24
Kimakna Thu
1 “Mi khat in zi la-in a teenpih ciangin, tua nu tungah kilawm lohna a om manin numei in a pasal’ mitah maipha mu lo a, amah in makna lai gelhin ama tungah pia-in ama inn panin sawl khia a, a pasal’ inn panin amah kihem khia-in,Ref 24:1 Mat 5:31; 19:7; Mrk 10:4.
2 amah pai-in midang khat’ zi va suak a,
3 a pasal nunung in amah deih lo leuleu a, makna lai gelhin a numei’ khut sungah koih a, a inn panin tua nu sawl khia-in, tua ahih kei leh zi dinga a la a pasal nunung a sih leh,
4 tua numei a hawl khia a pasal masa in, tua nu a kinitsak khit ciangin a zi dingin lakik thei nawn lo ding hi. Bang hang hiam cih leh tua pen Topa’ mai-ah kihhuaina hi a, Topa note’ Pasian un luah dingin hong piak leitang tungah mawhna na tunpih kei ding uh hi.
Ngeina Tuamtuamte
5 “Mi khat in zi a neih tungin galkapte tawh kuan khia lo dinga, nasep khat peuhpeuh zong kisawl lo ding hi. A laksa a zi tawh a lungdam khawm dingin inn-ah kum khat sung mang ding hi.
6 “Kuamah in an gawina ahi a, an gawina suangpek a tungnung ahi zongin khapna-in la lo ding hi. Bang hang hiam cih leh khapna-in nuntakna a la suak ding hi.
7 “Mi khat in Israel mi a sanggamte khat gu-in, amah in sila bangin a bawl ahi a, a zuak ahi zongin a kimuh leh, tua guta pa kithat ding hi. Tua bangin note’ lak panin siatna na siangsak ding uh hi.Ref 24:7 Pai 21:16.
8 “Phaknatna hong tun ciangin Levi siampite in hong gen bangin na gamtat ding uh ngaihsun un. Amaute ka thupiakna bangin na gamtat nadingun na kingaihsun ding uh hi.Ref 24:8 Siam 13:1-14:54.
9 Egypt panin na pai khiat lai-un lampi-ah Topa na Pasian un Miriam’ tungah a hihna phawk un.Ref 24:9 Gam 12:10.
10 “Na veengte uh tungah na khat peuhpeuh leitawi na piak uh ciangin ama hong khapna a la dingin a inn-ah pai kei un.
11 A pualamah na ding ding uh a, leitawi na piakna mipa in nang kiangah a na khap hong paipih ding hi.
12 Amah mizawng ahihleh ama hong khap puan na zantaamsak kei ding uh a,
13 ni a tum ciangin, a puanza silhin nang thupha hong piak theih nadingin tua hong na khap ama kiangah na piakik ding uh hi. Tua pen Topa note’ Pasian’ mai-ah note adingin thumanna hi ding hi.Ref 24:10-13 Pai 22:26-27.
14 “A zawng a cimawh a kicial nasem pa, na sanggamte khat ahi a, na gam sung na khuapite sunga om peemta khat peuhpeuh ahi zongin, na nengniam kei ding uh hi.
15 A sep ni-in ama thaman, nitum ma-in na pia ding uh hi (bang hang hiam cih leh amah zawng a, tua bek a lungsimah om hi). Tua hikeileh Topa’ tungah amah in hong khia dinga, note na mawh ding uh hi.Ref 24:14-15 Siam 19:13.
16 “Tate’ tangin pate kithat lo dinga, pate’ tangin zong tate kithat lo ding hi. Mi khempeuh ama khialhna hang bekin kithat ding hi.Ref 24:16 2Kum 14:6; 2Khang 25:4; Ezk 18:20.
17 “Peemta’ thu ahi a, pa nei lo mi’ thu ahi zongin tuate ading thutang na heisak kei ding uh a, meigong numei’ puan zong khapna-in na laksak kei ding uh hi.
18 Egypt-ah sila na hihna uh le Topa note’ Pasian in tua lai panin hong hotkhiatna na phawk ding uh hi. Tua ahih manin hih banga na gamtat nading uh thu kong pia hi.Ref 24:17-18 Pai 23:9; Siam 19:33-34; Thkna 27:19.
19 “Na lo ah an la-in lo lai-ah anlom na mangngilh uh ciangin a tawm dingin na paikik kei ding uh hi. Tuate pen peemta, pa nei lo le meigong numeite ading ahi hi. Hih pen Topa note’ Pasian in na khut uh tawh na sepna khempeuh uhah note thupha hong piak theih nading ahi hi.
20 Na oliv kungte uh na sat uh ciangin a hiangte na sat kikkik kei ding uh hi. Tuate pen peemta, pa nei lo le meigong numeite ading ahi hi.
21 Na leenggui lo panun leenggah na kaihkhop uh ciangin a sang na nung khopkik kei ding uh hi. Tuate pen peemta, pa nei lo le meigong numeite ading ahi hi.Ref 24:19-21 Siam 19:9-10: 23:22.
22 Egypt gamah sila na hihna uh na phawk ding uh hi. Tua ahih manin hih bangin na gamtat nadingun thu kong pia hi.