ pumpi ciat a tuam uh hi.
24 Tua ciangin amaute’ leenna a khaging uh ka za hi. Tua a khaging pen tuipi ging, galkap honpi huging le Vanglian Pasian’ awgingte tawh kibang hi. A leen nawn loh uh ciangin a kha uh khup a,Ref 1:24 Mang 1:15; 19:6.
25 ahi zongin amaute’ lu tung sana om a kuum tung san panin awging kiza lai hi.
26 Tua kuum tungzangah, sapfaia suangmanpha tawh a kibawl kumpi tokhom bang pian khat om a, tua tokhom tungah mi tawh a kibang pian lim khat a tu hi.Ref 1:26 Ezk 10:1; Mang 4:2-3.
27 Tua tokhom tungah a tu ka muh pen meikhuk sunga kihalsan sumngo bangin taang heuhau a, a kimkot khempeuh zong tua mah bangin taang pempam hi.Ref 1:27 Ezk 8:2.
28 Tua a taang khuavak in meii lakah sakhituihup a kai ciangin a neih mel nam tuamtuam khempeuh a nei kim hi.
Topa’ vangliatna lim pen tu-a ka gen bang ahi hi. Hih bang ka muh ciangin leilakah ka boksuk a, tua ciangin awging khat ka za hi.