27
Ebal Mual tungah a Kigelh ding Thukham
(Joshua 8:30-35)
1 Tu-in Moses le Israel upate in mite thu pia-in, “Tuni-a kong gen uh thupiakna khempeuh na zui ding uh hi.
2 Topa na Pasian un note hong piak leitangah pai dingin Jordan na kantan ni-un suangtumpite na phut ding uh a, buan tawh na zut ding uh hi.
3 Na pu na pate uh Pasian ahi Topa in note tungah hong ciam mah bangin bawngnawi le khuaizu tui bangin a luanna leitang, Topa na Pasian un note hong piakna gamah a lut dingin na galkah uh ciangin tua suangte tungah hih thute na gelh ding uh hi.
4 Jordan na galkah khit uh ciangin Ebal Mual tungah tuni-a kong thupiakna uh tawh kizui-in hih suangte na phut ding uh a, buan tawh tua suangte na zut ding uh hi.
5 Tua lai-ah Topa na Pasian uh adingin suang kibawl biakna tau khat na bawl ding uh a, tuate tungah sik tawh a kibawl nazatte na liik kei ding uh hi.
6 Topa na Pasian uh adingin a kiseek lo suangtumte tawh biakna tau na bawl ding uh a, tua biakna tau tungah Topa na Pasian uh adingin meihal biaknate na pia ding uh hi.Ref 27:5-6 Pai 20:25.
7 Tua ciangin thunuama biaknate na pia ding uh a, tua lai munah ne-in, Topa na Pasian uh mai-ah na lungdam ding uh hi.
8 Hih thute khempeuh tua suangte tungah a kitel takin na gelh ding uh hi,” a ci uh hi.Ref 27:2-8 Josh 8:30-32.
9 Tua ciangin Moses le Levi siampite in Israel-te khempeuh tungah, “Israel-te aw, gamdai unla ngai un: Tuni-in Topa note’ Pasian’ mi na suak uh hi.
10 Tua ahih ciangin Topa note’ Pasian’ thu mangin, tuni-a kong gen uh ama thupiaknate le ama thukhamte na zui ding uh hi,” a ci uh hi.
Ebal Mual-ah Samsiatnate
11 Moses in tua ni mahin mite thuhilhin,
12 “Jordan na galkah khit uh ciangin mite thupha a pia dingin Gerizim Mual tungah a ding ding minamte: Simeon, Levi, Judah, Issakhar, Josef le Benjamin ahi hi.Ref 27:12 Thkna 11:29; Josh 8:33-35.
13 Ebal Mual tungah hamsia a pia dingin a ding ding minamte: Reuben, Gad, Asher, Zebulun, Dan le Naftali ahi hi.
14 Levi mite in awging lianpi tawh Israel mite khempeuh tungah hih bangin ci ding uh hi.
15 “‘Topa adingin a kihhuai ahi, khutsiampa’ khut tawh a kibawl, a kiseek ahi a, a kisung ahi zongin milim bawlin, mun simthamah a koih mipa in gimna ngah tahen,’ ci ding uh hi. Tua ciangin mi khempeuh in dawngin, ‘Amen,’ ci ding uh hi.Ref 27:15 Pai 20:4; 34:17; Siam 19:4; 26:1; Thkna 4:15-18; 5:8.
16 “‘A nu ahi a, a pa ahi zongin a zahtak lo mipa in gimna ngah tahen,’ ci ding uh hi. Tua ciangin mi khempeuh in, ‘Amen,’ ci ding uh hi.Ref 27:16 Pai 20:12; Thkna 5:16.
17 “‘A veengpa’ gisuang a bot khia mipa in gimna ngah tahen,’ ci ding uh hi. Tua ciangin mi khempeuh in, ‘Amen,’ ci ding uh hi.Ref 27:17 Thkna 19:14.
18 “‘Mittaw pa lam a lakkhial mipa in gimna ngah tahen,’ ci ding uh hi. Tua ciangin mi khempeuh in, ‘Amen,’ ci ding uh hi.Ref 27:18 Siam 19:14.
19 “‘Peemta, pa nei lo le meigong numeite ading thutang a heikhiatsak mipa in gimna ngah tahen,’ ci ding uh hi. Tua ciangin mi khempeuh in, ‘Amen,’ ci ding uh hi.Ref 27:19 Pai 22:21; 23:9; Siam 19:33-34; Thkna 24:17-18.
20 “‘Amah in a pa’ tungah maizumna tun ahih manin, a pa’ zi dang tawh a lumkhawm mipa in gimna ngah tahen,’ ci ding uh hi. Tua ciangin mi khempeuh in, ‘Amen,’ ci ding uh hi.Ref 27:20 Siam 18:8; 20:11; Thkna 22:30.
21 “‘Ganhing khat peuhpeuh tawh nulepa mawhna a bawl mipa in gimna ngah tahen,’ ci ding uh hi. Tua ciangin mi khempeuh in, ‘Amen,’ ci ding uh hi.Ref 27:21 Pai 22:19; Siam 18:23; 20:15.
22 “‘A nu’ tanu, a pa’ tanu, ahih kei leh a sanggamnu tawh a lumkhawm mipa in gimna ngah tahen,’ ci ding uh hi. Tua ciangin mi khempeuh in, ‘Amen,’ ci ding uh hi.Ref 27:22 Siam 18:9; 20:17.
23 “‘A sungnu tawh a lumkhawm mipa in gimna ngah tahen,’ ci ding uh hi. Tua ciangin mi khempeuh in, ‘Amen,’ ci ding uh hi.Ref 27:23 Siam 18:17; 20:14.
24 “‘A veengpa a thatsim mipa in gimna ngah tahen,’ ci ding uh hi. Tua ciangin mi khempeuh in, ‘Amen,’ ci ding uh hi.
25 “‘Mawhna nei lopa thah nadingin sumgolh a la mipa in gimna ngah tahen,’ ci ding uh hi. Tua ciangin mi khempeuh in, ‘Amen,’ ci ding uh hi.
26 “‘Hih thute zuihna tawh hih thu a kipsak lo mipa in gimna ngah tahen,’ ci ding uh hi. Tua ciangin mi khempeuh in, ‘Amen,’ ci ding uh hi.Ref 27:26 Gal 3:10.